حد معايا في التيم بيعمل غلط كبير جدا في الشغل، رغم اني شرحته ليها بمنتهي البساطة و قلتلها اوعي تخافي تغلطي ابدا، لانك لو مغلطتيش مش هتتعلمي حاجة جديدة، فضل يتكرر الغلط اكتر من ٤ مرات في نفس الحاجة، طلبت نعمل ميتينج، و قلتلها انا عايز اعرف ايه بيحصل معاكي انا معرفوش ..

ليه بيتكرر نفس الغلط رغم اننا اتكلمنا فيه كتير و انتي قلتي انه بقي واضح ليكي جدا، بدأت في نوبة عياط هستيري، لما تشوف الي قدامك خايف و متوتر ساعتها بتهون كل معاني الادارة و البيزينس و بتبقي عايز تطمنه و بس، و فعلا بدأت تحكي التفاصيل و انها عندها مشكلة نفسيه .. 👈🏻

بتخليها ديما خايفة مع اي مسؤلية بتتحط فيها مهما كانت بسيطة عشان كدة بتغلط مع انها بتبقي عارفة الصح بيتعمل ازاي، ساعتها قلتلها لازم تعرفي ان احنا بنشتغل عشان نتعلم و نبني شخصيتنا و نبقي أقوي و أكثر مسؤلية، تعالي نغير طبيعة التاسكات خالص، و بدأت اشتغل معاها خطوة بخطوة ..👈🏻

لحد ما نخلص المشروع سوا، و اخليها تشوف اثر شغلها بنفسها و ان دوري كان مجرد متابعة و بس، اسبوع ورا التاني، الثقة بدأت تزيد و الخوف قل، و الأخطاء كادت تكون انعدمت، و حصل حاجة عمري ما كنت اتوقعها، والدها بعت ليا رسالة بيقولي انت عملت حاجة كبيرة اوي ..👈🏻

أثرت بشكل ايجابي جدا علي حياتها الشخصية، اعتقد ده الهدف الحقيقي من انك تبقي مدير مباشر لمجموعة من الأفراد، ده مش أفضلية عليهم بالعكس ده مسؤلية رهيبة جدا، بتتطلب منك تضاعف الوقت و المجهود المبذول في الشغل عشان تكسبهم ثقتهم في نفسهم و صحتهم النفسية و ده تلقائي هينعكس علي الشغل جدا.