رتبها

يا جماعة والله فرحتي بالموسم دا لا توصف . وفي نهاية اليوم ال 6,35 مليون الدخلنا بيها بقت 14,400 مليون لمساحة ٤٠ فدان . الفرحة الحقيقة ابعد من القروش بكتير . فالحمد لله قدرت اقنع نفس الناس البقولو لي تعال الخليج ووفرو لي الفرص برا البلد انو انتو تعالو وشوفو الفرصة بعيني وبالفعل

جو السعودين و إئتمنوني على قروشهم فبقى البرنامج انو لازم اثبت انو البلد دي فيها فرصة وتستحق التعب فيها . انا كنت واثق بالفرصة الموجودة في البلد دي بس هي تحديات وعايزة حلول .
التحدي كان كبير والاختلاف انو ما زي المواسم الفاتت البنك ما حيشتري القمح وحيكون السبيل هو السوق .

الاستراتيجية واضحة انو عايز تربح الموسم معناتو لازم تطلع اكبر انتاجية لكن شرررطا بأقل تكلفة ممكنة .
كويس الكلام دا يتم كيف ؟ تجيب وتدرس تكاليفك من الالف للياء وكيف انك تقدر تقلقل التكاليف وهنا لازم تحرك عقلك وتشتغل بإستراتيجية جنيه ورا جنيه ببني عمارة .

كويس اول تكلفة حتلاقيك هي عمليات التحضير الزراعي لمن حسبت تكاليف التركتر حتكون كم لقيتها بكل العمليات حوالي 2 مليون جنيه لكل المساحة . ( يا جماعة بالله عليكم حضروا بدري والتزموا بزمن الحقيقي لاي محصول وارشادات المهندسين

والاستشاريين الناس ديل والله كنوز متحركة ) .
الحل الوصلت ليهو بدل اقوم أأجر للعمليات زاتها اقوم أأجر التركتر زااااتو .
لمن اجرت لعملية الديكس اجرته لمدة يومين قبل الموسم بتكلفة : ٣٠٠ الف ✅
الجاز كلفني ٢٠ الف لكل ٤ فدان اجماليا كدا : ٢٠٠ الف ✅

بعدلك لمن الموسم خلاص دخل :
اجرت يومين في حساب : ٣٥٠ الف ✅
الجاز لكل المساحة كلفني : ٣٥٠ ✅
التحضيرات كان عمليات :
🔴 الحراثة ( مرة )
🔴 الخلخال ( مرة )
🔴التنعيم ( مرة )
🔴تقطيع الارض ( يا جماعة المرة دي قطعنا مصاطب والحاجة دي نفعت جدددددا في السقاية

🔴تشتيت السماد
🔴الزراعة
بدل كنت حادفع ٢ مليون دفعت مليون و ٢٠٠ الف ✅
وكدا وفرت علي نفسي مبلغ كبير جدا بي فكرة بسيطة المرونة سمحة يا جماعة وكمان نفذت العمليات بكفاءة اكبر لانو السواق جايبو انا .
الخطوة البعدها هي خطوة مهمة جدا ومحورية للمشروع وهي التسميد .

ثقافة التسميد عندنا فيها مشكلة يا اما الناس ما سمدت اساسا يا اما سمدو من غير دراسة بمفهوم كلما زاد كلما كان افضل ودا خطأ حتدفع مبالغ لتدميرك .
فعملت كالاتي جبت خبير زراعي فحصت التربة شفت مواضع ضعفها وين ومواضع العناصر الكيمايئة العالية . لي يا جماعة ؟ علشان احصل على افضل برنامج

تسميدي وبي اقل تكلفة وطبقتو زي الفرض واحد . ( دا منبط الفرس )
البرنامج كان كالاتي :
🔴شوال ونص بذور للفدان 75 kg
🔴شوال داب الفدان : ٥٠ كيلو
🔴شوالين يوريا للفدان : 100 kg
🔴استعملت في مرحلة متقدمة اليوريا السائلة لتعويض الكمية المفقودة .

🔴والاسمدة الورقية والمحسنات حسب وصف المهندس لمعالجة الملوحة .
🔴مبيد العسلة للوقاية
🔴مبيد الصفقة العريضة
تكلفة التسميد والوقاية اجماليا للفدان : 120 الف ✅
وحدة من الحاجات الميزت الموسم استخدامي للدرونس لاول مرة في رش المبيدات يا جماعة دي تقنية قوية جدا وفعالة لانو

زمان التركتر كان بخش جوا وكان في فاقد يحصل في المحصول .
دا القمح وعمرو ٣ شهور ونص وخلاص بدأت معالم ونسمات الحصاد تلوح في الافق وظهر من تعب وفكر واجتهد 🌾.
في وسط رمضان بدأ القمح يتكلم بأصواته وهمساته مخبرنا استعداده للحصاد في منتصف الشهر الكريم .

الشعور دا جميل جدا مجهود وتعب الشهور خلاص قاعد يتكب قدامك والحصادة تمشي وتجي شايلة تعب شهور علشان تكشف حقيقة انتاجيتك كم .
تكلفة الحصاد : ٣٥٠ الف ✅
الحمد لله انتاجية جاءت قوية جدا بواقع ٢ طن للفدان ( ٢٠ شوال سعة 100kg للفدان ) دا طبعا ما افضل انتاج في مكتب جنبنا في

مزارع منتج ٣٠ شوال في الفدان 👏.
تكلفة للمشروع كاملة لمساحة ٤٠ فدان :6,350,00✅
بعت بسعر ١٨ الف للشوال بإيراد كامل : 14,400,000✅جنيه بصافي ارباح 8,050,000 ✅جنيه
(لاحظو دا أسوأ موسم للقمح سعرا منذ سنين اتخيلو معاي لو البنك اشترى بي سعر ٤٣٠٠٠ للشوال دي 34.4✅مليون ) .
شكرا جزيلا

على الثقة التامة بجد والله ياخي الخليجين ديل بحبو السودانين اكتر مما السودانين بحبو السودانين .
من هنا الوضع لازم يطوريتغير ويدا بيد اي شي ساهل علشان تكون الخطوة الجاية نزرع علشان نصدر وما نصدر خام علشان كدا انا فاتح باب التمويل لكل المهتمين يدخلو معاي في الاستثمار الزراعي .

والوجهة ستكون تجاه الذهب الابيض القطن . جهزت كل المعلومات ودراسات السوق والمخاطر والعلاقات علشان نستفيد من كل القيمة المضافة ونتعامل مع الزراعة كبزنس بجد علشان نرفع البلد دي فرصة عظيمة جدا تتوفر في هذا المحصول .

وزي ما بقول لكل العايزين تفاصيل المشروع والمهتمين ال Dm فاتح ، والعنده اسئلة او استفسارات عن اي شي والله Dm دا من شدة ما فاتح لو جيت بي جنبو ساي بتلقى نفسك جوا 😂🤍.
#الاستثمار_الزراعي
#الاستثمار_في_السودان
#دعم_الزراعة_والمزارعين
#اتحاد_مغردي_السودان