حبيت انقل لكم قصتي مع يوم الجمعه واستغلاله وخصوصا " ساعة الاستجابه "
انا بصراحة ساعة الاستجابه اسميها ساعة تحقيق المستحيلات والمعجزات وخسران من لم يستغلها خير استغلال وعشان كذا بكتب لكم جدولي واتمنى فعلاً يفيدكم

انا مسويه جدول قبل الاذان بساعه اروح واتوضا واجلس ع سجادتي اقرا سورة الكهف والاذكار واسبح واستغفر وادعي وادعي وافضفض لله بكل اللي ف قلبي وم أقوم الا ع صلاة المغرب والله شفت امنياتي تحقق م يصبح الصبح الاوانا فرحانه بآمنيه، ولو تاخرت امنياتكم او ما تحققت يكفي شعور الراحه بعد الدعاء

هذي الساعه بالنسبه لي ساعة عظيمه ومستحيل افوتها لو ايش ما صار كل شي ملحوق عليه الا هالساعه لا راحت ماهيب راجعه عشان كذا اترك كل الدنيا وراي ولا اترك هالساعه، انتم لو بس تجربون الراحه والسعاده والطمأنينه ان ربي يسمعك وتبكين لله وتطلبين منه ومحد يقاطعك بس انتي وربك.

والله ما ابالغ لو اقولكم اني صرت انتظر يوم الجمعه بفارغ الصبر عشان بس هالساعه ماتدرون قد ايش فرقت معايه وغيرت اشياء كثيييره فيني وبنفسيتي حرفيا اذا اذن المغرب احس ما ودي يأذن من زود الراحه والطمأنينه

اللي يبي دعواته م تنرد يسوي هالجدول وكوني واثقه ان دعواتك م تنرد وتشوفين كيف ربي يحقق لك م تريدين والله يسعدكم سعادة تبكون من جمالها يارب.