كتير للأسف بشوف حالات قطط تايهين من صحابهم وحابة اتكلم عن ازاي تحافظ على قططك من انهم يضيعوا، خصوصا اني عملت بعض الغلطات اللي هتكلم عنها وشوفت غلطات تانية ناس كتير بتعملها ف هجمعهم في الثريد ده 🧵
أول حاجة القط وأهم حاجة هي الشبابيك والبلكونات. المفروض تركب سلك متين على الشبابيك وتفتح الشباك من ناحية السلك فقط، ولو عايز تفتح البلكونة او الشبابيك خالص تكون منتبه وعارف القط فين.. عشان لو حاول يطلع على سور او على شباك تنزله
طيب هتقول لي انا القط بتاعي ماعندوش فضول ينط.. او بيقعد على السور او في البلكونة بس لكن مش بيقع.. او اصل عنده ضوافر ف لو وقع هيعرف يمسك ويطلع تاني. كل ده كلام مش صح لأن لو القط قدامه شباك او بلكونة مفتوحة كل يوم ف كل يوم في فرصة انه يقع او يحصل له مشكلة
ونسبة كبيرة جدا جدا من القطط بيحصل لهم ده في مدار حياتهم.. وانا فاكرة قطة صديقي اللي كان بيسيبها براحتها لأنها بقالها ١١ سنة ماوقعتش وفي يوم وقعت من تالت دور وماتت في وقتها. حقيقي الموضوع مش مستاهل مجازفة حتى لو ساكنين في دور منخفض القط بردو ممكن ينزل ويتوه
تاني نقطة هي التعقيم. القطط اللي طالبة تزاوج بتكون عايزة تخرج عشان تدور على قطط تتزاوج معاها ونزعة الهروب عندهم تفوق الفضولية المعتادة من القطط. لذلك احرصوا دايما على عمليات التعقيم لقططكم للحفاظ عليهم، وعلى صحتهم، ولتقليل زيادة عدد الحيوانات الغير مرغوبة فيها كمان!
تالت نقطة مهمة جدا بردو وهي أبواب الشقق خصوصا اذا الشقة فيها كذا حد بيطلع ويدخل. كل افراد المنزل لازم يكونوا حريصين وقت فتح وقفل الباب ان القط مايكونش قريب وانه مايطلعش من بين رجليهم وهم بيفتحوا الباب وماياخدوش بالهم. وبردو لو بتفتح لدليفري وداخل تجيب فلوس ماتسيبش باب الشقة مفتوح
قياسا على موضوع الباب، في موقفين لازم تخلوا بالكم جدا من القطط فيهم وهو وقت استضافة ضيوف ووقت العزال عشان شوفت ناس كتير اوي ضاع منهم قططهم بسبب كدا. لو جاي لحضرتك ضيوف خلي كل القطط في احد اوض النوم معاهم كل احتياجاتهم ومقفول عليهم لأن الضيوف هيوتروهم وعشان مع فتح وغلق الباب
المتكرر ماتضمنش ان الضيوف هيخلوا بالهم ان قط مايطلعش. وقت العزال نفس الشئ، بيبقى باب الشقة مفتوح وقت طويل وكتير اوي قطط بتطلع وتتوه، الحل ان بعد لم كل حاجة ووقت النقل تخلوا القطط في اوضة لوحدهم ويفضل جوا البوكسات لحد ما العمال ياخدوا كل شئ ينزلوه وبعد ما البيت يفضى
تقدروا تطلعوا القطط تاني.. وكذلك في البيت الجديد تاخدوا القطط في بوكسات وتتساب في اوضة وماتطلعوهمش منها غير لما تخلصوا نقل كل حاجة وباب الشقة يتقفل أخيرا.
بالنسبة لبوكسات نقل القطط في بوكسات بتكون سهلة الفتح او الكسر القطط الشقية او العصبية بتقدر تهرب منها. انا برشح دايما البوكسات اللي بابها حديد ومتينة ويكون الباب زي اللي في الصور دول. دي أمثلة للبوكسات الكويسة ومهم اوي تتأكدوا انكم قافلين البوكس صح قبل ما تطلعوا
طبعا موضوع انك تاخد القطة على دراعك للدكتور غلط جدا جدا مهما كان القط هادي.. عشان في لحظة لو عدى موتوسيكل صوته عالي ولا قابلتوا مجموعة كلاب ولا حصل اي حادثة جنبكم القط هيجري ويمشي. الموضوع مش مستاهل اي مخاطرة خالص بجد. كمان لو انتم في العربية وحبيت تفتح البوكس للقط عشان متضايق
لازم تكون كل شبابيك العربية مقفولة. ولما توصلوا المكان اللي رايحينه، القط لازم يخش البوكس ويتقفل كويس قبل ما اي شباك او باب العربية يتفتح. اهتموا جدا بالحتة دي عشان ناس كتير بتضيع منها قططها كدا وشوفتها كتير.
أخيرا وليس آخرا.. العيادات البيطرية. دلوقتي العيادة الكويسة المفروض تحرص ان الكشف بيكون في غرفة مقفولة، لو القط اتوتر وحاول يجري مش هيهرب من العيادة. ولو العيادة مفتوحة على بعضها ان باب العيادة يكون مقفول مش مفتوح على الشارع وقت الكشف. للأسف مش كل الدكاترة حريصة وفي قطط بتهرب
اثناء الكشف من التوتر من بيئة العيادة.. ف حرصا منك كصاحب القطة دايما قبل بداية الكشف تأكد أن باب غرفة الكشف او باب العيادة مقفول خصوصا لو القط بتاعك من النوع اللي بيتوتر وبيخاف.
تم 🙏
تم 🙏
جاري تحميل الاقتراحات...