ثريد صغير كدا عن ملحنين وفنانين ماتو صغيرين فالسن بس من كتر اعمالهم اللي لسا عايشه لحد دلوقتي عمرك ما هتتخيل ابدًا انهم ماتو فالسن الصغير دا وطبعًا البدايه مع العظيم فنان الشعب سيد درويش (١٨٩٢-١٩٢٣)مجدد وباعث الموسيقي المصريه اللي مات ف سن ٣١ سنه وساب وراه اعمال لاتعد
سيد درويش ساب الحان فلكلوريه بتتقال لحد دلوقتي وغير من شكل المزيكا اللي كان بيعتمد علي الطرب وبس لاغاني الناس تغنيها ماهو متسماش فنان الشعب من شويه ؛وفالڤيديو هنا واحده من اكتر الحانه عبقريه وهو طلعت يا محلا نورها اللي كان بيغنوها الفلاحين وهما طالعين شغلهم
من مصر نروح لسالسبورج فالنمسا اللي اتولد فيها ولفجانج اماديوس موتسارت (١٧٥٦-١٧٩١)اكتر موسيقي عبقري وموهوب فالتاريخ كله كان ممكن يلحن وهو نايم حرفيًا ومات صغير جدًا ف سن ال ٣٥ سنه والڤيديو دا فيه واحده من اشهر مؤلفاته واسمها Turkish march
ودا واحد من اكتر اعمال موتسارت عبقريه وجمال الحقيقه وانا بحبها حب مش طبيعي وفيها عبقريه مقولكش يعني
ونرجع تاني لمصر والمرادي مع بليغ حمدي(١٩٣٢-١٩٩٣) اللي لحن اكتر من ١٥٠٠ لحن وهو مات عنده ٦٠ سنه؛ تحس انه عاش ٦٠ قرن من الزمن مش ٦٠ سنه وساب وراه الحان هتعيش وهتعيش لقرون جايه
ونروح لالمانيا اللي اتولد فيها واحد من علامات الموسيقي الكلاسيكيه وهو بيتهوڤين(١٧٧٠-١٨٢٧) مات عنده ٥٦ سنه بس برضو اعماله لا تدل ابدًا انه عاش ٥٦ سنه بس ودا واحد من اشهر اعماله وهي السمفونيه الخامسه العظيمه
شوبرت (١٧٩٧-١٨٢٨) مات وهو ف عمر ٣١ سنه ب حمي التيفود ولكنه كان من كبار المؤثرين ف تاريخ الموسيقي الكلاسيكيه وفالڤيديو هنا serenade واحده من اشهر مؤلفات شوبرت
ونروح ل روسيا مع بيتر إليتش تشايكوفسكي(١٨٤٠ -١٨٩٣) عاش ٥٣ سنه وقدم فيهم لحنين من اشهر الالحان وهما بحيرة البجع swan lake وهي اللي شغاله فالڤيديو دا وهي عظيمه بكل ما تحمل الكلمه من معني وكسارة البندق The nutcracker
ونرجع تاني لمصر مع عبد الحليم حافظ ( ١٩٢٩-١٩٧٧) ف عمر ٤٧ سنه وقدم خلالهم اجمل الاغاني اللي هتفضل محفوره ف ذاكرة الناس لاجيال كتير اوي جايه
مات حليم ف سن ٤٧ سنه بعد ما كان مسافر سنة ٧٧ ف رحله علاجيه عاديه ل لندن بسرعه وجاي بس سافر من غير وداع ورجع لمصر ف نعش
محمد فوزي (١٩١٨-١٩٦٦) اكثر الملحنين المصريين عبقريه وحداثه ودايمًا سابق عصره مات ف عمر ٤٨ سنه بسبب مرض نادر فالعظام خلاه ميقدرش يصمد فالحياه كتير وفالڤيديو دا واحد من اكثر الحانه عبقريه لحن اغنية "طير بينا يا قلبي "
انا بعتبر لحن ماما زمانها جايه ل فوزي هو اكثر الحانه سابقه لعصرها يكفي ان الاطفال اللي هتبقي مواليد سنه ٣٠٦٦ هتفضل تغني ماما زمانها جايه حتي بعد الف سنه من وفاة فوزي واضع اللحن
جاري تحميل الاقتراحات...