رتبها

مسألتش نفسك قبل كده :
ليه عايش في فقر؟
بقلم / عمرو أبو مازن
تعالي نلقى نظره كده قريبه على حياة الفقراء وهتفهم في الآخر ليه ناس كثير بتعيش في فقر .. ومتنساش اني بكلمك من مكان عشت فيه زمن ..
لما بتقرب بتلاقي تصرفات الفقراء واحده
مثلا :
معتقداتهم بتدور حول الأمان والقله !

- القرش الأبيض ينفع في اليوم الاسود
- على قد لحافك مد رجليك
- اللي رايح يدوب على قد اللي جاي
- اللي يعمله النمل في سنه ياخده الجمل في خف
- القرش بييجي بطلوع الروح
وبتلاقي تصرفاتهم اليوميه قايمه على التوفير واستبدال الوقت والصحه والجهد ويشتروا الأشياء الرخيصه حتى لو متعبه !

يسعي الفقير دايما للمجاني والعروض والتخفيضات ، يصلح المقطوع والمكسور 100 مره ويعيد استخدامه بأشكال مختلفه ، بيبدل وقته وصحته ومجهوده وسلامه النفسي بالفلوس !
أنا مش بنتقد الفقراء خصوصا اني جاي من هناك ، لكن أنا هوضح ليه مستمرين في الفقر رغم محاولتنا للخروج منه ..

الفكره كلها في العقليه والتركيز ..
الفقير كل تركيزه على الندره ومفيش ، كل اللي بيشوفه في يومه اللي بيصنع حياته بعد كده ، هو أفكار الفقر ومفيش وعايزين نوفر عشان بكره ما نعلمش في ايه ، وبالتالي سيكولوجيا العقل الباطن بياخد كل الأفكار والصور اللي تخص الفقر ..

ويعيد ظهورها في حياتنا على أرض الواقع
دايره مفرغه نادرا لما حد يخرج منها !
طيب والحل؟
الحل الوحيد انك محتاج تغير الصور اللي بتشوفها بشكل يومي والمعتقدات لوفره ، لحد ما عقلك يعتاد الصور دي ويخلق لك المزيد منها
بس ده حل صعب خصوصا إني مش قادر أخلق وفره تخليني اعتاد الوفره

طيب جرب معايا الحلول دي ونشوف النتيجه بعد كده
أولا : هتعمل حصاله تسميها حصاله الوفره ، تضع فيها عملات معدنيه أو ورقيه من البواقي ، الحصاله دي هتقرر انك مش هتفتحها تحت أي ظرف إلا لما توصل الثراء المالي ، وكل ما تجمع مبلغ تجمده وتجعلها حصاله مقدسه ممنوع نهائيا تقرب جنبها ..

وفكرة الحصاله إنك بتخلي العقل الباطن شايف إن عندك مدخرات ، ورغم كده مهما كانت الظروف مش بتقرب منها وانها بتمثل فائض ووفره
ثانيا : هتعمل جمعيه بمبلغ صغير يمثل 5% من دخلك ، واللي تجمعه منها تضعه في بنك أو تشتري قطعة ذهب أو تجمده دولار فكرته توري عقلك الباطن إن عندك فائض وزياده

ثالثا : تبدأ تدير نفقاتك ، هتكتب قائمه بأولوياتك وتشتري الأهم حاليا ، وتستغني مؤقتا عن اللي ممكن يتأجل لحد ما يكون في وفره ، مش لازم كل يوم تاكل لحوم ، مش لازم تشتري شاشه كبيره دلوقتي ، لو عندك 3 بناطيل هتمشي نفسك بيهم فتره ، إنت هنا ممكن تكون بتتصرف من فقر ..

لكن أهم حاجه تكون نيتك انك بتعمل كده تمهيدا للإنتقال للوفره
لذلك انت بتخلق وفره من ترشيد نفقاتك ، بحيث تستخدمها في جلب وفره أكبر ، ومن اللي قدرت توفره شهريا هتعمل جمعيه أخرى تورط نفسك فيها وهتسميها جمعية الإستثمار ..

رابعا : الإستثمار بعد ما قدرت إنك توفر في نفقاتك وتديرها ، لازم الفلوس اللي جمعتها تولد أيا كانت الطريقه ، سواء بمشروع صغير أو تجاره سريعه أو حتى في شهاده بعائد
خامسا : مراقبة تصرفاتك اليوميه ، لازم تراقب كل فعل وتفكير وتشوف بتتحرك من فقر ولا وفره ..

بتشتري السلعه لأنك محتاجها وللا لأنها أرخص ؟
هل عملت قهوه في البيت عشان بتحبها كده وللا عشان توفر ثمنها في الكافيه ؟
بتاكل عدس لأنك بتحبه وللا عشان أوفر ؟
اشتريت البنطلون ده لأنه مريح وللا عشان أرخص ؟
المراقبه هنا للنيه والفكر من أهم القواعد 👌

سادسا : طبق الوفره فيما تملكه .. من يملك عقلية الوفره والثراء لا يكترث مهما أنفق لأنه يعرف ان الوفره دايما تأتي ..
طبقها في المعلومات وأنفق منها وستلاحظ انها بتعود عليك بمعلومات أفضل ، طبقها في الوقت وأنفق منه هتلاحظ ان كل عطاء من وقتك بيرتد يسر وبركه ..

سابعا :،لاحظ الوفره في كل شيء ، وفره المياه العذبه ، ووفرة الهواء ، ووفرة العلاقات الطيبه ،ووفرة المعلومات ، والشمس والمطر والأشجار .. الكون ملئ بالوفره ، لكن تركيزنا على الناقص بس بيجلب الندره !
ثامنا :،قلد الأغنياء ، اقتصد أسبوع في مشروباتك مقابل انك تشرب قهوه في فندق فخم ..

أو اقتصد أسبوع في أكلك مقابل انك تعزم أولادك في مطعم راقي ، أو اصبر شويه على حذائك ، ولما تجمع مبلغ اشتري حذاء من براند ..
تاسعا : اقرأ كثيرا عن عقليات الوفره وطريقه تفكيرها .. في كتب رائعه مثل أسرار عقلية المليونير والأب الغني والأب الفقير ..

وفكر وازداد ثراء ، وأغني رجل في بابل ..
كلها ستدعم فكرك وتطور عقلية الوفره عندك ..
طبعا الموضوع بيحتاج عمل ضخم والتزام يومي وتنظيم وإداره كبيره وتركيز شديد ووقت طويل ، لا تتوهم ان التغيير هيتم في يوم وليله ، لكن كونك بدأت من الآن ..
فهى خطوة على الطريق 👍
#عمرو_أبو_مازن

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة