التعليم
تطوير الحياة المهنية
نمط الحياة
المجتمع
الأخبار المحلية
مبادرات المجتمع
قصص الإنسانية
المبادرات الاجتماعية
فيه #ملحمة عظيمة بتحصل مؤخراً في منطقة سيدي بشر في #الإسكندرية بطلها الراجل الجميل اللي في الصورة ده،
وما أخدتش حظها لا من المعرفة ولا من الإنتشار.. الأستاذ "محمود صبحي" الشهير بالأوني.. راجل مصري أصيل وإسكندراني جدع وصاحب صالون حلاقة..
وما أخدتش حظها لا من المعرفة ولا من الإنتشار.. الأستاذ "محمود صبحي" الشهير بالأوني.. راجل مصري أصيل وإسكندراني جدع وصاحب صالون حلاقة..
في ظل الظروف الصعبة اللي على الكل الراجل قرر من نفسه وبدون ما حد يطلب منه إنه يعمل مبادرة وسماها "حرفتك مستقبلك".. يعني إيه؟..
أنا راجل بعرف أحلق وعندي صالون حلاقة.. هخصص يوم في الأسبوع وهعلم في الصالون الحلاقة لأى حد عايز يتعلمها ببلاش.. والهدف؟.. إنه يطلع من تحت إيده ناس صنايعية شاطرين يقدروا باللي هيتعلموه يفتحوا محل أو يشتغلوا في أى مكان أو يلاقوا باب رزق.. بس كده؟.. لأ.. "محمود" قرر يوسع الموضوع..
اتفق مع جيرانه أصحاب محلات صيانة الموبايلات إنهم يعملوا زيه ويعلموا الناس الصيانة وخصص لهم يوم.. واتفق مع بنات شاطرين جيرانه في التطريز وتصليح الملابس إنهم يعلموا الحرفة لأى بنت أو سيدة عايزة وخصص لهم يوم.. واتفق مع نجارين، وغيرهم وغيرهم..
طب والمكان؟.. ده جزء تاني من جمال الحدوتة.. ليه؟.. لإن "محمود" في الأول راح يأجر قاعة في سنتر تعليمي عشان يدوا فيها الدورات دي.. صاحب السنتر لما عرف إن الموضوع خيري وببلاش وخدمي للناس قرر إنه ماياخدش فلوس..
شوية كمان واحد من الأباء المسؤولين عن كنيسة جنب بيته قال له تعالوا إدوا الدورات دي عندنا وهنوفرلكم قاعة.. شوية كمان مسؤول المسجد اللي ورا بيته طلب منه نفس الطلب تعالوا إدوا الدورات في المسجد.. وبقى فيه أكتر من مكان..
والنتيجة؟.. الموضوع كبر وشوية بشوية بقت سيرة "حرفتك مستقبلك" على لسان معظم الناس في سيدي بشر، وبسببها اتعلم ولسه بيتعلم ناس كتير..
أصلاً فكرة إن حد يكشف سر صنعته لحد تاني خصوصاً في الزمن الغريب ده بتخليك متأكد إن الدنيا لسه بخير وإن فيه ناس محترمة عارفة إن الرزق بإيد ربنا ومفيش حد هيخطف منك شيء مكتوبلك..
فيه جملة عظيمة بتقول "يا بخت اللي يفتح لغيره باب رزق".. ومتهيألي إن أهمية الجملة زادت أكتر خصوصاً في الأيام دي.. اللي بيوسعها على غيره ربنا بيوسعها عليه.. اللي بيعمله "محمود صبحي" شيء يستحق الإشادة.. شجعوا الناس الحلوة دي وسمعوهم كلمة حلوة.
By: Tamer Abou Ameen
By: Tamer Abou Ameen
جاري تحميل الاقتراحات...