فى عادتي لما بقرأ على الشيخ مش براجع خالص لأنى بتوفيق الله مداوم على الورد ومستحضر كل السور وكل المتشابهات والآيات ، آخر مرة قرأت عليه - أمس -من سورة يوسف- بالنسبالي كالعادة سهلة مش محتاجة مراجعة أصلا ، غلطت فى آية كذا مرة مش عارف أستجمعها ، قالي " أناديلك ابني الصغير يسمعها ؟! "

بعديها سألني سؤال كان وقعه صعب على الواحد جداً " بيقولى أنت واثق من حفظك بنسبة كام ؟ "
قلتله مية فى المية بلا تردد قالي " دى المصيبة أنا واثق من حفظي صفر فى المية يبنى إن لسانك ينطق بالآية دا توفيق من ربنا عزَّ وجل إياك إياك تستكبر وتتعالى على القرآن وتقول دى سورة سهلة ... "

" ومش هراجع هتغلط ولو مش هتغلط هتحس إنك مش على بعضك وافتكر دايماً إن القرآن غالب لا مغلوب وأنا متأكد إنك مراجعتش قبل ما تقرأ " قلتله فعلاً
قالي " علشان كده ربنا حب يذكرك بالموقف ده "
من أجمل وأصعب الدروس اللى اتعلمتها فى نفس الوقت .
القرآن غالب لا مغلوب
لاتتكبر على القرآن