قضيت اكتر من ٧سنين جوا معهد أورام مع أمي رحمة الله عليها، شوفت العجب العجاب فالرحلة دي، شوفت أم فقدت ابنها وماتت وراه علطول، شوفت أم تانيه ابنها مات ومعهاش تمن العربيه اللي هتروحه بيها، شوفت ابناء كتير وقفوا ساعات ساكتين من صدمة خبر وفاة أمهم/أبوهم، في وسط كل ده كنت مستني دوري..
شوفت بنات كانوا بطولهم مع أمهاتهم ماتوا ومش عارفين يتصلوا على مين، شوفت قلوب اتكسرت وحزن وقهرة في العيون ميتوصفش، كان هناك ممرضين خالعين قلوبهم حرفيًا ويبلغوا المرافق ان حالتك ماتت تعال اعمل تصريح خروج وخد حالتك واطلع بمنتهى البرود، دكاتره كانو في منتهى القسوة مش كلهم ولكن معظمهم
في حياتي كلها مش هنسى دكتورة هبة ناصف معهد أورام طنطا اللي كتبت لأمي ٦ جلسات كيماوي بالغلط وبعد ما أمي حبيبتي خلصتهم واتعرضنا تاني عليها ومحصلش اي تقدم استشارت دكتور تاني قالها انه مكنش ينفع تاخد النوع ده، هل في حد فالدنيا بيكتب لحالة مرحلة تالته ٦ جلسات كيماوي بالغلط؟
انا بعد الوفاة مقدرتش اقعد في بيتنا تاني من غيرها، في مصر عموما لان ماليش فالبلد دي غير ذكريات سيئة، سافرت بعدها بأسبوع، لما سافرت حسيت انه كان لازم أروح للدكتورة دي الأول بس الاوان كان فات وسافرت خلاص، بس هي مبتروحش عن بالي لحظة هي ساكنه عقلي وقلبي لحد اما أفهم
خلصت جيش في شهر ٣ اللي فات،واسوء ٦ شهور بعد ماخلصت كانو اللي بعد الجيش، كنا فالأسبوع حرفيا ٣/٤ ايام فالمعهد، كل مره كان الهيموجلوبين تكون نسبته قليله ونحتاج دم وأمي كانت فصيلتها o سالب كنت بجري بين المحافظات عشان اجيب كيس او اتنين كل أسبوع، لو كان بإيدي كنت اديتها من عافيتي وصحتي
لو عندك حالة كانسر عزيزة عليك، اتشيك عليها كل اسبوع تحاليل واشاعات وتابع عند اكتر من دكتور، وأعرف حقيقة تشخيص الحالة عشان تعرف تتصرف، كتير من الناس بتخاف تعرف، بس أنت لازم تعرف وتفهم عشان تقدر تعمل حاجة، ولو مفيش تقدم أعرف ان فيه حاجة ماشية غلط، كله طبعا بإيد ربنا بس خد بالأسباب.
جاري تحميل الاقتراحات...