#الفقراء.
#ابوضياء
#الاقتصاديون_العراقيون
اليوم حصلت كروة لحي الميلاد بالنجف وهي من الأحياء الفقيرة الي اغلبها كسبة مو موظفين بقى شغلي للظهر يم سوگ الميلاد.
الحمد لله والشكر شلت چم كروة من السوگ أوصل الي وصلتهم اغلبهم سالفته السوگ صاعد بالذات الخضرة والبقوليات واللحوم.

محد بيهم جاب طاري الفاكهة بشكل عام وهذا مبين من علاليگهم الي افتقدت للفواكه بشكل عام بل الكثير منهم لم يتابع بطولة أو يعلم بوجود حدث رياضي كخليجي ٢٥ في البصرة.
والكاسب الي بيهم سولف عن فتور بالعمل بسبب ارتفاع مواد البناء والمواد الأولية لأي صناعة متواضعة بسبب الدولار.

ذوله الكسبة مو أصدقاء عدنا بالفيس لأن أهتماماتهم بالحياة غير أهتماماتنا وأغلبهم دراسته بسيطة وثقافته متواضعة فصعبة يعبر عن شكواه بالفيس لو بمنصات التواصل الاجتماعي.
للأسف التواصل الاجتماعي صار يشكل الرأي العام ومكان تعتمده الحكومات وأصحاب القرار السياسي

بتنفيذ برامجها السياسية والخدمية فجعل المناطق الفقيرة تعيش بعزلة إو طبقة تحتية سياسيآ ومتأكد لو أكو أستطلاع رأي حقيقي للمناطق الفقيرة راح نلگه هذه الأحياء هي أكثر المناطق عزوفآ عن آخر ٣ أنتخابات بالبلد وفاقدة لثقتها بالنظام السياسي القائم.

تفتح الفيس راح تلگه الكل مهتم بخليجي ٢٥ والعراق عايش ببحبوحة من الرفاهية متناسيآ أنخفاض قيمة الدولار وتأثيرها المباشر على طبقة واسعة من العراقيين الكسبة وأصحاب العمل الذي يعتمد على الجهد العضلي.