"حاول تفتكرني " كتب كلماتها الشاعر محمد حمزه ولحنها امل مصر فالموسيقي بليغ حمدي ، يبدأ اللحن بجمل تنازليه خياليه بتبدأ من جواب الكرد لحد الركوز علي درجة الدو دييز وبدون ايقاع ، بعدين يخش ايقاع دابل ڤالس ويقول الجيتار نفس الجمل اللي فاتت فشكل صولو ،وتقف الفرقه كلها علي الدو دييز
يدخل ايقاع مصمودي فجمله مميزه وهاديه يبدأها الجيتار وترد الفرقه وتتكرر عشان يخش سمير يقول صولو ساكس من الكرد وهنا الجمله اللي اتقالت فالاول شغاله فالباكجراوند بصوت خافت ، كإن سمير بيحكي حدوته الحزينه والفرقه كلها بتقول نفس الجمل بتتحسر علي حاله ف توزيع عبقري هيتكرر طول المزيكا
تتكرر نفس الجمله بعدين يدخل ايقاع ٣/٤ ويبدأ الجيتار الحوار وترد عليه الفرقه من الكرد ف جمل كإنها خناقه بين البطل ونفسه وهو بيفتكر يقول الجيتار جمله بعدين ترد الفرقه بحسره علي اللي افتكره ،بعدين يقول الجيتار جمله تانيه ف يكون رد الفرقه اعنف واعلي كإنه خلاص قرر يبعد بعد اللي افتكره
دخل البياتي مع دخول ايقاع ٣/٤ ، عشان يخش ايقاع غريب دوشه عشان يوصف الدوشه ف دماغ اللي بيحكي وهو اوله عالي بعدين سكوت ثانيه بعدين تنازلي وهكذا ، و يخش الجيتار ب صولو من الصبا وزي ما اتفقنا جملة دخول الايقاع شغاله فالخلفيه بصوت خافت كإنها ذكريات بتحوم ف دماغه وهو بيحكي الصولو
ب ايقاع بطئ ورتيب ونغمات جنائزيه ومن البياتي تخش الفرقه تقول جمله حزينه كإنها ست مكلومه تبكي وفاة زوجها، وبعدين يخش محمد مصطفي بصولو كمان من احزن ما يكون من البياتي وفالخلفيه نفس الجمله الجنائزيه كإنها ذكريات تحوم، والنظام دا اتبعه بليغ طول المقدمه ف توزيع مذهل لاقصي حد
نفس الجمله الجنائزيه تتقال ولكن بلا مقدمات ياخدك بليغ من عزا ف عمر مكرم ل فرح شعبي ، يخش سمير سرور بصولو عالمي من البياتي برضو وعلي المقسوم يقلب بيه الجو ويخلي الناس اللي كانت ماسكه مناديل بتعيط من شويه تقوم ترمي المنديل وترقص دلوقتي ويتقال الصولو بالاورج بعدين الفرقه كلها تقوله
تسلم الفرقه حليم ويغني من البياتي ويقول "انا " ويكرر كلمه انا بكذا لحن مره يطلع بيها جوابات وينزل بيها كإنه واحد قاعد علي قهوه وبيحكي حكايته زي ابو زيد الهلالي ، ويغني من غير ايقاع ويقول " انا اللي طول عمري" وشوف اتك علي الميم ازاي وطول فيها عشان يفرش لكلمة طويل
يكمل حليم غنا بياتي ويقول " من كتر ما كان الحب واخدنا" ، وهنا بليغ استخدم كلمة "لا " كوبري استخدام رهيب مره يكملها ويقول "لا فكرنا زمان " والتانيه و" لا ايام "، لازمه خرافيه كإنك واقف علي سجاده وحد سحبها من تحت رجلك ، ويغني "وعيشنا" من البياتي وايقاع ڤالس ويكمل بياتي لحد "اوهام
بايقاع واحده جنائزي رتيب ومن البياتي تتقال جمله ايقونيه "سافر من غير وداع" ،ويقول وراه صوت كورال رجالي رخيم بنفس الجمله لان نواح الرجال مؤثر اكتر ، بعدين يقولها حليم من طبقه اعلي حسستك ان فيه اختلاف فاللحن ، والكلمات هنا كإن شخص واقف بينوح علي حد مات وبليغ عبر باللحن بشكل مذهل
يقول الكورال "ومنين نجيب الصبر يا اهل الله " ف جمله شعبيه جميله ، اتلحنت من البياتي واختيار الصوت الرخيم كان موفق ،بعدين يقول الكورال النسائي سافر من غير وداع بعدين الكورال الرجالي" ومنين نجيب "؛ ويدخل المقسوم ف قفلة الكوبليه ويقول الكورال نزوًلا بالسلم للركوز "سافر من غير وداع"
علي ايقاع الملفوف ومقام البياتي يصوغ بليغ مقدمه موسيقيه فوق مستوي الروعه راقصه ومفرحه تعبيرا عن الكوبليه اللي كله انبساط اللي جاي ؛ الجيتار برضو بطل القصه يرمي كلمه والفرقه ترد لحد ما الصوت يقل تدريجي برضو بس بنفس الجمل عشان يسلموا حليم الغنا من البياتي
الايقاع ملفوف عادي بس بليغ هيلا بيلا يقولك طلاق تلاته ل أبدأ مقسوم ويغني منه حليم "حبيبي والله لسا حبيبي" ومن البياتي ، وبعدين يبطأ الايقاع ويخليه واحده عشان يقول "ابقي افتكرني " فجمله حزينه كلها وف كلمة حاول حاول اللحن كله طلب وترجي وأداء حليم كلل اللحن بالنجاح ووصلك الترجي دا
يحول لراست ومقسوم ف "لو مريت " وهنا وصل احساس الاستعطاف وهنا تلقائي هتترسم ف دماغك صورة شخص عينه بتلمع وفرحان وهو بيفّكر شخص عايز يسيبه ب ايامهم الحلوه ،بعدين يروح بياتي ف "دي ليالي عيشناها " ويرجع تاني للراست والفرحه ف "علي بالي " حالة وصف رهيبه للمشاعر بتغير المقامات
افصل ودونك من الغنا كدا ركز كدا ف صوت الاورج اللي ورا حليم يالهوي علي الجمال ؛ وطبعا بعد كلمة "ليل ونهار" يرجع تاني للمذهب ويقول "ومنين نجيب الصبر يا اهل الله " لحد ما يقفل الكوبليه
بنغمات من البياتي وايقاع صعيدي صرف ؛ يفاجأنا بليغ بنغمات صعيديه فلكلوريه مذهله وهنا بليغ من كتر "جنانه" خلي الكمانجه بتاعه محمد مصطفي تغني كإنها ربابه او مزمار بلدي وهقول قصتها بعدين ، والاورج يقول نفس الجمل ف جو كان مستحيل اي حد يتوقعه وهو ان بليغ هيحط موسيقي صعيديه
من البياتي يقول " بعدنا بعدنا ليه " وهنا حليم سأل سؤال ، بس لما يرد عشان هيرد علي نفسه بليغ خلي الرد عباره عن اسئله برضو ،ف بيقول من الشك؟ ويجي ف كلمة يا عنيا يرقق اللحن ويلطش حته حجاز كدا ،ويرجع تاني يقول م الغيره ؟؟ ويروح قايل حجاز ف يا عنيا وتفاعل الجمهور اضاف للعسل حلاوه
يرجع تاني للاستعطاف والترجي ونرجع تاني للبياتي ويقول منه حليم " حبيبي مهما شوقي يطول " ب ايقاع واحده بطئ بطأ الدقايق عليه وهو بيترجاها ومستني منها رد ، وهنا قال حبيبي واللحن سكت وكإنه مش عارف يجمع الكلام ،ويرجع تاني للمذهب ويقول ابقي افتكرني من البياتي وللراست ف لو مريت للاخر
جاري تحميل الاقتراحات...