لو زهقان أو مكتئب.. حاول تدخل في حياتك حاجات بسيطة تسكر بها الروتين.. لو مثلا جربت تنزل تتمشى الصبح بدري، أو تجري خفيف.. تسمع موسيقى .. اختاراك كتاب و إبدأ قراية.. لو عندك هوايات زي الرسم أو عزف الموسيقى أو لعبة من الألعاب.. حاول تفضي مساحة لهواياتك..
لو مشترك في نادي، روح اتمشى شوية الصبح أو بالليل و غيَر مناظر.. اعمل لنفسك فسحة أسبوعية.. أو اكتب قائمة بحاجات جديدة أول مرة تعملها، و اعمل حاجة جديدة كل أسبوع.. و من الناحية الروحية.. انت محتاج تكون بتروي روحك .. أيا كانت ديانتك، الجانب الروحي بيفرق كتير..
اعمل لنفسك وقت للتأمل، ويفضل جدا تكون بعيد عن الموبايل.. ان شاالله ٥ دقايق.. افصل دماغك! اتعود انك كل يوم تعمل حاجة.. لو انت بتشتغل، حاول تعمل أي حاجة بسيطة بعد الشغل.. تكون منتج، يعني حاجة محتاجة تتصلح في البيت، حتى لو كان تغيير لمبة.. الكسل يجيب اكتئاب..
سافرلك يوم في أي مكان.. خد اجازة من شغلك، مهما كنت مهم فكل واحد فينا قابل للاستبدال.. عندك حياة برا الشغل ولازم تعيشها وتديها حقها.. حاول ما تكررش الأيام.. يعني أوجد الاختلاف في يومك عشان يبقى له طعم مختلف عن إمبارح.. شوف فين الجمال و إجري وراه.. غروب أو شروق أو جنينة جميلة
ابعد نفسك تماما عن كل حاجة لها تأثير سلبي على نفسيتك.. موضوع بيستفزك أو بينرفزك، ابعد عنه.. مواضيع السوشيال ميديا اللي ما بتخلصش، لو بتاخد الأمور على جوا، يبقى بلاش منها أحسن.. صحتك وراحة بالك بالدنيا.. كمان طريقة أكل بتفرق.. كل ما اكلت كمية معقولة كل ما حسيت نفسك خفيف
كل ما أكلت أكل صحي كل ما هتفرق معاك.. وكمان لما تشوف نفسك في المرايا وتلبس حاجة حلوة وتنزل من البيت راضي عن نفسك، ده بيعمل فرق.. بلاش البهدلة في اللبس لأنها بتؤثر على النفسية من غير ما تاخد بالك.. مش لازم براندات، بس اهتم بنفسك..
بلاش تؤجل المهام.. لأن التأجيل بيرمي جواك إحساس بالذنب دون أن تدري.. اعمل اللي عليك واخلص منه.. وبلاش تكتم حاجة مضايقاك.. فضفض وخرج همومك برا.. في النهاية، دي حياتك.. هتشوفها بنضارة سودا، هتبقى تقيلة على قلبك.. خليك إيجابي و إعرف إزاي تعيش.. جودة الحياة مهمة!
جاري تحميل الاقتراحات...