لو بتدور على صحتك و خصوصا صحة أولادك لو مش فارقة معاك صحتك في 4 حاجات مهمين لأولادك و صحتهم وبالتبعية هينعكس عليهم و عليك ماديا بالمستقبل...
الأولى: الأكل لازم تتعلم أيه هو الأكل الصحي المتكامل بحيث يوميا يحصلوا على كل العناصر الغذائية و مش بالكميات خالص ولازم تعرف تحسب احتياجاتهم اليومية من السعرات الحرارية على حسب أنشطتهم و متفرحش إنهم بياكلوا كتير و وزنهم زايد لأن عدد الخلايا الدهنية اللي بيتكون في الصغر مبيقلش
و بيكونوا لما يكبروا أكتر عرضة للسمنة لو كلوا بدون دايت أكل مستمر لأن عندهم عدد خلايا موجود أصلا مستني يتملى بالدهون و يتخزن و بكده لما أولادك يكونوا متختخين دي مش حاجة حلوة خالص و الأكل الخارجي ده لازم توصل لصيغة لتقليله و دي أصعب نقطة
التانية: الرياضة و خضوصا رياضات الكارديو اللي معتمدة على الحركة مش رياضات الثبات زي التضخيم و رفع الأثقال لا زي الجري السباحة التنس دي مهمة جدا للياقة ابنك و هتساعده في التغذية يعني هياكل و مش هيتخن لأنه بيمارس نشاط يزودله احتياجاته من السعرات الحرارية و هتحافظ
على قلبه و دورته الدموية و قدرة تحمله و قوته البدنية, أتذكر أستاذ الفيسيولوجي في الكلية كان بيقولنا قلب الرياضي ده يا ولاد زي قلب العجل مش محتاج ينقبض كتير علشان يوفي احتياجات الجسم من الأكسجين فتلاقي الرياضيين كلهم نبضهم قليل و أحيانا كتيرة أقل من الطبيعي و أقل من 60
فهتلاقيه مع الأزمات و الاضطرابات أنت ضربات قلبك كشخص غير رياضي بتعدي ال 100 و تلاقي قلبك بيرفرف هو وقت الأزمات و الخوف قلبه بيكون زي قلبك هادي و ولا الهوا يعني
الحاجة التالتة: مهمة جدا خصوصا للأطفال النووووووووووووووووووم النوم المتواصل مش أقل من سبع ساعات مهم جدا ويفضل بالليل في الأطفال هرمون النمو بيزيد في فترة النوم فده مهم جدا و بالنسبالنا كلنا النوم مهم جدا.
الحاجة الرابعة و المهمة جدا جدا: صحة ولادكم النفسية العالم في منتهى القسوة و الشارع مليان أشكال وسخة و أنتم قررتم تخلفوا ولادكم و تنجبوهم في هذا العالم القبيح مش ذنبهم ذنبكم أنتم من حقهم تاخدوا بالكم منهم تحبوهم حبوا عيالكم متعنفوهومش اتكلموا معاهم ابنك ميخافش منك
ابنك لازم يعرف إنك ملجأه مينفعش يخبي عنك حاجة و لازم تتفهم كل احتياجاته العمرية و تكون قريب منه و الدراسة و التفوق العلمي مش هم هدف الحياة ابنك لو مكتئب و متوتر دايما و خايف من الفشل دي كارثة، حط في عقليته إنك دايما داعمه مهما حصل و متخليش حياته اختبار خليه يعمل اللي يقدر عليه
متحطوش ولادكم دايما تحت تهديد و خوف و بعبع امتحانات و يا فاشل يا مش عارف أيه شجعوهم دايما و المرة الجاية أحسن و أحسن وبرافو عليك عملت اللي عليك و زيادة مهما حصل و مهما جرى و متقارنوهوش بابن خالته ولا ابن عمته متقارنش ابنك بحد ابنك بطل نفسه و يتقارن بنفسه بس متقتلوش ولادكم وحبوهم
و أخيرا متقعدش تقول لابنك أنا طالع عيني علشان أأكلك و ألبسك و أشربك مش ذنبه و متسمعهوش الكلام ده أنت اللي خلفته و دي مسئوليتك و مفيش أي تفضل عليه و معلهوش أي ديون تجاهك فكك من الكلام ده متشيلش ابنك ديون و حمل مش بتاعه متحسسهوش بالذنب أنت خلفت ابنك تبقى تحبه وترعاه حب غير مشروط
و متستناش منه يردلك حاجة و تقوله أنا بعملك كذا علشان تعملي الحب مبيتقالش الحب المطلق الأبوي مبينتظرش مقابل الحب المطلق ده هو مقابل إنك خلفته في العالم ده العالم المؤلم ده و الأولاد و البشر بيحسوا بالحب المطلق و المقابل بيترد حب مطلق مش مقابل تلقائي.
جاري تحميل الاقتراحات...