التعليم
التكنولوجيا
تطوير الحياة المهنية
علوم الكمبيوتر
نصائح الحياة المهنية
هندسة البرمجيات
حل المشكلات
أجهز نفسي إزاي لإنترڤيو بروبلم سولڤنج؟ كبايتك وحاجة تشربها عشان مش عارف هكتب قد إيه، اللي هقوله هيبقى بُناءً على خبرتي وآرائي لو حد حابب يضيف حاجة يتفضل مشكورًا، يلا بينا؟
أولًا، المفروض أذاكر إيه؟ عندك نوعين من المسائل، حاجات بتحتاج توبيكس زي الجراف عشان تحلها وحاجات بتبقى محتاج إن دماغك تبقى بتفكر بطريقة صح وكويسة، والمفروض تذاكر الإتنين وتبتدي بالحاجات اللي مش محتاجة توبيكس واللي بيبقى إسمها Adhocs، زي مسائل الarrays والgreedy والbs إلخ
فايدة إنّي أبتدي بالنوع ده إنّي بأسس دماغي إنّي أفكر بطريقة صح وممنهجة لإزاي أنا بتعامل مع المسألة اللي قدامي، مينفعش تبقى بتذاكر توبيك معين وأنت بتـstruggle مع مسائل كل اللي محتاجه فيها إنّك تفكر صح وتجيب الحل بنفسك
لو نطيت خطوة زي دي فأنت هتعاني جدًا مع التوبيكس عشان تفهمها وتحل عليها، غير أن مش كل المسائل اللي بتيجي في الإنترڤيوز بتبقى عبارة عن توبيكس، طب بالنسبة للتوبيكس أذاكر إيه؟ اللي باخد بالي منّه عادةً أن التوبيكس اللي ممكن تيجي بتبقى dp - graph - data structures، ميمنعش أن الحاجات
التانية ممكن تيجي برده بس مش بنفس الحاجات الشائعة دي، ممكن مثلًا تلاقي مسائل strings أو bit masking بنسبة أقل شوية، وفي حركة لطيفة أن الحاجات الadvanced ممكن متذاكرهاش أوي بس تتعلم الconcepts بتاعتها أو أفكارها، زي الsegment tree والsparse table، etc..
فايدة ده أن ممكن تكون في إنترڤيو بتحل مسألة وماشي كويس وبتحل صح وهو بيصعب المسألة كل شوية، ف إدالك variation محتاج أدڤانسد توبيك وفي الحالة دي ممكن تقولّه إنّك هتستعمل توبيك معين بس متعرفش الimplementation بتاعه، كلّها حاجات بسيطة بس بتديك credits عند الإنترڤيور، في التوبيكس
اللي هتذاكرها هتبقى محتاج تذاكر الbasics فيها، مش متذكرهم أوي دلوقتي فهبقى أجمعهم وأقول عليهم في وقت تاني إن شاء الله، أذاكر إزاي بقى؟ في حاجتين هتعملهم وتبدل ما بينهم، إنّك تحل مسائل عشوائية متعرفش المسألة دي عن إيه، وإنّك تمسك توبيك تذاكره وتحل عليه، ليه الإتنين؟
كدا كدا عشان تبقى كويس في توبيك لازم تخصصله وقت وتذاكره هو بس وتفهمه وتحل عليه، بس ما بين مذاكرة التوبيكس لازم تحل عشوائي شوية، لما تفضل تذاكر توبيك كتير أوي هتيجي بعد كدا في أي مسألة تقابلك ممكن تأوفر ثينك المسألة وتحاول تحلها بالتوبيك اللي أنت لسه مذاكره،
فده هيساعدك تتعلم تختار وتوصل للتوبيك الصح للمسألة وهي أصلًا محتاجة توبيك ولا لأ، طب أنا دلوقتي هذاكر توبيك معين أذاكره إزاي؟ أنا همسك حاجة هجيب الريسورسز بتاعتها وأذاكرها، وبعدين هبتدي أحل عليها، هبتدي بالeasy ولما أحس نفسي بقيت كويس فيه هخش على الmedium وده بيبقى عادةً كفاية،
طب إمتى أحس إنّي كويس؟ لما تحس ان الحاجة اللي أنت بتحل عليها دلوقتي بالمستوى اللي أنت بتحل فيه دلوقتي هي الcomfort zone بتاعك، مسكت توبيك جديد وذاكرته وبدأت أحل عليه وبدأت بالeasy، المسألة في الأول كانت بتاخد منّي 4 ساعات ومش بعرف أحلها لوحدي ولازم أسأل حد أو أشوف توتوريال،
بعدها بحبّة بدأ الوقت ده يقل ومعظم المسائل بحلها لوحدي من غير مساعدة، مع الوقت هتبتدي تحس إن أنت نادرًا لمّا بتلاقي مسألة تقف معاك وأن لو أنت فضلت تحل في المستوى ده أنت مش هتتطور، ساعتها ده بيبقى الكومفورت زون بتاعك ومحتاج تطلع منّه عشان تتطور،
لما تنط عالمستوى اللي بعده هيحصلك نفس اللي حصل في الeasy، بتاخد وقت وبتحتاج مساعدة في الأول ومع الوقت بيبقى هو الcomfort zone بتاعك تاني، الprocess دي مش سهلة وبتحتاج ثبات وإنضباط نفسي عشان تعرف تكمل ومتخليش حاجة تحبطك، أول زقّة بتبقى رخمة شوية ولما الدنيا بتحلو هتبتدي
تحس بالإستمتاع وأنت بتحل، طب codeforces ولا leetcode؟ leetcode المسائل فيه نفس ستايل الإنترڤيوز ومتقسم تقسيمة حلوة جدًا من ناحية الtags والdifficulties، والمسائل فيه حلوة، كودفورسز مش أحسن حاجة لو أنت عايز تجهز نفسك لinterviews
اللي فاضل ان أنت تحط تايملاين لنفسك، المعطيات كتير وأنت اللي عارفها كلها، بتجهز نفسك لإنترڤيو أنت عارف معاده قريب ولا بتجهز نفسك من بدري؟ إيه الknowledge بتاعتك لحد دلوقتي؟ هل أنت محتاج تذاكر كل التوبيكس من الأول ولا في حاجات أنت عارفها وحليت عليها قبل كدا ومحتاج تفكر نفسك بيها؟
على أساسها بتحط لنفسك أنت هتبتدي بتوبيكس إيه وهتخصص الratio بتاعة الوقت إزاي ما بين التوبيكس، ومتنسوش تحلّوا عشوائي في النُص عشان دماغكم متركزش على توبيك معين بزيادة، وممكن تشوف حد خبرته أكتر منّك شوية وتعرض عليه أنت واصل لفين وهو يساعدك إنّك تحط تايملاين،
متخلوش حاجة تحبطكم عشان أنتوا كدا كدا قدّها، لو حسيتوا أن الموضوع صعب صبروا نفسكم ان لازم عشان توصلوا تتعبوا شوية في الاول وبعدين هتلاقوا الفايدة بعدين، ممكن لو بتجهوا نفسكم لإنترڤيو لشركة معينة تحاولوا توصلوا لمستوى المسائل فيها عامل إزاي، عادةً بتبقى حاجات
ما بين easy و medium بس لا ضرر من إنّك تسأل وتتأكد بنفسك، ده اللي في دماغي دلوقتي، بناءً على خِبرة بسيطة وتجارب مش أكتر، دُمُتم بوِد يا أصدقائي ♥️♥️
جاري تحميل الاقتراحات...