#قاليك حاج احمد طلق مرتو السُرة تلاتة طلقات وحرمت عليه ،،، والسرة سمحة شديد زى النجفة طلقها فى لحظة غضب بس وندم سف التراب وداير يرجعها ولازم محلل ،،،!!!لجماعة نصحوه يعقدوا ليها علي واحد في الحلة عوير إسمو حمد وبعد كم يوم يطلقوها منه،،،وبعد تكمل العدة يسلموها لي حاج احمد
حاج احمد وافق والفكرة وقعت ليهو وحمد العوير ما منو خوف ،،،جابوا المأذون وعقدوا لحمد العوير وحاج حمد.إتكفل بكل حاجات العقد وحتى ملابس حمد وخلوه كم شهر وجابوا المأذون للطلاق ....!!!! آها حمد العوير حلف بالتقطعو ما يطلق بس يهز راسه
الجماعة كل يوم طالعين ونازلين ومفاوضات لي بالليل وحمد العوير مقوي راسه ،،،،، وحاج احمد يشيل ويتوعد وحمد العوير بس بيقول ابيييت ،،،،اغروهو بالباسطة البحبها ما نفع دخلوا الاجاويد ما نفع ...حاج احمد بقي قاعد صابيها قدام بيت ناس حمد العوير ومستني المفاوضات تنتهي
وكل يوم الجماعة يقولوا ليه اهل حمد العوير وعدونا خير ،،،،!!!وصاحبك مصمم ما يطلق والوفد كل يوم يقول لي حاج احمد قربنا واتفقنا علي النقاط الاساسية،،،،،!!!!!وكمان ظهروا ناس في الحلة قالوا ياخونا الكلام ده غلط حاج احمد براهو فرط في مرته والعوير ده انقذها وسترها ولازم نطبق شرع الله
ونخليهو لمن يطلقها براهو وبي ارادتو بعد داك ترجع لي حاج احمد بعد ما تنتهي الفترة الانتقالية (اقصدالعدة) ،،،،،، غايتو لحدي اسي المشكلة دي ما اتحلت حمد العوير ماداير يطلق وحاج احمد ما داير يتنازل المشكلة العوير شرس جدا ممكن لو كتروها معاه يعوق حاج
!وقبل كده حاول يعتدي على الاجاويد وفلق ليهو كم واحد ،،،!!!لكن اهلو نكروا وقالوا ديل مندسين من اولاد الحلة غايتو المسألة متأزمة جدا وما معروف تنتهي علي شنو ،،،،،،،،،!!!!! المأذون زاتو زهج قال ليهم تاني ما تنادوني الا توصلوا لي حل
والأخبار عند النسوان فى الجبنة وفى محل الخضار والجزارة إنو السُرة ذاتا ما دايرة تطلق وحتى حاجة سعدية بت النجيض سمعت السرة بتقول لحمد العوير .حمد كان قالو ليك طلق قول ليهم أبيت) ، غايتو العوير ده بالغ جابوه يحل مشكلة هو زاتو بقي مشكلة يحلنا الحلا بله !!
(حكاية بعيدا عن السياسة)
(حكاية بعيدا عن السياسة)
جاري تحميل الاقتراحات...