رتبها

الليلة الواحد أكل الخروف بي مزااااج و العيد بقى عيدين♥️
عشان قدرت أوصل لي هدف كنت شغال عليهو خلال فترة الحظر و نقصت 25 كيلو 🔥✌️
في الثريد دا ان شاء الله حختصر ليكم التجربة و الناس ممكن تستفيد.

قبل م أبدا لازم أوضح حاجة انا م أخصائي تغذية او مدرب رياضي لكن قدرت استفيد منهم في مواقع التواصل الاجتماعي و من الانترنت عموما. ✋

طيب نبدأ
١. الأكل او النظام الغذائي بتاعك :
صراحة انا م حرمت نفسي من الاكل و كنت شغال بي رجيم مناسب بس وقفت فيهو أخطر حاجتين و هم العيييش و السكر نهاااااائي.
تاني كنت باكل اي شي تقريبا بس بي معلقة و بي كميات معقولة.

* مرات البيت بكون فيهو حاجات ظااابطة باسطة و حلويات ممكن تشيل لك قطعة او اتنين و تبقى مارق 😂، فااا ما تحرم نفسك من حاجة و ثبت نظام اكل يكون عبارة عن نمط حياة بالنسبة لك.
* ماف حاجة اسمها يوم مفتوح و اكل فيهو اي شئ لانو انت اصلن م حارم نفسك من شئ بس خلي الكميات معقووولة.

أملثة للحاجات الكنت باكلها
بيض
جبنه
فول، عدس
لحوم بي انواعها
خضروات
فواكه
زبادي
+ باقي الحاجات بي معلقة 😂

٢. التمارين و الرياضة :
تقريبا كنت بتمرن ٦ ايام في الأسبوع و اليوم السابع راحة.
التمارين عبارة عن جكة و معاها تمارين كارديو.
طبعا مع الحظر الصالات كانت مقفلة فكنت بتمرن في حوش البيت و حتى الجزمة كانت منتهية و مشرطة فكنت بتمرن حفيان 😂(يعني ما تشوف لك عدز عشان توقف التمارين).

بالنسبة لي زمن التمرين بديت الجكة من ١٥ دقيقة عشان اللياقة كانت تعبانة و بالتدريج كنت بزيد في الزمن لحدي م واصلت ساعة كاملة. بعداك ببدأ بشتغل تمارين بتاعت كارديو لمدة نص ساعة.
اسف على الصور لكن دا منظر الرجل بعد التمرين و عدم الجزمة 😂🙈

* كنت بقيس الوزن كل يوم قبل التمرين و بعد التمرين، و دا كان شكل المنحنى بتاع الوزن من 100.5 الي 75.5

٣. النوم :
حاول دائما نظم عدد ساعات النوم حسب عمرك.
عموما الواحد مبسوط جدا بالإنجاز دا مع انو كل الهدوم بقت واااسعة و ماف شئ قدري 😂✌️
و دا مثال على الفرق و حتى البنطلون الفوق كبير شديد

في النهاية
كونك تلقى وقت فراغ و تكتشف فيهو نفسك و تعمل الحاجات البتحبها و تطور من مهاراتك ممكن يكون دا أكبر انجاز!!
الانجازات م قتصرة على شهادات او تتقبل في وظيفة او تاخد دورات تدريبية فقط، اهم شيء ترتاح نفسيا عشان تقدر تنجز بالجد ♥️🔥✌️
Abubakr Mohmed

@azoofit عزو دا انا كنت متابع اي حاجة كان هو بنزلها و صراحة استفدت منو كتير و بدون اي شتراك، لكن بالجد كان بنزل معلومات ممكن تفيدك♥️
شكراً🌸🙏

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد