علشان بلدنا تتقدم لازم نقدم تضحيات. لكن الفكرة مش نجوع علشان بلدنا ببساطة
المواطن الجعان مش هيقدر يشتري تلاجة وسخات وبوتاحاز صناعة البلد والمصنع مش هيبيع ويسرح عمال.
المواطن الجعان مش هيصيف ولا يدخل سينما ولا يشتري بدلة وبالتالي انشطة كتير هتفلس
المواطن الجعان القدرة الشرائية بتاعته هتنزل الارض والضريبة اللي حضرتك بتحصلها هتنزل الارض هي وضرايب الانشطة دي.
اللي انت بتحصله من الاغنياء ولا حاجة قدام اللي بتحصله من باقي ال ١٠٥ مليون.
احسبها صح لانك ماشي في سكة غلط

رفاهية المواطن هي السبب الاول والاساسي في رفاهية الدولة.
كل جنيه المواطن قادر علي صرفه حضرتك بتحصل ١٩ قرش منه
كل جنيه بتبيع بيه شركة سلعة حضرتك بتحصل ٢٢٪ من ارباحه
تبقي مصلحتك في المواطن المقتدر مش المواطن الجعان!!
من المواطن المقتدر اللي مفروض تجري بايديك وسنانك تزود رفاهيته علشان تحصل ضريبة تبني منها كباري وطرق وزي ما انت عايز
لكن تستلف وتخلي المواطن يشحت هتسد الدين من عند مين؟؟
المواطن الجعان معندوش يديلك تسد الدين!!
ولا الشركة اللي هتفلس لان المواطن الجعان معندوش يشتري انتاجها
السكة دي خطر وغلط

خزينة الضرايب ووزارة المالية انتعشت في عصر مبارك من كتر مبيعات السيارات والاجهزة المعمرة وعرف يسد الدين
خزينة الدولة انتعشت من قدرة المواطن علي السياحة الداخلية ومشترواته وخروجاته للقهاوي
لانك كمان بتقبض ضرايب من مشتروات المواطن ومن مبيعات الشركات الخاصة بالذات لانهم بيعرفوا يحققوا ارباح مش من شركات القطاع العام اللي بتفضل مدينة للدولة او بتكون معفية.
المواطن الفقير كارثة علي الخزانة مش ممول. وكارثة علي الدولة او غضب لدرجة الثورة.
اعي رفاهية المواطن متكونش اولوية اولي عند الحكومة
لان من خلال رفاهيته خزاينك هتتملي تعمل اللي انت عايزه للبلد
لكن تتداين وتفقر المواطن!!!!!
دة نفق مظلم ومستقبل كحل
نقطة