أتممت اليوم Aug 19، ٧ سنوات في مجال الرياضة ككل و ٥ سنوات تقريباً في رياضة كمال الاجسام بالأخص، راح الخص تحت هذي التغريدة رحلتي الكاملة من شخص كان وزنه ١٧٨ كيفو الى ٧٧ كيلو وكيف قدرت انزل اكثر من ١٠٠ كيلو بدون ما (اترهل).
في البداية سمنتي كانت بشكل مفاجىء حصلت بسبب ظروف كثيره وبديت احس بأعراض كثيرة مثل الدوخة وطول النوم وصعوبة التنفس، سويت بوقتها فحصت وتشخصت في بداية سكر وارتفاع حاد في ضغط الدم بسبب زيادة الوزن (السمنة المفرطة)
حسيت بخوف كبير وقتها وضغط حاد من ناحية نفسية فقررت من الطبيعي اني اراجع اخصائيين تغذية في مستشفيات كبيره، واعطوني جداول تغذية وحبوب سد الشهية والخ، جدول التغذية للأسف كان محسوب بطريقة خطأ وكالمتعاد يعتمد على ان الاكل كله سلطات وخبز وزبادي وطول اليوم اكون جوعان
في سنتي الاولى قررت اني اشترك بالنادي والتزم بالدايت اللي اخذته من اخصائي التغذية، من الطبيعي بيكون نزول الوزن ملحوظ لان عجز السعرات كان مهول وروحتي للنادي ماني عارف اسوي اي شيء فأكيد مالي الا المشي والركض وتمارين البطن عشان تختفي الكرشه
مرت سنة كاملة ولاحظت النزول ولكن للاسف دخلت بمشاكل اكبر مثل تساقط الشعر وضعف الجسم والخمول المستمر وثبات الوزن، فحسيت انه فيه شيء غلط فقررت اني اغير اخصائي التغذية اللي كنت اراجع معاه واروح لشخص ثاني ولكن الصدمة كانت انه اعطاني نفس الجدول اللي اعطاني اياه الاول (بالضبط)
هذا كله كوم وكوم انك بالنادي عشان تاخذ معلومة من المدرب يجلس معاك ساعة كاملة يقنعك انك تشترك عنده وبيعلمك كل شيء ومن ناحية شخصية ما كانت عندي القدرة المادية اني ادفع للمدرب مبلغ فلكي شهرياً
استمر ثبات الوزن وضعف الجسم سنة ثانية وكنت ملتزم باني اقعد طول يومي جوعان واروح النادي وانا ما اعرف وش اسوي الى ان وصلت لمرحلة (شخصنتها) وقلت لنفسي ليه انا ما اتعلم كل شيء بنفسي وارتاح من موضوع انه هذا يلعب علي ولا لا وما اشيل همها فوق الهم اللي كان عندي
بديت اقرأ كثير في مجال التغذية اولاً واشوف ناس كثير لهم خبره كبيره بالمجال وتواصلت مع ناس انا اعرفهم وقررت اني اقدم على شهادة تدريب شخصي مو عشان ادرب اشخاص عشان بس ادرس وافهم وادرب نفسي وما ادخل بشوشرة وتشتت
قدمت على ال ISSA والحمدلله في خلال ٤ شهور قدرت اخذ الشهادة، بس هذي ال٤ شهور استفدت اشياء اكثر من السنتين الماضية من ناحية تغذية وتمرين واكتشفت انه افضل وسيلة لحالتي هي كمال الاجسام (المقاومة)
سويت اكثر من ١٠ جداول تغذية لنفسي وامشي عليها واحد واحد لمدة ٣ شهور واشوف ايش اللي بيمشي معاي وايش لا و هذا (غير صحيح) ولكن بحكم عدم الخبرة كنت ابي اجرب لحد ما تلقح معاي
رجعت اكل كويس وجودة نومي صارت افضل وبدأ شعري يرجع والخمول اختفى ونفسيتي تحسنت جداً والاهم من هذا كله السكر والضغط تعدل عندي بشكل ملحوظ وهذا كان هدفي الاول وما صرت اجوع بوسط اليوم ولاحظت فرق كبير بشكل الجسم
بصراحة حسيت ان الموضوع شدني وقررت اني اكمل اخذ شهادات بحكم اني عرفت طريقة عمل جسمي (عملية الايض) وصرت اعرف الوقت الانسب للاكل والنوم والتمرين لي فقررت اني اكمل اخذ شهادات (برضو لنفسي)
والحمدالله اخذت شهادات اكثر وزادت قوتي في الاوزان و وضعي صار افضل بكثير وصرت من شخص كان همه انه ينحف ويتعالج من السمنة والضغط والسكر الى شخص همه انه ما يصاب من ثقل الاوزان
نفسيتي تحسنت جداً وصرت البس اللبس اللي ابيه وصرت اروح الجيم بثقة وما اشيل انه هذا الشخص يشوفك او لا وما صرت اسحب الثوب عشان يبان جسمي او اني اوسع الملابس قبل لا البسها
واستمر هذا الحال الى عام ٢٠٢٠ بوقت كورونا وقررت اني استغل الحجر باني اخذ اخر وافضل شهادة تدريب شخصي في العالم واللي هي الIFBB وبرضو ارجع اقول انها كانت تحدي بيني وبين نفسي والحمدلله قدرت اجيبها
ومن بعدها الى اليوم الحالي صارت الرياضة شيء اساسي في يومي ولكن ما صرت احاول اطور من نفسي او اني اشيل اوزان اكثر او ادخل تحديات ثانية بحكم ضغوطات العمل والحياة وروحتي للنادي صارت شيء نفسي وروتيني وما هو تحدي او لسبب وغرض معين
في الختام، انا شخص غير مخول باني اعطيك نصيحة ولا انا مدرب شخصي او اخصائي تغذية انا فقط شخص هاوي خاض تجربة ونقول ان شاءالله انها كانت ناجحة واذا كنت تعاني من نفس المشكلة ان شاءالله اني بقدر افيدك لو بشيء بسيط ❤️
جاري تحميل الاقتراحات...