طيب نتكلم جد شوية..
مرتضى منصور بعد وصلة شتيمة في المختلط ووعد ووعيد بيوجه الدعوة لنا تاني للحضور بكره.
إحنا عاوزين نتكلم معاك بهدوء وبالعقل، إيه اللي هيعمله حضورنا إحنا أو غيرنا؟! ما اللي عندك إنت بتطلع تقوله ليل ونهار، ولو كلامك -مش هقولك أفعالك حتى
يتبع

لقت أي قبول، تلقائياً هتلاقي الناس أو جزء منهم بقى في صفك، لكن إنت أفلست على مستوى الأفعال والكلام، مبقاش لك أي مصداقية تخلي أي شخص عاقل يقتطع من وقته علشان يتكلم معاك أو يسمعك، أصله هيسمع إيه؟ شتيمة/ وعود كدابة/ شحاتة/ شتيمة في ممدوح عباس، كلها حوارات محفوظة.
يتبع

غير كل ده، هتتكلم بصفتك إيه؟! إنت معزول بأحكام قضائية وممتنع عن تنفيذ الحكم، يعني ممكن البوليس يطب عليك في أي لحظة يشدك يرميك بره النادي.
آخر حاجة إنت خلاص مبقاش عندك حاجة تقدمها، حتى طفرات النجاح المؤقت اللي كانت بتحصل قضيت على أي أمل فيها، فالأحسن والأكرم لك ولو
يتبع

عاوز أي حد يفتكر إنك عملت أي حاجة كويسة للزمالك إمشي حالاً، إمشي وانسى الزمالك وسيبه لمصيره، إمشي واقعد في بيتك إلعب مع أحفادك لعبة امسك بحة، لكن هنضيع عمرنا في كلام مالوش لازمة مش هينفع.
إنت شايف إن الزمالك بيتعرض لمؤامرة، وإحنا شايفين كده برضه، زي ما شايفين إنك جزء من
يتبع

المؤامرة دي، فطلع نفسك من المعادلة وسيبها، خلي الناس تشوف المؤامرة وإنت بعيد، جايز حد يعرف ينتصر عليها، لأن الحرب على الزمالك مش ناقصة طابور خامس يهده من جوه.
لو حد جه مننا بكره هيقولك كلمة واحدة بس: "إرحل" فخدها مننا دلوقتي بدل المرواح والمجي والشحططة، إرحل يا مرتضى.