اضغط ع الولد والبنت عشان يذاكروا كويس وعشان ياكلوا كويس وعشان يمارسوا رياضة وعشان يناموا بدري وعلشان مايقعدوش ع الكمبيوتر والموبايل اكتر من اللازم
اضغط عليهم عشان مصلحتهم وعلشان هم لسه مش عارفين مصلحتهم وانت دورك توجههم وتحميهم من نفسهم حتى لو اضطريت للشدة احيانا

اضغط عليه علشان تحس إنك أديت الأمانة وعملت اللي عليك وأديت رسالتك في الحياة
لكن
إوعى تضغط عليه في الصلاة ولا تضغط عليها في الحجاب وسيبهم لما يقتنعوا
سيب بنتك تمشي بشعرها او تلبس ضيق وتحط مكياج
وسيب ابنك تارك للصلاة
لحد ما يقتنع ويصلي ولحد ما تقتنع وتتحجب

إوعى لو قرر ما يذاكرش او ما يتعلمش تستسلم لرغباته
وإلا تبقى سلبي وفرطت في الأمانة
صحيه من عز النوم وفي عز البرد علشان يروح المدرسة او علشان يذاكر خصوصا ايام الامتحانات وشجعه وحفزه وقوله نتعب دلوقت علشان نرتاح قدام

لكن ساعة اذان الفجر سيبه نايم علشان صعبان عليك ومش هاين عليك تصحيه
البيوت الساعة الخامسة صباحا بتكون في حالة صمت تام وبعد ساعة بتدب فيها الحياة علشان معاد باص المدرسة قرب
ودا فارق كاشف وفاضح ومؤلم

الولد والبنت ماينفعش تقف تتفرج عليهم وهم بيضيعوا مستقبلهم في الدنيا ،، انما يضيعوا مستقبلهم في الآخرة عادي
مَا لَكُمْ لا تَرْجُونَ لِلَّهِ وَقَارًا
منقول عن دكتور هشام وجيه