رتبها

ثريد عن الشوفاج المركزي ومشاكله. الشوفاج نظام قديم وبسيط، بس رغم بساطته، دقيق ومجال الخطأ واسع.
الشوفاج هوي بكل بساطة مصدر حرارة (شوديير) بيسخّن الماي اللي بتنقل الحرارة عا رادياتورات بالغرف بكل المبنى.
الرادياتورات سابقا" كانت حديد صب fonte في حين الجداد صاروا ألومنيوم 👇

الرادياتور هوي مجموعة شفرات بيتركبوا حسب كبر الغرفة والبرد والعزل ووو. الفونت بياخد وقت طويل تا يحمى، ووقت طويل تا يبرد، في حين الألومنيوم بيحمى وبيبرد بسرعة. الشفرة بتتوصّف حسب المسافة عاموديا" بين المدخل والمخرج، يعني منقول شفرة 60سنتيمتر أو 70 أو 80 أو أكثر. ال 60سنتيمتر 👇

هوي الأكثر استعمالا" لأنّه اقتصاديا" الأفضل (أفضل قوة حرارية بأفضل سعر). شفرة ال 60سنتمتر بتغطي بين 1 و 2 متر مربع بلبنان تقريبا".
منعتبر الماي بتضهر من الشوديير بحرارة 80 درجة، وبتوصل بنفس الحرارة تقريبا" عالرادياتور. بتضهر من الرادياتور أقل ب 20 درجة، يعني 60. يعني حرارة 👇

الرادياتور معدّلها 70، وحرارة الغرفة لازم توصل بحدود ال 20 درجة، وبالتالي فرق الحرارة بين الرادياتور والغرفة هوي 50 درجة.
كرمال هيك منقرى عن قوّة الشفرة عا Delta T=50. أو فرق حرارة 60 اذا طلعنا بحرارة الشوديير لل 90 (غير مفضّل). واذا بحضانة مثلا" مننزل لل60 تما يحرقوا حالهن 👇

الرادياتور عنده 4 فتحات وفي كتير طرق للتوصيل. الأفضل المدخل من فوق، والمخرج من تحت عالجهة المقابلة لأفضل توزيع للمياه والحرارة model A. ممكن يكون المخرج من نفس الجهة اذا الرادياتور مش كتير كبير (تقريبا"15 شفرة بحد أقصى). عالمدخل منحطّ سكر للفتح والإغلاق، وعالمخرج سكر للعيار👇

عالفتحة العالية المقابلة للمدخل منحطّ تنفيسة يدويّة، وسدة لآخر فتحة.
الرادياتورات لازم تنوصل parallel طبعا"، وكل القساطل لازم تنعزل حراريا". المفضّل الشوديير تكون راكبة بمكان أوطى من الرادياتورات لأن منستفيد من ارتفاع الماي السخنة طبيعيا" بالقساطل thermo syphon بس مش مشكل اذا 👇

غير هيك لأن في طرمبة بتبرم الماي بالسيستم. الشوفاج نظام مغلق يعني الماي نفسها بتبرم بالنظان وما في ضرورة تتغيّر. الطرمبة مش كبيرة لأن عليها بس تبرم الماي بالسيستم، من دون ما تضخ بالارتفاع. قوة الطرمبة بتنحسب حسب عدد الشفرات وطول القساطل. طريقة سريعة هيي وات لكل شفرة تقريبا" 👇

الطرمبة أفضل تركب على خط الرجوع عالشوديير. وبما إنو الماي بتتمدّد بس تسخن، نحنا بحاجة ل خزان صغير (قياسه حسب كمية الماي بالسيستم) يستوعب تمدد الماي vase d'expansion، أهين شي يركب على خط الرجوع بأعلى نقطة بالسيستم (عالسطح مثلا"). بس في حلول تانية اذا اضطرينا. بما انه السيستم 👇

مغلق، الهواء بالقساطل والرادياتورات بيعمل مشكل وما بيخلّي الماي تبرم. كرمال هيك لازم يكون في تنفيسة بكل نقطة عالية point haut local يعني عا كل رادياتور، عا كل قسطل عالي وكل ارتفاع بالقساطل (inverted U) وهيدي وحدة من الأخطاء الشائعة (ضهر الجمل بس يلتقى قسطلين ممنوع).طبعا" قنينة 👇

الماي السخنة بتنوصل عالشوفاج اذا مجهزة heat exchanger، وهون كمان نحنا بحاجة لتنفيسة. المفضّل نسكّر شوي السكر اللي عخط الشوفاج الفايت عالقنينة لأن القسطل قياسه كبير وبيصير ياخد كل الحرارة بالأول. بما أنه الرادياتورات موصولين parallel، في ضرورة لتعييرهم balancing وإلا 👇

الرادياتورات القريبة عالشوديير بتاخد كل الحرارة، والبعاد ما بيحموا مظبوط. ساعتها منسكّر سكر التعيير شوي عالرادياتورات القريبة (منخنّقهم).
هلق اذا الطرمبة صغيرة، الماي بتصير بطيئة بالنظام وبالتالي بتطوّل كتير بالرادياتور، والمخرج بيصير بارد كتير. اذا الطرمبة كبيرة، الماي بتصير 👇

سريعة كتير ومنصير نسمع صوتها بالقساطل، وممكن ما تعود تحمى مظبوط لأن بتقطع بالشوديير بسرعة. بالعادة الطرمبات فيها عيارات للسرعة وممكن نقويها أو نحففها حسب الحاجة.
اذا حسّينا رادياتور معيّن ما سخن مظبوط (خاصة" آخر كم شفرة)، بيكون بدّه تنفيس (بالعادة أوّل الموسم) 👇

بموضوع الشوديير، لازم نوضّح قبل كل شي انه الداخون تبعها بيشتغل بنظام الضغط السلبي negative pressure، يعني الدخنة ما بتطلع لوحدها متل الموتار ولازم نحنا نخلق ساحوب لتطلع بسهولة. كرمال هيك الداخون لازم يكون مشغول صح (كقياس، وكواع ومخرج عالسطح...). كواع 90 درجة ممنوعين مثلا"،👇

والمخرج عالسطح أعلى بمترين من أيا شي تاني (قرميد، حيط...). وإلا بتخنّق الشوديير وما بتشتغل صح. الشوديير بتتعيّر حرارتها، وبتصير تفصل بس توصلها، وترجع تدور بس تنزل عنها. غرفة الشوديير لازم يكون إلها تهوئة طبيعية منيحة لأن الحريق بحاجة لأوكسيجين. الشوديير فيها حماية انه ما 👇

تحمى كتير اذا خربط عيار الحرارة تما تتبخّر الماي وتنفجر. ممنوع تدور الشوديير وفي نقص ماي بالسيستم ونزدله وإلا بتحمى وبيفوت عليها الماي البارد فجأة وبيكسرها (choc thermique). الحراق في إله عيار للهواء والمازوت، بيتعيّر تا يكون الحريق مظبوط وما تدخّن (تشحتر). حراق المازوت 👇

فيه بخاخ بيحوّل المازوت لرذاذ تا يولع بسهولة. البخاخ بيسكّر اذا فات عليه وسخ ولازم يتنضّف. وفيه كمان شمعة Bougie تا تولّع المازوت، كمان ممكن تنتزع مع الوقت. في مكنات خاصة لتعيير الحراقات أو المعلمين بيعرفوا عالسمع ومن لون اللهب. قبل التعيير منتأكّد انه الداخون مظبوط ونظيف 👇

وانه الغرفة بيدخلها أوكسيجين كفاية. والأفضل ينجاب combustion analyser متل اللي بالصورة بينوصل عالداخون بيقيس حرارة الدخنة وشو فيها غازات CO, CO2, O2...وهيك بينعرف كفاءة الشوديير واذا عياراتها مظبوطة واذا فيها مشاكل تانية.
اذا الحراق عمل مشكل fault بيطفي، وفي عليه كبسة Reset ت👇

نرجع نشغّله. بس اذا ضل يفصل بيكون في مشكل معيّن (عيار، بخاخ موسّخ، تخنيق داخون، نقص أوكسيجين، شمعة ضعيفة، لعب كهرباء، فلتر مازوت موسّخ...). والشوديير كمان فيها كبسة Reset اذا فصلت (ممكن لعب كهرباء أو خطأ بحماية الحرارة العالية). الشوديير لازم تنفتح وتتنضّف من الصفوة كل كم سنة 👇

ويتنضّف الداخون ويتغيّر فلتر المازوت. المازوت لازم يكون أعلى من الحراق وإلا بيصير بده تنفيس كمان (فيه بقلبه طرمبة مازوت صغيرة).
هلق في كتير أنظمة تحكم ذكية، متل حنفيات حرارية vanne thermostatique لكل رادياتور بتسمحلك تعيّر حرارة الغرفة وهيي بتصير تعيّر قوة الرادياتور حسب الحاجة👇

أو ممكن يكون البيت مقسوم لمناطق zones منفصلة (غرف النوم منطقة مثلا"، وباقي البيت منطقة)، هيك بتدفّي غرف النوم بالليل بس، وباقي البيت بالنهار
الثريد طويل ويمكن ممل شوي، اللي عنده مشاكل معيّنة يطرحها تحت وبحاول جاوبه

نسينا نقول انه الرادياتور ما لازم يتغطى بشي أبدا" لا خشب ولا قماش ونخلّي الفرش بعيد عنه قدر الإمكان، من قدام ومن فوق (بالحد الأدنى نترك 20سنت) تما تتأثّر فعاليته.
اذا رايدياتور عندكم عم يحمى مظبوط بس مش كافي للغرفة، فيكن تزيدولوا شفر بكل سهولة (طبعا" اذا التقى من نفس المودال)

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد