الدنيا دي غريبة، وجزء كبير من غرابتها إن مافيهاش ثوابت.. يمكن الثابت الوحيد فيها إنك لازم تستعد تسيب اللي يقعوا يقعوا مادمت ماقصرتش، ومادام غيرك فلت إيده الأول..
معظم الناس قريبين على قد ما هياخدوا منك.. صوت المصلحة هو اللي بيبقى عالي..
معظم الناس قريبين على قد ما هياخدوا منك.. صوت المصلحة هو اللي بيبقى عالي..
مجرد ما تقع، أو تفلس، أو تحبط، أو تكتئب، أو حتى تفكر في نفسك هيبعدوا.. يمكن زعلك مش بيبقى على الشخص نفسه قد ما بيكون على إخلاص، ومشاعر حلوة طلعوا منك بمنتهى الصدق.. والمحصلة النهائية؟.. صفر غلاوة، وصفر قُرب، ومليون درس علموك مين اللي يستحق فعلاً شرف القرب بجد..
هتعرف منين إن النور جه إلا لو كنت غرقان في الضلمة قبله!.. بتفهم مع الوقت إن الصدمات بتحصل عشان تكتشف بالتجربة دور وقيمة شوية الناس النضيفة القليلة اللي ساندينك، حابينك، متقبلينك، وعايزينك فى كل حالاتك.. التصبيرة اللي الدنيا بتصالحك بيهم..
الحياة لازم تكمل.. إنت قطر ماشي في سكته، وبيقف في محطات وهتقابل فيها كل الأنواع.. اللي وصل المحطة وانتظرك من بدري.. واللي وصل متأخر ومالحقكش.. واللي ركب بس قرر ينزل في نص السكة..
بالنسبة ليك كمل، ماتبصش وراك، ماتضرش حد، ماتجبرش حد عليك، وشيل اللي يقدرك على راسك، وبالنسبة للناس بابك سكته مفتوحة للي عايزك ورايدك.
جاري تحميل الاقتراحات...