كل ما اقابل حد فرنسي واقوله انا من اسكندرية يقعد يدندن اغنية اسمها Alexandrie, Alexandra بتاعت مغني اسطوري اسمه كلود فرانسوا في مقام عبد الحليم بتاعهم. قلت اسمعها بتمعن واترجم الكلام طلعت الاغنية بتتكلم عن بنات محجبات وحب على ضفاف النيل واضواء فنار اسكندرية ومغامرات بطعم اليود.
الفضول خلاني ادعبس وراه طلع البرنس اصلا مولود في اسماعيلية واتربى في السويس عشان ابوه كان بيشتغل في القناة قبل ثورة يوليو وبعدين لما حصل العدوان الثلاثي نقل مع عائلته موناكو وهو عنده ١٦ سنة. اتعلم المزيكا والغنا في مصر بعدين كمل بشكل احترافي في فرنسا. لكنه فضل يتكلم ويفهم عربي.
أشهر اغاني كلود فرانسوا هي اغنية Comme D’Habitude اللي ترجمها فرانك سيناترا للاغنية الأشهر على الإطلاق My Way واللي غناها بعد كده Elvis و تقريبا كل مطربي العالم. بالنسبة لاغنية اسكندرية فهي بتحكي قصة حب قديم ليه كانت عايشة هناك ايام ما كان مراهق. youtu.be
الأغنية طبعا بالفرنساوي بس قبل ما يموت كان عايز يسجل منها نسخة بالعربي. وفعلا كتب كلماتها وكان حايسجلها لكنه مات في ظروف غامضة وهو بيستحمى والرواية الرسمية بتقول انه كان بيحاول يركب لمبة في الحمام ورجله في البانيو. طبعا رواية غير مقنعة وطلعت اشاعات كتير عن السبب الحقيقي لموته.
القصة عجبتني لاني في نفس الوقت باعيد قراية كتاب جميل اسمه ( مصر ولع فرنسي ) عن هوس الفرنسيين بمصر اللي غيرها تماما وبرضه ازاي فرنسا غيرت شكل مصر وتاريخها بشكل جذري بعد الحملة الفرنسية مش بس عسكريا لكن سياسيا وحضاريا واقتصاديا وكمان فنيا.
كل حاجة مربوطة ببعض زي الدومنه ولما اقابل حد فرنساوي في اي مكان في العالم ويقعد يغنيلي Alexandrie, Alexandra ويقولي ازيك يا پاراكودا بييجي في بالي سلسال تاريخ طويل، البلدين فيه اثروا في بعض لدرجة ان العربيات في مصر فيها دريكسيون ومارشدير وان اشهر مطربي فرنسا اصلا اسماعيلاوي.
جاري تحميل الاقتراحات...