١- ليه مسلسل "بالطو" مهم؟ليه فيه اتفاق كبير انه من المسلسلات القليلة الجيدة جدا في السنوات الاخيرة؟باختصار: ده مسلسل متعوب عليه، الاخلاص واضح في تفاصيله، والسعي الحقيقي للاتقان في كل عناصره الفنية لا يخفى عن عيون الناس اللي ليهم ف الشغلانة.. لكن لاني حبيته فعلا، حابب افصّل شوية +
٢- يمكن د.احمد عاطف مؤلف مسلسل بالطو (ومن قبله الكتاب) مايكونش احسن سيناريست على مستوى تقنيات السرد وتركيب المواقف وايقاع المشاهد، وده طبيعي جدا بحكم قلة الخبرة،لكنه قدم ميزة مش موجودة في ٩٥٪ من مسلسلاتنا،وهي "المصداقية" او "الصدق الفني" +
٣- احمد عاطف عارف هو بيكتب عن ايه، عاش التجربة دي وتفاعل مع اطرافها، وبالتالي اما نقلها لعمل فني قدر يملاها تفاصيل "تتصدق"، حتى لو كانت محمّلة بمبالغات كوميدية.. ف الحقيقة جزء مهم من قوة "بالطو" ان السيناريو حافظ على شعرة صدق المواقف، بحيث انها ماتقلبش فارص فنفقد المشاعر +
٤- اما بنقول سيناريو، مش بنقصد بس الورق المكتوب، وانما البناء المتكامل من المشاهد اللي بتكون العمل، وده بيكون للمخرج دور مهم فيه.. مخرج "بالطو" عمر المهندس قدر يقدم بناء محكم يحافظ من خلاله على "نبرة" المسلسل، ويحافظ على شعرة الكوميديا/المشاعر اللي مخرجين كبار جدا بيقطعوها +
٥- عمر المهندس مخرج كبير، ده موضوع منتهي وربنا يوفقه ف اللي جاي..اثر عمله كمساعد مع المخرج الأكبر "شريف عرفة" لا تخطئه عين،من اول اختيار الممثلين المساعدين،بل والصامتين،مرورا بايقاع القطعات وتركيب اللقطات لتكوين عبارات كوميدية مرئية،ونهاية بكسر التوقعات اللي بيخلي كل حاجة طازة +
٦- مسألة "الطزاجة" كانت حاسمة في نجاح "بالطو".. اغلب عناصره فريش، وعلى راسهم بطل العمل "عصام عمر".. احنا تقريبا بقالنا اربع خمس سنين ماطلعناش نجم جديد وممثل شاطر في النصف الثاني من العشرينيات غير احمد مالك، عشان كده الناس كانت عطشانة لوصول وجه مختلف (ومتميز) لمنطقة البطولة +
٧- اتمنى العقلية الادارية/ الانتاجية اللي ساهمت في اطلاق المسلسل ده عبر منصة (ووتش ات) تستمر في العمل بنفس الكفاءة.. اراهن (بدون اي داتا تدعم رهاني) ان اشتراكات المنصة زادت بسبب "بالطو".. وده كل اللي انتو محتاجينه عشان تنافسوا، انكو تعملوا مسلسلات صادقة، وطازة، ومتقنة.
جاري تحميل الاقتراحات...