انا هفضل مقتنعة تمامًا إن اللي بيحب حاجة بيوصلها مهما كان الطريق صعب.
كان في مرة شيخ بيحكي إن شاب جاله وهو بيعيط وبيقوله:
" ياشيخ قولي دعاء أفضل أكرره لحد ما ربنا يجعلها نصيبي "
فالشيخ قاله دعاء يقوله وبعد فترة البنت اتجوزت من حد تاني!

الشيخ حس إنه خذله في طلبه بس كان بيدعي للشاب ده إنه يرضى بقضاء ربنا.. لإن عياطه ووجعه كان مُتعب جدًا.
وبعد سنتين الشيخ كان بيصلي التراويح جنب واحد في رمضان وسمعه بيقول: " زي ما جوزتني البنت اللي بحبها يارب ارزقني منها ذرية صالحة "
الشيخ لف وبصله لقاه نفس الشاب فسلم عليه وقاله:

" ما قولتلك هتتجوز وتنساها؟ "
الشاب رد وقاله: " لا هي نفس البنت، أنا وثقت في ربنا وربنا رجعهالي، جوزها طلقها عشان مبتخلفش "
الشيخ عينه دمعت من رحمة ربنا فقاله: " انت كنت بتدعي ربنا بقلي عامل إزاي عشان يفرحك كدا؟ "

الشاب قاله: " كنت بدعيله بقلبي، كنت بروحله وأقوله أنا بحبك وانت مبتكسرش حد حبك "
الشيخ كان كل يوم يشوف الشاب ده بيدعي ربنا في المسجد بدموع وخشوع غريب جدًا، ويوم ليلة القدر طلع من المسجد آخر واحد وكأنه كان بينه وبين موعد جبر لقلبه،

ويوم العيد الصبح الشيخ لقى الشاب ده بيوزع ألعاب على الأطفال في الشارع ولما وقف قدامه بشره إن زوجته حامل!
في القلب أمنية وأنت رب المعجزات ❤🌻
#عزة_العمروسي
منقول