مؤخرا سمعت تحقيق 8 حلقات عاملاه الwall street journal عن صناعة البورن ، الحقيقة أنا عارف إن البورن ليه مساهمات كتير فى قطاع السوفتوير بس دى كانت أول مرة أفهم تاريخ الصناعة وبلاويها وعلاقتها بالإنترنت وأربط الحاجات ببعض. ثريد طويل جدا بس هتتبسطو.
تعالو نبدأ بحقوق الملكية ، سنة 1987 فى أمريكا فى راجل شاف إن فى منتديات عالبتاع اللى إسمه الإنترنت دة بس مفيش حاجة عليها صور ومحتوى إباحى ، فقرر يبدأ بيزنس مع مراته عبارة عن منتدى إسمه Rusty and Eddie الناس ترفع عليه صور ومحتوى إباحى
عشان تشترك فى المنتدى كان لازم تدفع فلوس بس احنا فى التمنينات ومفيش طرق دفع عالإنترنت أصلا ، فالراجل كان بيخلى الناس تبعتله شيكات فى البريد وبعد ما يصرفها يفتحلهم الحساب عالموقع. المنتدى كبر ووصل ل14000 كل واحد بيدفع اشتراك 89 دولار فى السنة
إ Eddie كان خايف من حاجة واحدة ، مجلة Playboy. فى الفترة دى مكنش حد عارف هو اللى عالإنترنت دة بيخضع لقانون الملكية الفكرة ولا لأ بس عشان يأمن نفسه قال لإبنه يفحص المحتوى اللى الناس بترفعه عالموقع قبل ما يتقبل ولو لقى حاجة لبلاى بوى يرفضها. مكنش يعرف إن دة اللى هيوقعه فى شر أعماله
حصل المتوقع ، سنة 1993 وفى يوم وليلة إيدى لقى الFBI عنده فى البيت وهو فى فرح إبنه وأخدو كل الهاردات اللى مشغلة الموقع ... قعدو يفتشو فيها لقو كام صورة لPlayboy إبنه مخدش باله منهم وهو بيفلتر.
بلايبوى رفعو عليه قضية بسبب الكام صورة الFBI لاقاهم. إيدى جادل إن المحتوى دة مش بتاعى دة الناس هى اللى رافعاه أنا مجرد وسيط ، بس المحكمة قالتله إنت خليت حد يراجع المحتوى وبمجرد إنك عملت كدة إنت بقيت مسئول عن إيه اللى بيعدى وإيه اللى لأ وبالتالى إنت وافقت إن الحاجات دى تبقى موجودة
المحكمة حكمت لصالح بلاى بوى وبكدة دة كان أول حكم ينشئ مسئولية حقوق الملكية عالإنترنت وإن صاحب المحتوى الأصلى له الحق يقاضى أصحاب المواقع اللى بتنشر المحتوى. الحكم دة هوة اللى تم الجدال بيه بعدها ب 10 سنين لما شركات المزيكا قاضت أشهر خدمة أغانى عالنت Napster وبردو اتحكم لهم
نسيب الملكية الفكرية ونروح للشراء أونلاين والlive streaming ، سنة 1995 كان فى طالبة بتدرس كمبيوتر ساينس فى جامعة نيويورك إسمها مادلين ، مادلين شافت إن فى فرصة فى نقل تجربة الدعارة المنتشرة فى نيويورك لكل أمريكا عن طريق الإنترنت فقررت تطلق موقع إسمه babes4u
الموقع فكرته إن بائعات الهوى بيعرضو عليه خدمات إنهم يقلعو قدام الكاميرا مقابل إن الزباين يدفعو حسب المدة اللى هيتواصلو فيها مع البنات وعشان تقنع البنات إنها تسجل قررت إنها تكون أول واحدة بتقلع قدام الكاميرا وفعلا عرضت خدماتها عالموقع.
موقع babes4u كان ثورى لسببين: 1) كان أول تطبيق للايف ستريمنج عالإنترنت لدرجة إن فى ناس كانو بيكلموها عشان تساعدهم فى السوفت وير مش عشان عايزينها تقلع. 2) كان من أوائل المواقع الناس وثقت إنها تدخل بطاقاتها الإئتمانية عليها دة غير إن فكرة تدفع على قد الإستخدام بالدقايق كانت جديدة
كل اللى فات دة حاجات صغيرة لكن لحظة البورن الحقيقية بدأت فى 2008...
كان فى مبرمج ألمانى إسمه فابيان تيلمان عمل سوفتوير affiliate marketing للمواقع عشان يعلنو عند بعض والسوفتوير دة بدأ ينتشر. فابيان لاحظ إن فى فئة مواقع بيجيلها ترافيك بالهبل وعمال يكبر ... لما بص أكتر لقى إنها مواقع نشر الفيديوهات الإباحية
خلو بالكو إن يوتيوب بدأ فى 2005 ، ف 2008 دى كان يويتوب بقاله 3 سنين وزى كل صناعات الميديا منتجين البورن كانو لسة بينتجو سيديهات وفى الآخرالناس تقرصن الفيديوهات وتنشرها عالمواقع دى عشان الناس التانية تتفرج عليها زى اللى حصل فى الأفلام والأغانى فى نفس الفترة
فابيان عجبته القصة وقال ليه لأ ، فقرر يشترى أول موقع بورن من ناس صحابه ودة فتح شهيته أكتر فقعد يشترى مواقع تانية صغيرة لحد ما عينه جت على موقع عليه ترافيك كيير ، إتصل بمقر الشركة رد عليه الولد اللى معينه صاحب الموقع عشان يرد عالتليفونات
فابيان قاله أنا عايز أشتريكم بأى تمن ، الولد راح لصاحب الموقع قاله فى واحد عالتليفون بيسأل لو هتبيع بأى تمن تبيع بكام؟ قاله 35 مليون ... رجع للتليفون وقال لفابيان 35 مليون دولار ، قاله ماشى.
الموقع دة كان XTube ... ودة كان أول موقع عليه ترافيك كبير عالميا يشتريه فابيان ورغم إنه مكنش معاه تمن الموقع قدر يلاقى تمويل إنه يشتريه
فابيان زى أى ألمانى أو بايرن ميونيخ مبيتهدش ، سنة 2010 تواصل معاه اتنين صحاب عملو موقع بورن وكانو من أول ناس عرفت تبيع إعلانات عالبورن اللى الناس ببتفرج عليه ببلاش. قدرو يقنعو الستوديوهات إنهم يعلنو للناس تشترى محتواهم البريميام وكانو بيعملو هوامش ربح خزعبلية
مشكلة الموقع دة إنه كان غالى جدا ، أصحابه كانو عايزين 100 مليون دولار عشان يبيعو وفابيان مكانش معاه المبلغ دة فقعد يدور على حد يموله ، الموضوع أخد وقت لأن محدش كان عايز يربط إسمه بالبورن وكل المستثمرين رفضوه لحد ما واحد فى أمريكا اقتنع
اللى اقتنع دة لما شاف الأرباح قاله 100 مليون دى قليلة ، اعمل wishlist بكل الحاجات اللى نفسك تشتريها ، وفعلا فى الآخر بدل ما يمولوه ب 100 مليون مولوه ب 362 مليون وفابيان اشترى الموقع ومواقع تانية وكمل جنونة الشرا. الموقع دة كان بورن هاب Pornhub!
بعدها بشوية فابيان تم اتهامه بالتهرب بالضرايب ومع الوقت المستثمرين بدأو يحسو إنه بقى مسئولية ووجودة مضر فبعد مفاوضات فابيان باع حصته للمستثمرين وجابو مكانه غريمه التقليدى برنارد.
برنارد دة كان واحد نمساوى شغال فى بنك جولدمان ساكس ، بعد فترة ساب البنك وبقى شغال مدير مالى لبعض الأثرياء فى النمسا. فى وقت ما اتعرض عليه موقع بورن من واحد كان عمله وعايز يتوب ويتخلص منه ، فعرض برنارد إنه يشتريه ب5 مليون دولار. الموقع دة كان RedTube
برنارد أكبر deal خسره قصاد فابيان كان PornHub ولكن تشاء الظروف إن بعدها بكام سنة المستثمرين اللى مع فابيان يكلمو برنارد عشان يمسك المجموعة ويندمجو وبكدة RedTube بقى كمان جزء من مجموعة PornHub وبرنارد كان ساعتها بيغنى دة اللى كان نفسى فيه لو تيجى فرصة تجمعنى بيه
الدنيا فضلت شغالة والمواقع تكبر لحد 2020. النيويورك تايمز نشرت تحقيق عن كمية فيديوهات ال revenge porn الي على بورن هاب وازاي إنه مش بيشيلها. الrevenge porn ببساطة هو إن الإكس ينشر النودز اللى إنتى كنتى باعتاهاله عشان ينتقم منك. طبعا الموضوع دة كارثة وفى ناس ممكن تنتحر بسببه
المقالة دي حركت ماستركارد وڤيزا وخلتهم وقفو التعامل مع بورن هاب. في ليلة الموقع مبقاش عارف ياخد أي فلوس وعشان فيزا وماستر يرضو يرجعوه الموقع مسح ٩ مليون فيديو! ودة ياخدنا ل مين اللى بيحط قواعد البورن...
الوول ستريت جورنال اكتشفو من الكلام مع الممثلات إن فى حاجات مسموحة وحاجات ممنوعة: علي سبيل المثال ممنوع ممثلة البورن يبان في الفيديو إن عندها البيريود أو إن يبان أي حيوانات في الفيديو حتي لو ملهمش علاقة بالمشهد. لحد 2016 الفيديوهات اللى كان فيها تبول كانت ممنوعة بعدها بقت مسموحة
مين البابا اللى بيحط القواعد دى؟ لحد وقت قريب مكنش حد عارف ... مع الوقت اتضح إن البابا هما اللى بيسمحو للمواقع ياخدو فلوس: فيزا وماستركارد وشركائهم
فيزا وماستركارد بيحطو قواعد عامة لإيه المسموح وإيه اللى مش مسموح عند المواقع اللى بتبقبل كروتهم ، البورن موضوع حساس لأن من ناحية هما مش عايزين يلبسو فكرة إن هما اللى بيحطو القواعد ومن الناحية التانية هما عايزين يحمو نفسهم إنهم يبقو بيسهلو حاجات زى البورن الإنتقامى
عشان يحلو المعضلة دى قررو إنهم هيطلعو بقواعد عامة كدة شبه القانون ، واللايحة التنفيذية للقانون سابوها لشركائهم اللى مواقع البورن بتشترك معاهم عشان يقبلو فيزا وماستر. عشان نفهم شوية مواقع الإنترنت مش بتكلم فيزا وماستر مباشرة ، بيكلمو شريك لهم زى فورى كدة والشريك هو اللى بيكلم فيزا
فالنتيجة للموضوع دة إن شركاء فيزا وماستركارد اللى بيقبلو مواقع البورن بيعملو دليل مفصل فيه إيه نوعية الفيديوهات المسموحة وإيه اللى لأ ، فمثلا هما اللى بيقولو مينفعش فيديو البورن يبقى فيه حد شكله نايم حتى لو تمثيل لأن دة هيغضب فيزا وماستركارد والمواقع لازم تلتزم بدة
مشكلة البورن إنك كل ما تبقى اكستريم أكتر كل ما يجيلك ترافيك أكبر وفكرة إن شركاء فيزا هما اللى يحددو إيه اللى ينفع وإيه لأ معجبتش أكبر شركة بورن فى العالم من حيث الترافيك ، الشركة اللى بتمتلك XVideos وXNXX. الموقعين دول من أكتر 10 مواقع بتتزار عالإنترنت.
الشركة دى مقرها التشيك ومحدش يعرف عنها حاجة ، بيشتغلو فى سرية شديدة بس المعروف إن المالك واحد فرنسى والشخص دة لما معجبتوش قواعد شركاء فيزا وماستر قرر يبقى هو الشريك المباشر لفيزا وماستر payment processor ويفسر هو قوانينهم بنفسه.
بمعنى آخر الراجل دة خد تصريح إن شركته بتاعة البورن تبقى كمان بتقدم خدمات مالية وعدى بكل الشروط والشهادات المطلوبة عشان شركة تقدر تقبل بطاقات ائتمان مباشرة مع فيزا وماستر بدون وسيط وبكدة بقى هو اللى بيفسر قوانينهم لنفسه وعلى هذا الأساس يقدر يعمل فيديوهات اكستريم أكتر من منافسيه.
جدير بالذكر إن حتى OnlyFans مؤسسينه فى وقت ما اتزنقو بسبب إن مكنش عندهم علاقات مع شركات الدفع اللى بتقبل البورن واضطرو يبيعو الموقع لحد فاهم وعنده العلاقات دى وعشان كدة فى وقت ما حصل تخبط وقالو هنشيل البورن وبعدين رجعوه
بصراحة التحقيق بتاع الوول ستريت جورنال كان ممتع وكانو مستضيفين ناس بعينهم زى مثلا فابيان تيلمان اتكلم بنفسه عن القصة وعن برنارد ، أنا بدأت أول حلقة فى يوم وأنا راجع من الجيم فضلت أتمشى 7 ساعات لحد ما خلصتهم كلهم. التحقيق مجانى ومتاح على كل المنصات pushkin.fm
جاري تحميل الاقتراحات...