هقول كلمتين ودول عمومًا مش محتاجين تخصص في مجال بشكل إحترافي .. كده كده أنا مش فارق معايا غير إني أبقى مقتنع باللي قايله .. إتربيت على مبدأ العيش على الحلوة والمرة مع الأصيل .. الدولة طول السنين اللي فاتت عملت أمور عظيمة في مجالات كتير برغم الظروف الصعبة .. وبجدد ثقتي مرة تانية
الفترة اللي فاتت علمتني إن أي خطوة لحل مشكلة معقدة لازم تكون ليها عوارض جانبية معاها في الأول .. مكافحة الإرهاب ونجاحنا في ردعه كان له ضريبة إتدفعت من الغوالي .. علشان نبني بنية أساسية جديدة كلفنا وصرفنا علشان إقتصادنا يوصل إنه على الأقل بيقاوم الظروف الخارجية اللي بتحصل حاليًا .
مش هحتاج أبرر ولاأشرح لأن ده ممكن أي حد متخصص يعمله . أنا بكتب رأيي الشخصي هنا في حال إن حد حب يطلع عليه ويعرف أنا بفكر في إيه في الوقت ده . محافظ البنك المركزي متذكر له كل الخير قبل مايمشي إنه قال إن التضخم بنستورده من الخارج أصلاً . وإحنا علشان نعتبر في وسط حالة بناء فبنتأثر
فيه فرق لما أحرر سعر صرف عملتي علشان أعدي مشكلة مكنتش سبب فيها علشان أعرف أكمل شغلي . وبين دول تانية عملتها إتأثرت لأن مواقفها كانت فاشلة داخليًا . منور يابايدن . منور ياإردوجان . منور يا ... هو الجديد بتاع بريطانيا ده إسمه إيه؟ مكسل إسمه أجيب من جوجل .. ماعلينا ، مش موضوعي ده 😅
موضوعي الأساسي اللي أنا بتكلم فيه .. حاليًا المتخصصين في مجال الإقتصاد بعد ماخلصوا المؤتمر الإقتصادي إتخذوا قرارات .. القرارات دي هما شايفين إنها الأسلوب الأنسب للتعامل مع الوضع الحالي .. والسيد رئيس الجمهورية مشكورًا أصدر قرارات حماية كويسة للفئات اللي هتحتاج دعم حقيقي للمستقبل
وضعت ثقتي قبل كده في الإدارة دي في مواقف كتير ولمست نجاحات فيها تخليني أستمر في موقفي ده .. وكل التشكيكات من الأكاونتات اللي حافظة كلمتين وخلاص وموقف يوديها وموقف يجيبها دي .. ماتلزمنيش ، أنا عمومًا كده كده متضرر بطبيعة الحال .. زي اللي بيصرف فلوس على علاج مكلف بس نتيجته شفاء
وقت كوفيد (اللي بالمناسبة لسه برضه بلبس الكمامة) خدنا كمية سف على إقتصادنا وعلى منظومتنا الطبية .. لحد مااللي سفوا علينا سفوا التراب من سكوتهم لما إقتصادنا سجل نمو في ظل إن العالم كان بينحدر .. ومنظومتنا الصحية في اللقاحات أثبتت جدارتها .. وكالعادة محدش بيقول شكرًا .. بس مش مهم
الفكرة إن دلوقتي اللي عايز يقول حاجة يقولها .. بس خلينا نتفق إن أي حلول لمشاكلنا ملهاش غير طريق واحد .. إن الدولة مع الشعب يكونوا سوا في طريق الحل .. فأي إخلال بالإتفاقية دي هتخلي النتيجة عكسية على الكل .. يعني اللي يضحك عليكم ويقول لكم ثورة .. بوضوح كده هتبقى ضرر أكتر مليون مرة
أصلها مش كيمياء .. يناير 2011 طلعت لنا ناتج .. يسار فوضوي وجماعة متطرفة .. الإثنين وصلوا للسلطة وكمان كانوا عايزين ياخدوا المعارضة على حساب الشعب نفسه والبلد كانت هتروح في سكة ضياع حرفيًا .. فكل الموال ده . الحمد لله ربنا نجدنا منه في 30 يونيو .. وخدنا الطريق الخاص بالحل الحقيقي
دلوقتي الدولة مش فاضية تقول شعارات .. هي بتتعامل لمواجهة أزمات متراكمة وتضخم عالمي كان باين من الأول ودلوقتي فيه حروب شغالة ولسه اللي جاي أسخن .. وعلشان محدش بيشوف الكويس إلا بالصدفة .. جدير بالذكر قصاد إن عملتنا إتحرر سعر صرفها .. صادراتنا إرتفعت لمستويات أعلى ودخل القناة برضه
عمليًا علشان يبقى عندنا فكرة .. بره الوضع عندهم أصعب بكتير .. هما بس علشان مادخلوش حروب ولاعاصروا تغيرات سياسية (أو بمعنى أصح .. مخابراتهم دعمت أعداءنا علشان ينشروا الفوضى ويزرعوا الجماعات الإرهابية) فجربوا الإستقرار فترة .. وكان عندهم ثقافة البناء والدعم .. مش التنظير وخلاص
بس عمومًا مشيوا في طريق العناد اللي بيخسرهم كل يوم مع دخول الشتاء .. فداخليًا هيجربوا اللي إحنا جربناه بشكل مختلف .. وده هيأثر على شكل المنطقة .. المهم إحنا هنا داخليًا نركز على أمورنا ونحاول نتعامل مع كل موقف على قد مانقدر بحكمة .. ده الحل الوحيد علشان ربنا يوفقنا ونعدي التحدي
تذكير أخير .. أي دعوات للفوضى دي بتساوي ضياع مستقبل للأغلب (إن مكانش للكل) .. لأن المرة دي هنبقى ملقف لكل جهة معادية سواء كانت تافهة أو خطيرة .. وفيه دول ضاعت بسبب خطوة زي دي وكفى بالمرء يشوف بعينيه .. فعلى كل حال .. أنا قلت اللي أعتقد إنه مفيد إنه يتقال الفترة دي .. وهختم بنقطة
ده موقفي الشخصي .. وكده كده عارف إن الأخذ بالأسباب مجرد وسيلة .. ربنا هو اللي بيوفق وبيستر وبيكرم برحمته .. وتاني ، أنا مع الدولة والمتخصصين في مجالات الإقتصاد في تحركاتهم للتعامل مع التحدي اللي بنخوضه .. وده موقفي وبقوله على الملأ . وأنا مش ناكر الجميل . مع مصر على الحلوة والمرة
جاري تحميل الاقتراحات...