بيل جيبسون الفتاة التي صنعت امبراطورية تقدر قيمتها بمئات الملايين و كادت ان تكون احد شركاء شركة أبل بسبب انها كذبت باصابتها بمرض السرطان !
بيل جيبسون مواليد عام 1991 كانت تحت رعاية أمها تركهم أبوهم هي و أخوها من بدري و أنتقل على منظقة ثانية و تزوج و جحدهم الأم كانت تعاني من امراض عضوية مثل مشاكل بالقلب و المفاصل و كانت موسوسه و لا تثق بالأطباء و كل ما أحد صرف لها علاج قالت هذا يبي يذبحني !
بيل نقلت للسكن مع صديقتها وهي عمرها 12 سنة بس!وهذا وجه الضيف ما عاد شافوها و الصدق الأم ما شقت فيها بالحيل ، أول الأمر بيل نقلت و سكنت مع صديقتها اللي هي بعد عمرها 12لكن الموضوع ما طول أدري مره صدمة بنت 12 ترجع بكلامها بس الشكوى لله
بعدها يقال إنها أنتقلت للعيش مع رجل وعياله والرجال عمره 60 سنة ! فيه ناس يقولون هالرجال صديق للعائلة و ما أحد أعترض على عيشها معه بس ماش أنا ما جازلي !
بيل ما كانت شخص مقبول بين البنات و لأسباب مفهومه كانت تتنمر عليهم تتنمر على أوزانهم و دايم تقول إنها تفضل صداقة الأولاد أكثر لكن حتى العيال ما كانو طايقينها و يقولون هالبنت ما تمر خمس دقايق إلا مخترعة كذبة جديدة و لا كملت الثانوي و انضمت لجماعة مهتمه بالسكيت بوردينق
صارو كل شوي تجيهم رسايل من بيل و تقول أنا طحت بالمستشفى أنا سويت عملية بالقلب و يالعملية مت مرتين وقدروا المستشفى يساعدوني طبعا كل هالكلام ما صار لكن البنت ما تقدر توقف كذب !
مرت السنين و البنيه الحين عمرها 18 سنة وحامل و الأب عاطل عن العمل فقير ما يلقى ما ياكل بيل تقول أنا ماني شرهانه عليه و حتى يوم ماعدهم حبايب ظلوا أصدقاء و دايم تقول عنه أعز أصدقائي !
بيل كانت تشتغل كول سنتر بشركة تأمين و الراتب يادوب و كل يوم تقوم وتنام على هم هالبزر اللي جاي بالطريق و لا تدري كيف راح تصرف عليه و كانت تكتب بالفيسبوك عن قلقها هذا و هل هي قدها و كفو تصير أم ! و زود على ضيق الحال البنت ما أحد حولها يدعمها
لدرجة كانت تبي تسوي بيبي شاور و كلن أعتذر و راحت تشره بالفيسبوك وتقول كل البنات أهلهم و أصدقائهم يسوون لهم حفلات و تجيهم هدايا و أنا لا!لا أحد يفهمني غلط أنا ما أحسدهم لكن حاز بخاطري شدعوه ما أحد كلف على نفسه يجي يسعد بنت وحيده تشتغل ليل نهار بس عشان تأمن حياة جيدة لمولودها الجاي
يا بيل يقولك عبدالله الهذلي
إحذر تغش الناس لو كان غشوك
غادر بصمت و خل خاطرك صافي
و الدرب خله سمح لا تزرعه شوك
يمكن يجيك يوم و تمر حافي
إحذر تغش الناس لو كان غشوك
غادر بصمت و خل خاطرك صافي
و الدرب خله سمح لا تزرعه شوك
يمكن يجيك يوم و تمر حافي
بيل ولدت و يقولون أنها كانت أم ممتازة و مدبرة أمورها مع ولدها لكن من له طبع ما يخليه و بدأت بكذبتها الجديدة بس بيل ماهي مبدعه مره عشان تخلق قصة من نفسها و دايم فيه شخص تتقمص شخصيته مثل يوم كانت تقول فيها مشكلة بالقلب فيها نفس مرض أمها تخبرون ؟
بذاك الوقت كان فيه بنت أسمها جاسيكا و هالبنت أصيبت بالسرطان وعمرها 21 سنة نصحوها الأطباء ببتر ذراعها للسيطرة على المرض و الحد من أنتشاره جاسيكا رفضت و قالت ما راح أسمح لهم يسممون جسدي بالكيماويات و كل شوي يقطعون جزء منه !
جاسيكا قررت تأخذ خطة علاج " غير معترف فيها طبيا و المؤسسات الطبية تحذر من خطورته " وهو مسار " Gerson therapy " فيه المريض يشرب كميات كبيرة من العصير و يحرص على مكملات غذائية معينة و يقاطع السكر واللحم و القلوتين يعني اي شي طعمه زين و ينوكل
جاسيكا أتخذت القرار بأنها تتعالج بهالطريقة وللأسف إنها ما أكتفت بأختيار المسار اللي تبيه بل بدأت بالتبشير فيه و تكتب عنه و كيف هالنظام ساعدها و صار حولها إهتمام و الصحف و المجلات يتكلمون عنها خويتنا بيل قالت وش حيثها بس هي كلن يسولف فيها و أنا لا!
بيل فتحت حساب انستقرام بدأت تنزل فيه وصفات صحية و نصائح لتطوير الذات و الطاقة و هالسوالف لكن الهدف كان انها تظهر بانها متعافية من السرطان بسبب هالاشياء و فعلا نزلت بوست و قالت أنا عالجت نفسي من سرطان الدماغ بسبب نمط هالحياة !
مابين الأكل الصحي و التأمل و حب الذات ياربي لك الحمد سيطرت على المرض اللي أول ما أصبت فيه الدكاترة قالولي مالك علاج و باقي لك بالدنيا بالكثير 4 شهور و يوم بدأت بخطتي العلاجية و دحضت توقعاتهم وعشت قالو أيه بس ترا مستحيل تجيبين أطفال و هذا ولدي يركض جنبي
و لان بيل بيل قالت انها مواليد ١٩٨٩ بدل سنة ولادتها الحقيقية ١٩٩١ ليش ؟ ما احد يعرف السبب الا انها فيها بلاء و الا من وده يرتبط مع مواليد الثمانينات باي شي اذا حتى هم ما لهم خلق انفسهم
هالإدعاء للاسف جذب مرضى السرطان و أهاليهم لحساب بيل اللي بفترة قصيرة تعدا ميتين ألف متابع و ذاك الوقت كان هالرقم كبير جدا بيل بدأت تقولهم كيف إن العلاج الكيماوي و الإشعاعي ما ناسبها و إن الآن الورم صغر و حياتها حلوة و سعيدة
و كانت تأكد دائما إنها ضد التطعيمات و إن سبب مرضها –الغير موجود –هو التطعيمة الوقائية من hpv -بيل صارت ظاهرة وكلن يستضيفها و كلن يسولف عنها و المجتمع صاريشوفها هالملاك الطاهر اللي بتنقذ المرضى من جشع المؤسسات الطبية و كانو يشوفون كيف مظهرها يدل على الصحةو الشباب عكس بقية المرضى!
بيل بدأو كثير من المرضى و أسرهم يتواصلون معها و أحد هالعوائل عائلة طفل أسمه جاشوا و كان يعاني من ورم بالدماغ يقولون بيل صاحبتهم صحبه ما صارت و كانت معاهم بكل خطوة و تطلع على تقارير المستشفى و حالته الصحية و كل شي اللي مايدري عن حقيقتها بيقول ماشاء الله و ش هالقلب المخلص
بينما بالحقيقة بيل كانت تستغلهم لمعرفة تفاصيل عن المرض عشان إذا بغت تتكلم عن حالتها ما تجيب العيد !
بيل شافت إنها لازم تستفيد من شهرتها و قررت تسوي تطبيق و سمته " The Whole Pantry " و حتى بهالخطوة ما صفت النية و تعمدت توظيف طلاب جامعة أو حديثين تخرج بحيث ما تدفع كثير و بعضهم اشتغل مجانا لأنها قالت إنها راح تتبرع بنسبة من الأرباح للجمعيات الخيرية
لكن هالتسذوب كانت تطلع بالمقابلات و تقول إنها تعلمت تبرمج و شاركت ببناء التطبيق ! التطبيق أول ما نزل التحميل كان عالي جداً و ما كان هالشي بسبب حب الناس لها و ثقتهم فيها بس ! بيل كانت مقدمه وعد إن 1% من أرباح أول شهر راح تكون لعلاج جاشوا و هالشي طبعا ما صار !
التطبيق حقق نجاح كبير بأستراليا و من سنته الأولى قدر يحجز مكانه كأفضل تطبيق صحي و هذا اللي جذب أنظار شركة أبل و راسلوها وعرضوا عليها إنهم راح يطرحون ساعة عام 2015 و إن ودهم لو يكون تطبيق بيل أحد التطبيقات المثبتة مسبقا بالساعة
بيل طارت ولا وقعت من الوناسة صفقة قيمتها راح تكون مئات الملايين و بتضمن حياة رغيدة لها و لعشرين جيل جاي و فريق أبل كانو دايخين عليها وما كانو ينادونها إلا باللطيفة و المحبوبة حتى بإيميلاتهم بين بعض و إذا جو يراسلونها يختمون الإيميل بـ xoxo يبون يصيدون جوها
و حضرت المؤتمرات الاولى اللي كانو يتكلمون فيها عن الساعة و كانو واعدامها انها راح تكون على المسرح بيوم اطلاق الساعة !
بيل للعالم الخارجي حياتها عبارة عن معجزات مستمرة ما بين شفائها من مرض مميت إلى و لدها اللي جابته رغم كلام الأطباء إلى صفقة أبل وسوت كل هذا و هي محافظة على مظهر شاب و جميل ما تأثر بكل هالعقبات ! لكن اللي داخل حياة بيل كانو شاكين فيها و أولهم حبيبها كلايف
كلايف رجل بآخر الأربعين يقولون طيب و هادي و ماله بالمشاكل كلايف كان محترم رغبة بيل إنها ما تشارك أحد بتشخيصها أو رحلتها العلاجية و بكذا الأمور كانت مستتبه !
لكن كلايف أبوه أصيب بالسرطان و شاف هو و أهله أستحالة إن بيل تكون مريضة و إن علاجها صحيح ! كلايف بدأ يخاف منها لأن مين ممكن يسوي هالسوات ! و لا صارحها أو سألها كان خايف إنها تضر نفسها او الولد لأن متأكد أن مافيه شي راح يوقفها !و كانت وصية أبوه له إنه يقطع علاقته ب بيل لكنه ظل معها
بيل بحفلة ميلاد ولدها أختارت أنها تمثل نوبة صرع قدام الحضور!والحاضرين يقولون المنظر كان مخيف الكبار قبل الصغار كانو يصيحون و ولدها أنهبل ما يدري أمه وش صار عليها!و بوسط هالأزمة أحد الحضور رفع الجوال بيدق على 911 و كعادة بيل حصلت لها معجزة و قدرت تتكلم وتقوله سكر لا يجون!
يقولون الحضور طلعنا و حنا نصيح من اللي شفناه و كنا راحمينها و راحمين ولدها بعد هالحفلة طلعت بيل و قالت لمتابعينها إن المرض أنتشر بأجزاء أكثر بجسدها هالخبر حطم قلوب اللي يحبونها واللي كانو يشوفونها امل و حافز !
و لا أبطت عقب هالبوست سافرت على بالي و صورت وهي تسبح و مبسوطة هالشي لفت أنتباه صحفيين و قالو شكلها تكذب ! أول شي سرطان الدماغ شبه مستحيل ينتشر بباقي الجسم ثاني شي لو كانت صادقة و مرضها اللي تعاني منه بهالشراسة فنظامها المناعي بيكون منهار و لا راح تقدر تروح تمرطس ببحيرات بالي !
لكن ما كان ودهم يطلعون ويقولون تراها كذوب ما أحد يبي يكون الشخص اللي يكذب مريض و يشكك فيه! طبعا الصحفيين كانو يتوقعون إنها تكذب بطبيعة مرضها و شدته ما فيه أحد ظن أبدا إنها أساسا ما فيها شي ! الصحفيين بدأو يدورون مدخل ثاني عليها و هي قد صرحت إنها تبرعت بـ 300 ألف دولار
لعدد من الجمعيات قالو أبد هذا هي خل نشوف تبرعاتها حقيقية أو لا ! تواصلوا مع الجمعيات اللي قالت إنها تبرعت لهم قالو ما شفنا منها شي أبد ! هنا بدأ الشغل و كلموا بيل و علموها إنهم يشتغلون على هالموضوع لو ودها تقول شي أو تدافع عن نفسها الآن تتكلم !
بهالوقت جاسيكا اللي قلدتها بيل تخبرونها ؟ للأسف توفت و قبلها بفترة توفت أمها بسبب سرطان الثدي و الام برضو كانت رافضه العلاج مثل بينتها زوج جاسيكا قال بآخر الأيام حاولنا ناخذ مسار الطب الحديث و جاسيكا حضرت 6 جلسات إشعاع لكن للآسف ما كان فيه شي ممكن يسويه العلاج !
وفاة جاسيكا و أمها زادوا الضغط على بيل و بيل قالت للصحافيين أنا الحين عندي حالة وفاة و لازم أروح أوجب أهل جاسيكا عطوني وقت و أرد عليكم يقولون دخلت على العزاء و هي تصيح بأعلى صوتها و أزعجت الموجودين اللي كانو يدرون إن ما بينها وبين جاسيكا إي علاقة و حتى إن جاسيكا ما كانت تفضلها
بيل قعدت تجرجر زوج جاسيكا و تطلب منه إنهم يقعدون لحالهم يقول رحت معها و قعدت تقولي شلون إنها خايفة يكون مصيرها زي جاسيكا و تموت بأول شبابها ! يقول رحمتها و تفهمت الإزعاج اللي صار البنت مرتاعه!و بالحقيقة بيل كانت عارفة إن موت جاسيكا هو القشة اللي بتكسر ظهر البعير و بتكشف أكاذيبها!
بيل حتى أصدقائها ما عاد يتحلمون أكثر و أجتمعوا معها و سألوها بالصريح هل هي مريضة أو لا ! الشكوك ما جت فجأة من زمان شاكين لكن مع إعلانها بأنتشار المرض و موت جاسيكا الكل بدأ يناقش شكوكه بالعلن لما سألوها وين أوراق التشخيص قالت مامعي شي !
قالولها طيب وش العيادة اللي رحتي لها قالت مارحت عيادة الدكتور هو اللي جاني البيت ! و أسمه دكتور فيل !
أصدقائها راحوا يسألون حبيبها هل فيها شي أو لا و بعد ضغط منهم قال شوفو أنا شاك مثلكم بس خايف لو أنكشفت تسوي شي بالولد هذي سفيه ! حتى المساعدة الشخصية حقتها قالت لهم يوم كانت تكتب انها رايحه لموعد مستشفى و الناس تحسب انها رايحه تكشف كانت رايحه تسوي اسنانها
بيل عرفت إن النهاية قربت و حاولت تتلاحق عمرها و كلمت شركة PR "علاقات عامة" عشان تلم الموضوع معهم قالولها بالحرف الواحد حلك الوحيد تطلعين تعتذرين تصفين دريونك بعدها تغيرين أسمك و تختفين للأبد قالت ما فيه أمل أرجع و أكمل شغلي و تطبيقي ! قالولها عساك تسلمين بس
الشركة قدروا ينضمون لها لقاء مع أحد المجلات وفيه قالت إنها عاشت طفولة سيئة و لمحت إن فيه أحد أفراد الأسرة كان متسلط عليها ! و إنها عاشت مع أم مريضة و أخ متوحد و ما كان قدامها خيار إلا إنها هي تمسك مسؤولية البيت من عمرها 6 سنوات !
و طلع اللقاء بنفس اليوم اللي طلع فيه تحقيق الصحافيين اللي كان عنوانه المرأه التي خدعت الجميع ! بيل كتابها سحب من الأسواق و أبل كنسلت تطبيقها قبل أيام بس من إطلاق الساعة !
حتى أمها طلعت و قالت تعقب مين اللي متحمل مسؤولية البيت هي عساها تشيل زبالتها و أخوها ما هو متوحد مافيه إلا العافية أصحى منها و إيه ترا عمرها 23 مب 26 زي ما تقول ! أمها كانت حكاية لحالها الصحفيين كانو يقولون إنها كانت كابوس!
كانت تطلب إنهم ياخذونها لأحسن المطاعم و تطلب كل اللي بالمنيو و إن حجزو لها فندق نزلت وهي ماخذه كل شي بالغرفة و تقول معليش فشلتنا بنتي و هي لافه مفرش الفندق عليها المره كانت كارثة بكل المعاني !
بيل ما سمعت نصيحة ال PR وطلعت بلقاء تلفزيوني اللي لو أفضل المخرجين و الكتاب على مر العصور أجتمعوا عشان يطلعون بمثل هالتصوير لحقارة الإنسان و كذبه و جنونه ما قدروا ! بيل طلعت فيه مقابل 75 ألف دولار !
و جت بقصة جديدة لكيف تشخصت !
ماهي صاحية
المذيعة قفلت معها
حتى سؤال العمر قعدت تراوغ فيه - بالحقيقة وقت اللقاء عمرها ٢٣ -
ضاقت بالمذيعة و تبي تعرف وش تعريف بيل الحقيقة !
اللقاء يضحك مره ودي او انزله كله والله بس ما يمدي شوفوه بالله
youtu.be
اللقاء يضحك مره ودي او انزله كله والله بس ما يمدي شوفوه بالله
youtu.be
صدقوا او لا تصدقوا بيل تقول انها اسلمت الحين 💀 وانضمت لجماعة اثيوبية و طلعت اتكلم باسمهم و طلع الرئيس حقهم و قال لا نعرفها ولا تعرفنا و لا حنا مسؤولين عن اي شي تقوله
المحكمة حكمت عليها بغرامة قدرها ٤٠٠ الف دولار بس بيل قالت مامعي والله بس الحكومة داهمت بيتها واخذت كل شي عليه القيمة
المصدر كتاب :
The woman who fooled the world
الكتاب حلو مره ما تكلم بس عن قصة بيل تكلم عن كل ادعاءات الناس اللي مثلها و ليش الطب ما يعترف بهذي الممارسات
The woman who fooled the world
الكتاب حلو مره ما تكلم بس عن قصة بيل تكلم عن كل ادعاءات الناس اللي مثلها و ليش الطب ما يعترف بهذي الممارسات
جاري تحميل الاقتراحات...