كل الأحداث بتتكرر بشكل مختلف، مع تغيير في الأماكن والوقت والأشخاص.. تشعر و كأن الاختبار بيتعاد كل يوم ! إحنا بنفضل نصارع في الأمواج لغاية ما بنفقد الاتجاه.. توضيبات الأفراح بتنسينا الهدف الأساسي.. إحنا بنعمل الفرح ليه؟ عشان كده تلاقي أفراح تقلب لخلاف..
وتلاقي العزاء انقلب لمجرد واجب.. في واقع الأمر، هتلاقي معظم جوانب الحياة انقلبت لواجب.. واجب عزاء وواجب تهنئة.. واجب نفاق! مش مدركين إن كل حاجة في الطريق لها معنى ومغزى.. كل حاجة هتقابلها في حياتك، لازم تعيشها بكل جوارحك..
فكرة الواجب وفكرة الاستعجال، بيسرقوا منكم حياتكم! بتعمل حاجة وانت مستني اللي بعدها.. ولما توصل للي بعدها هتكون بتفكر في اللي بعدها...! مفكرتش قبل كده، ليه الأحداث بتتكرر.. ليه الأيام بتعيد إنتاج نفسها؟!
حياتنا بتفكرني بواحد كان فاقد حاسة الشم والتذوق لمدة كبيرة.. ولما رجعتله تاني.. بدأ يستطعم كل حاجة و كأنه أول مرة يتذوقها! إحنا فاقدين الحواس رغم إنها موجودة وشغالة.. فاقدين الشغف والاندهاش... ماشيين عكس اتجاه حكمة الحياة.. كل يوم بيتكرر في حياتك، له هدف ومعنى!
حاول تتعامل مع الأمور بشكل مختلف.. لأن التكرار بيقول انك لسه منجحتش.. ذاكر الحياة عشان تفهمها.. افهم الحياة عشان تشعر بيها.. إشعر بيها عشان تقدر تعيشها! فكر في كل يوم بيتكرر ، وفي كل حدث بيتعاد.. فكر بشكل مختلف! إعمل حاجة مختلفة!
جاري تحميل الاقتراحات...