رتبها

## زلزال اليوم وعلاقته بإسطنبول
هاحاول اشرح بشكل مبسط ومختصر عن الزلزال اللي حصل انهارده في جنوب تركيا وشمال سوريا وهل له علاقة بإسطنبول لإنه سؤال مهم ومتكرر 1/18
#زلزال_تركيا
#geçmişolsuntürkiye

سطح الكرة الارضية مكون من صفائح تكتونية (Plate Tectonics) بتتحرك بشكل مستمر (حركة بطيئة جدا) عشان كده العالم من ملايين السنوات كان عبارة عن قارة واحدة وبسبب حركة الصفائح المستمرة تشكلت القارات والمحيطات بشكلها الحالي 2/18

حركة الصفائح إما بتتباعد عن بعض أو بتتقارب من بعض أو بتحتك ببعض احتكاك بشكل متوازي وكل نوع من الحركة بينشأ عنه إما زلازل أو براكين أو الاتنين مع بعض..الصفائح اللي بتتحرك وتحتك ببعضها بشكل متوازي بتشكل نوع معين من الفوالق أو الصدوع وهو (Transform faults) 3/18

وده نوع من الفوالق مش موجود كتير ولكن بينشأ عنها زلازل قوية، وأشهر مثال معروف عن النوع ده هو فالق "سان أندرياس" (San Andreas fault) في كاليفورنيا وده كان سبب لكل زلازل كاليفورنيا المدمرة على مدار تاريخ المدينة 4/18

تركيا موجود فيها فالقين مماثلين لفالق "سان أندرياس" وهما فالق الأناضول الشمالي (North Anatolian fault) وفالق الأناضول الشرقي (East Anatolian fault) زي ما موجود في الخريطة..الزلزال اللي حصل انهارده في جنوب تركيا وشمال سوريا هو نتيجة للحركة اللي بتحصل على فالق الأناضول الشرقي 5/18

وبشكل أكتر تفصيل في صفيحتين "العربية" و"الأناضول" بيتحركوا بشكل متوازي (احتكاك/انزلاق) على فالق الأناضول الشرقي..والفالق زي ما موجود في الخريطة بيمر من جنوب شرق تركيا (شمال سوريا) حتى يصل إلى أقصى شمال شرق البحر المتوسط عند منطقة "الأسكندرونة" 6/18

ولذلك المنطقة الموجودة عند فالق الأناضول الشرقي دائما منطقة نشطة ويتوقع حدوث زلازل فيها نتيجة الحركة الدائمة على الفالق. الزلزال اللي حصل النهارده في جنوب تركيا وشمال سوريا لو تتبعنا مركزه (كهرمان مرعش) وأكثر الأماكن المتضررة هانلاحظ أنها موجودة على نفس الخط الخاص بالفالق 7/18

لذلك الزلزال اللي حصل انهارده في مناطق جنوب تركيا وشمال سوريا وما تبعه من توابع على مدار اليوم مصدرها الرئيسي هو فالق الأناضول الشرقي وليس له علاقة مباشرة بإسطنبول 8/18

أما الزلازل اللي بتحصل في إسطنبول فبيكون سببها الفالق الآخر اللي أشرنا إليه سابقاً وهو فالق الأناضول الشمالي وده بسبب إن في صفيحتين "الأوراسية" و"الأناضول" بيتحركوا بشكل متوازي (احتكاك) على فالق الأناضول الشمالي (North Anatolian fault) 9/18

والفالق زي ما موجود في الخريطة بيمر في شمال تركيا بخط يربط الشرق والغرب وبيمر ببحر مرمرة وبالقرب من إسطنبول وده بيفسر بوضوح ليه دايما إسطنبول منطقة زلازل نشطة وأيضاً بيفسر زلازل 1999 المدمر اللي كان مركزه ولاية "إزميت" الواقعة على فالق الأناضول الشمالي والقريبة من بحر مرمرة 10/18

سؤال آخر مهم ومتكرر هل متوقع يحدث زلزال قريب في إسطنبول بعد زلزال انهارده ؟؟
قبل ما نحاول نجاوب على السؤال ده في نقطة مهم توضيحها..مفيش حد يقدر يتوقع معاد حدوث الزلازل وبمعنى أدق ده مستحيل من الناحية العلمية، لكن اللي ممكن يحصل إن يكون في توقعات بمكان حدوث الزلازل 11/18

نتيجة التحركات التكتونية والفوالق الموجودة زي ما وضحنا في حالة تركيا، لكن مستحيل تحدد الزمن..وده اللي بيخلي الناس اللي عايشه في مناطق الزلازل النشطة بتستعد دائما بإجراءات احترازية ومنشآت حديثة قادرة على مواجهة الزلازل إلى حد ما 12/18

وللتأكيد أي توقع بحدوث زلزال فهو في الغالب من باب المصادفة وده على سبيل المثال ما اعتقده في التويته المنتشرة لأحد العلماء اللي بيتوقع زلزال انهارده وهي مصادفة لا أكثر من ذلك 13/18

اي زلزال بيحصل بيسبقه حركة بسيطة أو زلازل بسيطة ويتبعه أيضاً مجموعة زلازل أقل منه وده معناه إن حدوث أي زلازال بيحمل معاه مجموعة من الاحتمالات وهي إنه زلزال سابق لحدوث زلزال أكبر أو أنه هو نفسه أكبر زلزال أو إنه زلزال تابع لزلزال حدث قبله 14/18

لذلك بعد الزلازل المدمرة بيكون فيه تحذيرات مهمة للانتباه من التوابع وده اللي حصل في زلزال انهارده بحدوث مجموعة من الزلازل أقل في قوتها من الزلزال المدمر وبعده مباشرة وده أيضاً إشارة إن الزلزال المدمر في جنوب تركيا وشمال سوريا هو الزلزال الرئيسي وليس تمهيد لزلزال أكبر منه 15/18

بناء على ما سبق زلزال اليوم ليس له علاقة بإسطنبول ولا داعي لرسائل التخويف والهلع المنتشرة بأن زلزال وشيك سيضرب إسطنبول أو أن على أهالي إسطنبول أن تتركها بيوتها تحذيرا من الزلزال 16/18

ولكن يبقى الحذر دائما في إسطنبول باعتبارها منطقة زلازل نشطة، وهذا يعني أن أهالي إسطنبول عليهم دائماً أن يأخذوا احتياطاتهم بشكل عام لكيفية التعامل مع الزلازل وهي إجراءات موجودة على كثير من المواقع ويسهل البحث عنها.
والله أعلم 17/18

نسأل الله عز وجل أن يرحم ضحايا زلزال شمال سوريا وجنوب تركيا، وأن يعوض ويشفي المتضررين والمنكوبين ويحفظ الجميع 18/18

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد