رتبها

ثريد عن المكملات الغذائية
تحذير! هي اسمها "مكملات"
يعني "تكمل" الحمية الغذائية و "تعزز" المواد القليلة بأكلك
يعني لا تعوض ولا تغني عن الأكل الحقيقي بأي شكل من الاشكال
تحذير! هاي المعلومات عامة في حال عندك امراض مزمنة او حساسية معينة او صارت عندك أعراض جانبية لازم تراجع اخصائي!

معلومات قبل الشراء
1.حدد هدفك واختار مكمل مناسب الك واقره مكوناته!
2.اختار شركة اوربية او امريكية رصينة ومشهورة (ابتعد عن الصيني والروسي)
3.أبحث عن وكيل الشركة بالعراق واشتري منه (لتشتري من محل او بيج عشوائي ولا من ابو قاعة)
4.اقرة التعليمات الي على العلبة والتزم بالجرعة المحددة!

بهالثريد رح اقسمها مجموعات حسب الاستخدام، المغذيات الكبيرة (بروتين/كاربوهايدرات)/ قبل التمرين (طاقة)/ خلال التمرين (احماض امينية)/ بعد التمرين (استشفاء)/ المغذيات الدقيقة (فيتامينات و املاح) و اخيرا المنحفات وحارقات الدهون
ايضا كل مجموعة رح اقسمها انواع حسب المادة الفعالة البيها

اولا المغذيات الكبيرة تتقسم
أولا- البروتين الي هو المكون الرئيسي لبناء العضلات الهيكلية
يستخلص يأما من اللحم او الصويا او الرز
بس الاوسع استخداما هو المستخلص من الحليب واسمه whey
فائدته ان يساعد ببناء العضلات و زيادة الوزن بطريقة صحية اذا تم استخدامه بطريقة صحيحة و بجرعة مناسبة

بي عدة أنواع حسب المكونات الرئيسية مالته
1-(ماس) لزيادة الوزن تكون نسبة الكربوهيدرات بي عالية
2-(وي) بي نسبة اقل من الكاربوهيدرات
3-(ايزو) فوگ ال90 بالمية بروتين صافي
4-الكايسين الي هو بروتين بطيء الامتصاص يستخدم قبل النوم
و كل شركة تحور بهاي النوعيات تضيفلهن مواد اخرى حسب الهدف

ثانيا- الكاربوهيدرات الي هي المصدر الرئيسي للطاقة بالجسم و ايضا تمنع تكسر العضلات و تساعد بزيادة الوزن
موجودة بالتمن و الخبز و الصمون و البتيتة و الفواكه و الخضروات
فقط بحالة اكلك قليل او تريد زيادة وزن بطريقة سريعة تفيدك اما الشخص الي اكله زين ما يحتاج ياخذها ك مكمل غذائي

ثالثا- الدهون الصحية الي موجودة بزيت الزيتون، زيت الذرة، زيت السمسم، السمچ، الافوكادو، المكسرات
تگدر تاخذهن ك مكملات غذائية الي هي الاوميگا 3 او زيت السمك فوائدها انها تغنيك عن الدهون الضارة و تدخل بعمليات الايض بالجسم و تقوي المناعة و دهن الcla الي يساعد الى حد ما بخسارة الوزن

مكملات ماقبل التمرين (الطاقة)
تتقسم عدة انواع حسب المادة الفعالة
1- كرياتين من اقوى مكملات الطاقة بس لازم يناخذ بطريقة صحيحة و جرعات محسوبة
2- بيتا النين و هو حمض اميني ينطي طاقة و قدرة تحمل وبنفس الوقت مابيه اعراض جانبية غير حكة بسيطة
3-النيترات الدراسات عليها ضعيفة لكن ايجابية

4- سترولين ماليت/ارجنين ماكو دراسات كافية تدعمه واني مجربه ما يشتغل
5- كافايين الموجود بالگهوة ينطي طاقة عظيمة بس اعراضه الجانبية هواي و ورة فترة يبطل يشتغل لان الجسم يتعود عليه
طبعا اي شخص ما يمارس اي نوع من الرياضة لمدة ساعة يوميا 4-5 ايام بالاسبوع لا ينصح باستخدام مكملات طاقة

مكملات خلال تمرين الي هي bcaa هاي عبارة عن احماض امينية سريعة الامتصاص تقلل تهدم العضلات خلال التمرين
بشكل عام الاحماض الامينية متوفرة بكثرة بالاكل اليحتوي بروتين و الجسم اصلا يصنعها ف فقط الشخص الي اكله مابيه بروتين بكمية كافية يحتاجهن اما الاشخاص الطبيعيين ما يحتاجوهن

مكملات ما بعد التمرين الي هو تحتوي مواد تساعد على استشفاء العضلات المتهدمة عند التمرين و اهم مادة هي الگلوتامين الي هو حمض اميني يساعد ببناء العضلات و ايضا اله فوائد اخرى عالجهاز الهضمي و المناعة
هاي المكملات فقط تفيد الشخص الي يمارس الرياضة بشكل منتظم من 4 الى 5 ايام بالاسبوع

المغذيات الدقيقة الي هي تنقسم فيتامينات و املاح
بشكل عام هاي المغذيات موجودة بالطبيعة و بالاكل و يصنعها الجسم
احنه ممكن ناخذها حسب الاحتياج اليومي الRDA و تكون آمنة اذا متفيد متضر
اما الجرعات العالية ممنوع احذ ياخذها بدون مراجعة طبيب و فحص نسبة النقص لان زيادتها تسبب اعراض جانبية

حسب الاستخدام
الA يفيد النظر والبشرة
الE يعزز الدورة الدموية
الC والزنك يقوي المناعة ضد الفيروسات
الD والكالسيوم والفسفور يقوي العظم والاسنان والمفاصل
مجموعة الB تساعد بنمو وتجدد الخلايا(الشعر والاظافر) وتعزز الجهاز العصبي
بوتاسيوم ومغنيسوم تساعد تقلص العضلات وتعزز الجهاز العصبي

مكملات فقدان الوزن
فقط 4 ادوية بالعالم مصرحة للاستخدام كخافض للوزن وتستخدم في حالات البدانة المفرطة
(Contrave, Saxenda, Xenical, Qsymia)
كل دوة بي استخدامات معينة وكل دوة بيه جرعات معينة وكل دوة بيه اعراض جانبية ف استخدامهن محصور باستشارة طبيب تغذية
اي مكمل تشوف بي هذني ابتعد عنه

مكملات حرق الدهون تتقسم
1- الcla آمن بس دراسات عليه قليلة
2- الكافايين فعال بس يسبب خفقان وارق
3- الكارنتين آمن وبي عدة فوائد وحدة منها حرق الدهون بس دراسات عليه قليلة
4- اليوهمبين فعاليته مثبته بس ممكن يسبب قلق وا توتر
5- الافدرين فعاليته مثبته بس اعراضه الجانبية كلش هواي

6- نبتة الگارسينيا/مستخلص الزيتون/مستخلص النعناع/مستخلص الكمون/مستخلص الفلفل ماكو دراسات تثبت فعاليتهن وبالعكس اكو دراسات تثبت ان ما الهن علاقة بالوزن
يعني چاي سولاف وتحميلة فلانة للاسف ما يشتغلن
اما لايبو 6 الاصلي فقط اسود وابيض والشركة نفسها ما تعرف العراقيين منين جابو هالالوان

المختصر المفيد
شنو هدفك؟
تريد بس تسمن تاخذ بروتين (ماس) او كاربوهيدرات
تريد تبني عضل تاخذ بروتين (وي) او (ايزو) و تگدر وياهم (كايسين) و تلعب حديد
تريد تاخذ فيتامينات او معادن تبحث عن الRDA مالته بالگوكل وتاخذ بناء عليها اما اذا حسيت عندك نقص حاد تسوي تحليل و تستشير طبيب عن الجرعة

اما اذا تريد تنقص وزن اول شي عدل اسلوب حياتك، نظم الحمية الغذائية مالتك و تحرك العب رياضة! وراها يأما تراجع طبيب اخصائي تغذية و يكتبلك خافض وزن حسب حالتك يأما تاخذ حارق دهون من مصدر موثوق و تكون بي مادة فعالة آمنة حتى اذا كانت مو مثبته بحرق الدهون اهم شي اعراضها الجانبية نادرة