ماتنتظروا رسائل الصباح من تلفوناتكم إنتظروها من كباية قهوة في ونسة مع عم محمد بتاع البوفيه الفي الدوام، من ونسة مع حاج كبير في المواصلات عن أيام زمان وسنين زمان، من تهنئة زميل في العمل لي نجاح في تفصيلة صغيرة في الشغل، من صوت ست الشاي الحنب الجامعة، من صوت أمك وهي بتستودعك ربنا

لحدي خشم الباب، من صوت قمرية صبحية بتردد أحمدوا ربكم، من شكر شخص لطيف لابس أبيض بقول ليك إتفضل إنت أول، من ضحكة وقفشة مع ست فول شايلة في ضهرها يتامى ولازالت بتقاوم، من تربيتة على ضهرك من أبوك وإنت طالع دوامك وبقول ليك ربنا يوفقك، من مسكة إيدين طفل وهو نائم وبتبوسو على عجل، من طلب

فول بي شطة ومخلل وزيت سمسم كارب، من صخبك وضحيجك البتصنعوا في هذا العالم ومحاولات خلق حيز وجودك، من إهتمامك لجعل من تحبه ملكاً وإذا تعصّى تتجاهله كأنه حفنة تراب، من الناس البهية البتاخد دور البطولة من أول مشهد أصحاب الحضور الطاغي والكلام السحري والمبدعين في إنسانيتهم بالفطرة، من

تجاوزك للناس المؤذيين في حياتك الباهتين عديمي الطعم واللون والرائحة البقودوك نحو الذبول لا الإشتعال والوصول، من تجاوزك للقاذورات الفكرية وتشبثك بالدين والعلم والتعلم، من الخطوط الخفية الواصلة بين السماء والأرض البتنجدك في أوقات ضعفك وكربك البتستنى فيها تدابير ربنا وبتنتظر الفرج🙌