والدي أصيب بشلل الأطفال وهو صغير، وجدتي كانت بتحاول تلحقة بأي طريقه فكانت بتروح للقاهرة أسبوعيًا عشان العلاج الطبيعي على أمل إنه يتحسن، كانت في بعض الأوقات بتتأخر وتطلع تجري وراء القطر وهي شايلة والدي.
بس كان في سواق قطر كان يبص من الشباك ويشاورلها عشان تمشي على مهلها

وإنه مش هيتحرك غير لما تركب، والحمد لله مع الوقت والدي يتحسن وشلل الإطفال يختفي تقريبا من عنده.
بعدها بـ23 سنة والدي يتخرج من الكلية ويتقدم لواحدة شافها مع زميلة ليه في الشغل-زوجة خالي-
راح لوحده في الأول ولما استريحوا جه جدي وجدتي معاه عشان يتقدم رسمي ويتفقوا على التفاصيل.

وطول القاعدة جدتي عمالة تبص للراجل اللي قاعد معاهم تشبه هي شافته فين قبل كده، وفي نص القاعدة زعقت وقالت "أنت! انت الراجل الطيب اللي كان بيهدي القطر عشاني".
جدي أمين-رحمه الله- كان بيهدي القطر عشان زوج بنته يتعالج ويتقدملها في المستقبل.