بمناسبة الثريد دة خلوني أحكيلكم عن اللي بيحصل في مجال الTech بخصوص الملابس المستعملة بما إن دة كان مجالي قبل ما أشتغل في الأكل. خلوني أحكيلكو عن اللي بيحصل في أمريكا وأوروبا واللي أنا كنت بعمله في ألمانيا والفرص المتاحة في مصر. ثريد...
الحقيقة إن سوق الملابس المستعملة سوق عملاق ويعتبر الأسرع نموا في مجال الفاشون وجزء كبير من النمو دة مدفوع من رغبة الناس إنها تقلل إستهلاكها من غير ما تضحي برونقها وجزء جاي من شركات الملابس إنها عايزة تقلل إنبعاثاتها الكربونية ومن هنا ظهر كذا بيزنس مودل وستارتابس كتير في الموضوع.
الموضوع فيه ٣ مدارس:
١) ال marketplace اللي عليه ناس بتبيع وناس بتشتري مباشرة.
٢) ال consignment: ابعتلنا حاجتك عندنا وهنعرضها ولو اتباعت خد نسبة
٣) اللي بيشتري منك هدومك المستعملة ويحاول يبيعها تاني.
١) ال marketplace اللي عليه ناس بتبيع وناس بتشتري مباشرة.
٢) ال consignment: ابعتلنا حاجتك عندنا وهنعرضها ولو اتباعت خد نسبة
٣) اللي بيشتري منك هدومك المستعملة ويحاول يبيعها تاني.
المدرسة الأولي هي المواقع اللي بتسمحلك تعمل حساب وتعرض عليه الهدوم اللي عندك وناس تانية تدخل تتفرج ولو حاجة عجبتهم يشتروها منك.
الشركة الأشهر في العالم اللي بتعمل كدة هي Depop. دة أبلكيشن بيعمل بالظبط الموضوع دة وبيعمل حاجات تسهل ال experience زي إنه بيسهل للمشتري عملية الدفع وبيعمل للبايع الLabel اللي بيستعمله عشان يشحن الحاجات للمشتري ومقابل دة بياخدو عمولة علي كل عملية بيع.
ميزة المودل دة إنه asset light بمعني إن الشركة معندهاش مخازن ولا أي حاجة ، عيبه إنك لازم تشتغل بشدة علي حتة الثقة وال ratings لأن في نصابين كتير من الطرفين من ناس بتحط وصف مش دقيق أو بتبعت الحاجة الغلط وزبون بيسرق ويقول موصلتش وإنت في كل دة مشوفتش الحاجة بنفسك.
وطبعا الصعوبة التانية هي إزاي تقوم ال marketplace نفسه وتحل مشكلة البيضة ولا الفرخة بمعني إزاي تجيب ناس تبيع حاجات انترستنج وتعرف تجيبلها مشترين بسرعة فيتحمسو فيعرضو حاجات اكتر فتجيب مشترين اكتر وهكذا. إنك توصل لل network effects دي مش سهل.
طبعا في المدرسة دي Depop مش الوحيد ، في منافس قوي في أوروبا إسمه Vinted بيعمل بالظبط نفس الحاجة وفي كمان واحد مشهور إسمه vestiaire collective ودة شغال بس في ال luxury brands. جدير بالذكر إن Depop اتباع بمليار و٦٠٠ مليون دولار ل Etsy.
نيجي بقي للمدرسة التانية وهي ال consignment (معرفش إسمه العربي): الشركة الأشهر في الموضوع دة Thredup في أمريكا. دول بيبعتولك كيس تملاه الهدوم اللي مش عايزها وهما يسعروها ويعرضوها عالموقع ولما حاجة تتباع يدوك منها نسبة ولو ماتباعتش خالص بعد مدة معينة بيرجعوهالك أو يتخلصولك منها
ميزته إن البايع بيريح دماغه ومش مضطر يهاتي مع الزباين زي الmarketplace بس عيبه إنه هياخد فلوس أقل لأن الشركة بتاخد عمولة كبيرة مقابل إنها تصور الحاجة وتسوقها وتشحنها ليها وللزبون اللي اشتراها. عالجانب الآخر المودل دة مريح للي بيشتري لأن الشركة ضامنة الحاجة عكس ال marketplace.
البيزنس دة capital intensive بغباء لأنك مضطر تبني مخازن ضخمة تستقبل عليها الحاجات وتعاينها وتصورها وتسوقها وتشحنها وترجعها لو اللي اشتري عايز يرجع وليلة كبيرة أوي سعادتك بس عالجانب الآخر العمولة بتبقي اكبر من ال marketplace
طبعا ThredUp صحي الناس في أوروبا ومن ضمن الشركات المخضوضة عموما من حركة الهدوم المستعملة هما H&M. H&M هو أكبر شركة هدوم في العالم بس مع الوقت بيفقد أهميته لأن الجيل الصغير مبيحبوش دة غير إن كتير بينتقدو الشركة بسبب إنتاجها الضخم اللي بيترمي ويلوث الكوكب
ف كرد فعل عالتغيرات اللي بتحصل H&M أطلق تقليد ل Thredup في أوروبا إسمه Sellpy بيعمل بالظبط نفس اللي Thredup بيعمله بس في السويد وألمانيا
نيجي بقي للنموذج التالت والأخير وهو اللي بيشتري منك هدومك المستعملة ويبيعها تاني ، في رأيي دة أصعبهم من حيث التنفيذ وعلي فكرة Thredup بدأ كدة وفي النص حول لل consignment.
النموذج دة الأشهر فيه في ألمانيا شركة اسمها momox ، بتخش تقولهم تفاصيل الحاجة يقولولك هيشتروها منك بكام توتو علي كبوته. ملكش دعوة بقي هي اتباعت ولا لأ دي مشكلتهم. طبعا الميزة انك يتخلص من الحاجة وبتقبض العيب إنهم بينفخوك في السعر وبيشترو الحاجة بتمن بخس.
عالجانب الآخر في نموذج إسمه Buy sell trade ودي كانت شركتي اللي فاتت. النموذج دة موجود في أمريكا خصوصا في المدن الصغيرة واحنا كنا بنحاول نعمله في ألمانيا.
الفكرة إنك بتعرض علينا الحاجة ، بنسعر احنا هنبيعها بكام (٩٠ يورو) وبنديك اختيارين: يا تاخد تلت السعر كاش (٣٠ يورو) Sell ، يا تاخد نص السعر (٤٥ يورو) بس كريديت تقدر تشتري بيه حاجات تانية من عندنا trade. ومن هنا اسم المودل buy sell trade.
ميزة مودل انك تشتري وتبيع تاني سواء زي momox أو buy sell trade انك بتاخد نسبة أكبر من تمن الحاجة وعيبه إنه capital intensive وبتلبس الحاجة ولازم انت اللي تتصرف فيها وإن كان فكرة الكريديت في ال buy sell trade بتخليه أسهل شوية لانك مش لازم تصرف كاش علي كل اللي بتشتريه.
كمان ميزة تانية لو بتدفع كاش إن اللي بيبيعو بيبقو واقفين طوابير وإنت اللي بتتشرط عليهم لأنك بتدفع في ساعتها مش زي ال marketplace ولا زي ال consignment ودة بيخليك عندك اختيارات ياما.
طبعا مع الوقت وبال machine learning والحاجات دي انت تقدر تحسن التسعير وقرارات تشتري ايه ومتشتريش إيه لأنك متوقع نسبة إن الحاجة تتباع.
بس كدة ، دي كانت مقدمة سريعة عن مجال الهدوم المستعملة ولو حد بيفكر يعمل حاجة يفكر في إيه.
جاري تحميل الاقتراحات...