النهارده ١٢ سبتمبر ذكري رحيل ملك الموسيقي وعبقري النغمات بليغ حمدي، وتخليدا لذكراه هنزل ثريد فيه اجمل موسيقي وجمل بليغ حمدي للست ام كلثوم بترتيبها الزمني وهنبدأ ب اغنية حب ايه اول اعماله للست وكانت ف ١٩٥٩ والحفله كان ف ديسمبر ١٩٦٠ "ياما طول عمري رضيت منك اسيه "مقام رست
هنا بتتجلي موهبة بليغ الفطريه قبل ما يتعلم مزيكا ونوته وتوزيع هنا موهبه بيور واحساس بيور ل بليغ ،"كنت بخلصلك ف حبي ب كل قلبي " من مقام النهاوند
انساك ثاني اعمال بليغ للست واول حفله كانت ف ديسمبر ١٩٦١ ، كوبليه "ولا ليله ولا يوم " من مقام الراست
"وان كنت اقدر احب تاني احبك انت " من مقام الصبا ثم تحويل للبياتي ف "كل العواطف الحلوه بينا"
ثالث اعمال بليغ للسيده ام كلثوم وهي اغنية ظلمنا الحب اول حفله كانت ف ديسمبر ١٩٦٣ ، وهنا الجمله الشهيره وضاع الحب ضاع ما بين عند قلب وقلب ضاع
"انا وانت نسينا حتي نتعاتب ونتصارح "من اغنية ظلمنا الحب ، هنا استخدم بليغ مقام عجم ال ري وطبعا مفيش مقام انسب من العجم للكبرياء وعزة النفس وهي بتعاتبه بكبرياء انهم نسوا يتعاتبوا
كل ليله وكل يوم (يا واحشني بتفكر ف مين ) رابع اعماله للست وكانت اول حفله ف ١٩٦٣ ، وهنا بعتبر دا من اجمل كوبليهات بليغ للست بذات جملة" من كتر اللي قاسيته وداريته عليك "
موسيقي سيرة الحب خامس الحان بليغ للست ام كلثوم من مقام راحة الارواح (سيكا علي سي نص بيمول ) اول حفله كانت ف ديسمبر ١٩٦٤
"اهل الحب صحيح مساكين " جمل ايقونيه بتوقيع العبقري بليغ حمدي
موسيقي من عالم اخر علي ايقاع الكراتشي ينهار ابيض علي الدلال
"ف الدنيا مفيش ابدًا ابدًا احلي من الحب " اراهن ان بلبغ مفكرش فالجمله دي وطلعت كدا منه لا اراديا حتي شوف بعدها بيقول نتعب ؟ وراح عامل سكته نغلب وراح عامل سكوت تحسه كان بيكلم نفسه وطلع لحن
سادس اعمال بليغ للست وهي اغنية بعد عنك وكانت اول حفله ف يوليو ١٩٦٥ ويُقال ان الست قالتله انت يا واد واخدني كوبري تبعت بيا رسايل لحبيبتك (المقصود هنا ورده ) بسبب الاغنيه دي ، وهنا مقطع بخاف عليك وبخاف تنساني من مقام البياتي
روائعك يا بليغ ايه السحر دا ايه المزيكا الخرافيه دي وبرضو علي ايقاع الكراتشي بليغ احسن واحد استخدم الايقاع دا
"افتكرلي لحظه حلوه " من اغنية بعيد عنك
التعاون السابع بين بليغ والست كان ف اغنية فات المعاد اول حفله كانت ف فبراير ١٩٦٧ ، هنا بليغ عامل مكس رهيب بين الكلاسيك والموسيقي الشرقيه ، الالات شرقيه علي غربيه ومزيج رائع متحسش فيه ب اي نشاز ، مقطوعه موسيقيه لو سبت نفسك وودانك ليها هتوصلك لاخر نقطه ف الكون
"تفيد ب ايه يا ندم وتعمل ايه يا عتاب " من مقام البياتي ، جمل بليغ كلها ايقونيه ومحفوره ف وجدان الناس وهتفضل محفوره الي يوم البعث
اقول ايه ولا ايه ،اتكلم عن جمال المزيكا ولا جمال تقطيع سمير سرور الجمل علي ساكسفونه ولا اتكلم علي جمال التوزيع ودور كل اله والتبديل بينهم ف الجمل لدرجة انك مش متوقع مين هيقول ومين هيرد وحتي نفس الاله بترد بس بشكل مختلف بليغ مخليك تتلفت يمين وشمال من هنا ل هنا يخربيت عقلك يا بليغ
الجمله الموسيقيه اللي خلتني مهووس ببليغ ، وانا قاصد اجيب هنا الحفله الاولي عشان تسمعوا رد فعل الناس لما سمعتها لاول مره وغالبا اي حد فينا رد فعله هيكون زي الراجل اللي وقف يهلل ويقول الله الله الله اكبر ف الدقيه ١:٠٢ :بليغ خلي الناس تشد فشعرها وتهلل زي المجانين من جمال المزيكا
"قول للزمان ارجع يا زمان " جملك محفوره ف وجدانا يا بليغ انت مش طبيعي والله
التعاون الثامن الجميل والرائع اول حفله كانت ف ١٩٦٩ اغنية الف ليله ،طبعا مكنتش محتاج اقول اسمها لو سمعت المزيكا بس هتعرف علطول لانها مزيكا ممضيه ب امضاء بليغ العالم كله يعرفها وهنا اقصد العالم كله حرفيًا لان حتي الاجانب لو قولتله موسيقي شرقي هيقولك الف ليله وليله،
"يا حبيبي" غالبا بتسمعها وانت معدي بليل جنب قهوه او طالعه من محل قاعد فيه راجل عجوز او حتي شاب ، دايما الحان بليغ محوطاك ف كل حته وكلمة يا حبيبي دي غالبا لما حد يقول ام كلثوم اول حاجه بتيجي فدماغه هي جملة "يا حبيبي "
"خدتني بالحب في غمضة عين "وشوف هنا سرع اللحن ازاي عشان يقولك انهت غمضة عين فعلا ، وراح مبطئه تاني ف الليل بعد ما كان غربه
التعاون التاسع اغنية الحب كله اول حفله كانت ف يناير ١٩٧١ وهنا بليغ كان اتعلم مزيكا وتوزيع وهنا عامل ثوره فالايقاعات والمقامات ٤ مقامات فالمقدمه وايقاعات جديده واكتر حاجه عجباني فالتوزيع هو الاوكرديون اللي بيرد فالخباثه كدا اسمع الدقيقه ١:٢٠
"طريق حياتي مشيته قبلك ف ليل طويل " متفهمش هو عاملها ازاي بس قوم سقف وانت ساكت 😀 وشوف لحن كلمة ولما شوفتك ازاي ملحن الكلمه كإن حد شاف حد مره واحده وراح ساكت يقول ولما شوفتك وتسكت عبقري كلمه قليله عليك يا بليغ
اجمل كوبليه فالاغنيه "دا الهوي العطشان " ، مش محتاج اتكلم اسمع قال ازاي حبيبي دا انا مخلوق عشانك وافتح بوقك واسبهل زي منا عامل دلوقتي لان محدش قادر يتكلم من الحلاوه
اللحن الاخير ويشاء القدر ان تكون اخر اغاني الست تكون من الحان بليغ ومتغنتش ف حفله للاسف ، اتسجلت سنة١٩٧٤ ، وهنا بليغ بيتحفنا بجمال التوزيع والالات الايقاعيه الجديده والايقاعات الجديده اللي كان جايبها من الهند وهو كان مهتم بوقتها بالايقاعات والموسيقي الهنديه وعمل ميكس جباار بيهم
"واه يا عيني اه علي الوعد والمقسوم " ينهار ابيض علي الحلاوه وجمال اللحن وجمالك يا بليغ ، انتهي الثريد ولكن لم تنتهي عبقرية البليغ العبقري بليغ عبد الحميد حمدي ❤️
جاري تحميل الاقتراحات...