الواحد بيحاول ما يعكس نظره سوداويه لكن دا الواقع ، الوضع في الخرطوم يُدمي القلب والله بحري أصبحت مدينة أشباح حرفياً شوف عيني المواطن بيقلع وينهب اخوه والخرطوم كذلك ، أمدرمان أيسر حالاً من باقي المدن ، كل العاصمه عدا محيط القياده وصينية الحلفايا أنا ما لقيت غير الدعم السريع

الأمور إتعقدت جداً بدخول الفلول و اشتباكات الجنينه ودخول الحركات المسلحه في الصوره ، الحرب أصبحت تتخذ طابع قبلي الذي يمثل شرارة نشوب حرب أهليه ، التدخلات الاجنبيه كلها بلا استثناء بتمثل سكب البنزين على النار مع كل يوم تمتد فيه الحرب بتزيد الضريبه على المواطن والوطن

الضباب خيّم على المشهد ولا مكان للتفائل بسذاجه ، نحن الوحيدين المتضررين في معاشنا وفي مستقبلنا نحن الوحيدين البندفع في ضرائب لسنا سبب فيها ، الحرب دي عبثيه ولو أقسمتوا على وجوبها تظل عبثيه ، ربنا يزيل الغُمه ويفرج الهم ويغطي على الاهل والاحباب نحن تعبنا والله.

والله يا أخوان الواحد واقف على قيف الجنون وشويه كدا و ينفجر من القلق والتوتر والضغط المعيشي حيث ممكن يصل لنقطه ما منها رجعه ، الواحد بنوم ساعه وساعتين بس في اليوم وبيصحى على صرخات أهل بيته ، أمس اسعفت الوالده من ذبحه مؤكده بسبب صوت مضاد الطيران ، الناس دي حتمشي من ربنا وين؟!

في شنو يستاهل فقد الارواح دي البلد دي بتنزف على يد أبنائها منذ إستقلالها في شنو ممكن يتعمل عشان إنسان السودان يعيش حياة كريمه؟! ثورات ، مبادرات ، حركات اجتماعيه ، أرواح ، اطراف من أجسادنا كله قدمناه ليه لعنة البلد دي ما عايزه تتفك