١- على مدار الاسبوعين اللي فاتوا استمتعت بسلسلة "الحضارة المفقودة" على اليوتيوب اكتر من استمتاعي بعشرات المسلسلات العالمية الوثائقية او حتى الدرامية على نتفلكس وديزني.. فيه حلقات شفتها اربع مرات واعتقد تكرار المشاهدة هايكون اساسي ف علاقتي بالسلسلة دي.. وده له اسباب كتير +
٢- "الحضارة المفقودة" سلسلة بحث في الحضارة المصرية القديمة، قائمة على اجتهاد واخلاص واضحين من مهندس مصري شاب اسمه "احمد عدلي".. شخصيا لاول مرة ف حياتي اشوف مادة عن الفراعنة تخاطب عقلي بشكل منطقي بعيدا عن اسطوانات سحر الحضارة والألغاز الخفية والمعجزات الاسطورية…الخ +
٣- احمد عدلي مش بيقدم استنتاجاته باعتبارها حقائق،بل بيشجعك على التفكير والبحث والنقد وطرح التساؤلات وإعمال المنطق.عشان كده رغم الفقر التقني للفيديوهات بحكم انها نتاج عمل فردي،مش هاتقدر تقاوم المتعة الذهنية الكبيرة اللي بيقدمهالك من اول فيديو لاخر فيديو،وحقيقي لما بيخلصوا هاتزعل+
٤- "الحضارة المفقودة" ١٤ فيديو، متدرجة ف الطول، اولها تقريبا عشر دقايق بس واخرها معدي الساعة.. تقسيم مواضيع الحلقات وترتيبها وتشبيكها مع بعضها بالشكل التراكمي المشوق ده يليق بمهندس حقيقي.. ده ممكن يكون من اوضح الامثلة انه السيناريست الشاطر لازم يكون صاحب عقلية هندسية 😄 +
٥- ف الحقيقة"احمد عدلي"استعمل في بناء سلسلته عناصر كتير من كتابة السيناريو، بس اهمها على الاطلاق انه كان عنده القدرة على تقديم رؤية محكمة ومترابطة ف النهاية.. يروح وييجي في الحواديت الجانبية والحبكات الموازية (اللي كلها ممتعة) دون ان يحيد عن العصب الرئيسي او يشوش الرؤية الكلية +
٦-"الحضارة المفقودة"سلسلة لا تتعامل مع اثار الفراعنة من الناحية الاثرية فقط،دي بحث قائم على علوم الفيزيا والفلك والجيويلوجيا والكيميا، وكل العلوم دي بتتقاطع مع التاريخ وعلوم الاثار بشكل منطقي..والمنطق بالتحديد هو اللي يهمني، وهو اللي شدني، وهو اللي ادى للسلسلة مصداقيتها في رايي +
٧-ولانه المنطق هو السيد، مش غريب انه احمد عدلي في كل فيديوهات السلسلة تقريبا بيدعوا المهتمين لمناقشته، ونقده، والاشتباك مع اللي بيقوله بشكل علمي برضه.. الموضوعية الواضحة في منهجه، وسعيه للتقصي حول كل معلومة وخلف كل احتمال، كلها ادلة على شغف حقيقي باللي بيعمله +
٨- التاثير المباشر لفرجتي انا وفاطمة والولاد على "الحضارة المفقودة" اننا قررنا نزور الاهرامات والمتحف المصري مرة تانية.. بقى عندنا عين جديدة نبص بيها على الاثار المختلفة، مش لمجرد الازبهلال والتبجيل، ولكن للتفكير والبحث.. حقيقي انا ممتن للمهندس الشغوف اللي وصلنا للحالة دي.
جاري تحميل الاقتراحات...