من كام أسبوع كانت ماشي في الشارع مهموم، وكنت عمال أفكر لدرجة إني مكنتش واخد بالي أنا ماشي فين بالظبط، المهم إني كنت مشغول بحاجة بقالها فترة طويلة مزعلاني، والشيطان وسوسلي أبص لغيري عشان أحس إني قليل فعلًا؛ رغم إني الحمدلله أكتر إنسان قنوع ممكن تقابله وتتعامل معاه
..

بس وقتها فعلًا الشيطان اتمكن مني، وبدأت أسأل ليه يارب أنا الوحيد اللي الدنيا واقفة معاه كدة؟ أنا مش إنسان وحش عشان يحصلي كل ده، نازل من الرصيف في عربية بتخرج وأنا ماشي مش واخد بالي، وفجأة سمعت صوت خبطة شديدة، الخبطة دي كانت في دراعي، وأنا بفادي العربية في موتسيكل خبطني

كان أبويا دايمًا بيقولي إن اللي بيعمل حادثة أو يتخبط خبطة شديدة روحه بتتسحب لحظتها ومبيحسش بحاجة، وده فعلًا اللي حصل، محستش غير وأنا بفوق على الخبطة، ماشي طول الطريق مش شايف حاجة غير شوية سواد قدام عيني مش راضيين يسيبوني في حالي

رجعت البيت، الحمدلله كانت مجرد كدمة مش أكتر، ساعة بالظبط وحصلت حاجة لا على البال ولا على الخاطر في شغلي، فايدة والحمدلله مكنتش حاسبها ولا متوقعها، وقتها حمدت ربنا لإنه أراد بالموقف ده يعلمني إني ممكن في لحظة ممشيش على رجلي تاني،

وممكن الواحد يكون في ايده نعم مبياخدش باله منها غير لما يخسرها، وكل حاجة ليها وقتها بمشيئة ربنا وبس