بعض الأشخاص يرحلون في هدوء! عم عاشور كان واحد منهم.. حارس عقار بسيط، كلامه قليل.. عُمره ما طلب مساعدة ولا استغل فقره في الشحاتة من السكان، رغم انه كان محتاج! عزيز النفس، بيجتهد في شغله، يحرس العمارة، يجيب طلبات السكان ويمسح العربيات فجر كل يوم!كان بيتحمل إهانة بعض السكان بصدر رحب
الناس اللي زي عاشور، بيعيشوا ويموتوا في هدوء.. يجروا بيه عشان يلحقوا يصلوا عليه في الجامع، ويسافروا بيه على بلد بعيدة عشان يدفنوه.. كل اللي بيحضر جنازته هم ١٠ أو ١٥ نفر منهم عياله وكام واحد من الشارع،صاحب الكشك وبتاع الشاي..لكن أنا حبيت أعمله نعي،عشان شايف ان حياته تستحق التكريم
جالي من كام شهر وخبط على زجاج السيارة، كان بيترعش ووزنه ناقص النص، كان بقالي كتير مش بشوفه في الشارع، بحكم انه ماسك عمارة تانية، كنت ساعات أقعد أيام ما أقابلوش، بس عارف انه راجل في حاله.. صباح الخير يا بيه.. محتاج ١٢٠ جنيه أجيب بيهم علاج! كان أول مرة يطلب حاجة..
نزلت وسمعت منه.. وقعة شديدة من ارتفاع عالي عملتله مشكلة في ظهره.. حجزتله عند دكتور، ومشي على علاج وقابلته بعدها ولقيته أحسن من الأول بكتير.. بس قلتله إني هاخده لدكتور تاني معرفة، عشان نطمئن ان حالته مش محتاجة جراحة.. لكن الميعاد كان بعد أسبوع، وميعاده جه قبل الميعاد!
جاله مرسال في الفجر.. صحاه من النوم و أخده من إيده من غير ما يصحي حد.. طلع معاه و قاله إبسط يا عم عاشور، ربنا استجاب لدعاءك.. معايا ليك جناحات كبيرة تشيلك وتطير بيك فوق السحاب.. هناك مش هتتألم تاني.. هناك القلوب والأعمال والنوايا هي اللي بتحدد الغني من الفقير..
إلبس جناحاتك ورفرف على أد ما تقدر.. ما تبصش وراك ولا تبص تحت.. طير وانسى كل همومك و وجعك.. رحلتك هنا انتهت! صحينا على صوت العصافير بتغني.. وبعدها سمعنا صوت بكاء.. وعرفنا ان عم عاشور خف من الوجع وطار بعيد لمكان أفضل! وداعاً يا راجل يا طيب!
جاري تحميل الاقتراحات...