ناس كتير زعلانين من مشهد ضرب السائق المتهور بتاع طريق السويس.. بس خليني أفكركم بشوية نقاط مهمة.. إيه اللي يخلي المواطن يصل به الحال لتنفيذ العدالة أو تطبيق قانونه الخاص..؟ ليه بنشوف خناقات كتير في الشارع؟ ليه بنشوف ناس بياخدوا حقهم بدراعهم.. ومش دايما بيكون حقهم!
مشهد من المشاهد المشهورة في شوارعنا.. مشهد الخناقة بين اتنين جايين في وش بعض في شارع حارة واحدة.. كل واحد بيقول انه صح ومش عايز يرجع! مشهد خناقة الشخص اللي راكن صح لكن فيه واحد راكن صف تاني وقافل عليه والسايس هو اللي خللاه يقفل عليه، وراح يبحث عنه في المحال التجارية!
مشهد المواطن اللي شايف هرجلة وفوضى تحت بيته، باعة جائلين قاعدين على الرصيف والشوارع محجوزة بجوالين المياة الفارغة ويتحكم في الأسفلت البوابين والسايس والميكروباص والتاكسي الأبيض.. بيعمل بلاغات لكن مفيش حد بيتحرك.. المواطن اللي بيحاول يحافظ على مكانه وبيضطر ينزل يتخانق ويهدد
مشهد المتسولين اللي مسيطرين على شوارعنا ومقسمينها وبيطاردونا ويخبطوا على زجاج السيارات بعنف وممكن يقفولك قدام العربية ويعترضوا طريقك.. ومفيش حد بيقولهم بم! مشهد السيارات اللي بدون لوحات وزجاجها لونه أسود وبتمر بسلام وأمان من قدام أمناء الشرطة، ولا حد بيكلمهم..
مشهد الكافيهات والقهاوي البلدي اللي فارشين على الرصيف وواخدين جزء كبير من الشارع ومحدش بيكلمهم.. مشهد مواقف الميكروباص اللي بتحتل الأماكن وتحولها للعشوائية.. ومشهد الباعة الجائلين اللي وصلوا لمرحلة تعليق الشماعات على أسوار الجامعات.. ويفترشوا الشوارع بدون أي مشكلة
مشهد سباق السيارات اللي أصبح "خابور" في حياة كل مواطن عايز يتسمتع بالهدوء أو ينام في سريره بدون إزعاج.. شكمانات صوتها زي القنابل، وتخميس في وسط الشارع وسرعة جنونية.. ومفيش حد بيكلمهم.. التوكتوك اللي ماشي عكس وسرعة جنونية في شوارعنا ويعرض أرواح الجميع للخطر ومش معلق لوحات!
كل المشاهد اللي ذكرتها واللي نسيت أذكرها أو مش هقدر أقول كل حاجة عشان وصف الفوضى ممكن ياخد سنين.. نرجع تأتي لمشهد ضرب المواطنين للسائق المتهور.. يا ترى عايزين الناس تعمل إيه وسط غياب تام لتطبيق القانون في الشارع؟! المشهد غلط، لكنه بيطلق صرخة من المواطن اللي بيقول كفاية "طناش"!!
جاري تحميل الاقتراحات...