لو قررت تمشي من حياة حد (اياً كان السبب أو الموقف اللي ورا القرار ده) لازم تصارح اللي معاك بالسبب اللي مشيت عشانه..
حرام يبقى الشخص متساب وكمان مش فاهم هو متساب ليه ؟! مُتعب اوي احساس الترك الغير مُبرر ده. لا وزود على كدة بقى كمية الافكار السودا والمخاوف ورسم لسيناريوهات واحداث

محصلتش وملهاش علاقة بالواقع بسبب عدم صراحتك وانت ماشي أو اسبابك الغير منطقية او التلكيك عشان تريح دماغك وخلاص..
زهقت ؟
مشاعرك اتغيرت؟
مش مقتنع بحاجات في اللي معاك؟
طباع صعبة؟
اختلافات مش عارف تقرب فيها المسافات..
اياً كان السبب صدقني ينفع يتناقش ويتقال ..

مفيش شخص يستاهل يتساب مرة واحدة، أو يشوف اللي قدامه بيتلكك عشان يمشي من حياته.. محدش يستاهل يوصل لمرحلة انه يسأل نفسه.. "هو أنا وحش كدة فعلاً؟"
وسيبك من التفكير بتاع انك كدة "بتخلع بشياكة".. اهو في العلاقات القريبة بالذات ماينفعش تخلع بشياكة لانك يمكن يكون شكلك اجتماعياً

مقبول ولطيف ومفيش غلط يتمسك عليك .. بس للاسف مشيت وسايب في حد جرح وثقة مهزوزة بسبب خوفك على منظرك أو اعتقادك الوهمي بأن اللي قدامك بيقرا الافكار فا مش محتاج شرح..
وانت ماشي ماتخلعش بشياكة.. امشي برجولة وصراحة، زي ما قربت في الاول بصراحة وبمباشرة.. كفاية ضحايا مش عارفين هو السبب

والعيب فيهم ولا في اللي مشي .. كفاية ناس كتير بقت شكاكة في نفسها حاسين بالصغر وانهم مش كفاية بسبب ناس تانية زهقت وببساطة عايزين “يخلعوا بشياكة”..