ستوري تايم:
من سنتين كنت عايشة في شقة شيرد وإحدى زميلات السكن كانت متبنية قط بلدي من بنت كانت عاملة اعلان عن خلفة قطتها على الفيسبوك، وبتقول لي ان البنت فضل معاها قط من الخلفة محتاجة تطلعه تبني ومش لاقية حد وانها هتطلعه لأن ظروفها المادية صعبة جدا ومش قادرة تصرف على اكله حتى-
من سنتين كنت عايشة في شقة شيرد وإحدى زميلات السكن كانت متبنية قط بلدي من بنت كانت عاملة اعلان عن خلفة قطتها على الفيسبوك، وبتقول لي ان البنت فضل معاها قط من الخلفة محتاجة تطلعه تبني ومش لاقية حد وانها هتطلعه لأن ظروفها المادية صعبة جدا ومش قادرة تصرف على اكله حتى-
طبعا كشخص ساذج وتعبان في مخه قلتلها اني ممكن ابعتلها اكل ورملة يكفوا القط ده بشكل شهري لحد ما تقدر تلاقيله تبني.. واني ممكن اظبط تعقيمه بحيث انه مايتجوزش القطة الام والبنت تفضل stuck في دايرة لا تنتهي.. كنت وقتها مصاريفي الثابتة أقل وتكلفة الحاجات دي مش ضخم ف واي نوت يعني؟
عملت كدا بالفعل بعتلها حاجات للقط تكفي شهر وهي هتقوم بأكل ورملة القطتين التانيين عندها. البنت كانت مبسوطة جدا وهي فعلا ظروفها صعبة جدا وانا متعاطفة معاها ومقدرة جدا حبها لقططها. وقت تعقيم القط بتاعها القط هرب لأن باب البوكس ماكانش مقفول كويس وضاع منها للأسف
وعلى أساسه انا مابعتش أكل تاني أو حاجة لأن مشكلتها كانت في مصاريف تالت قط وانتهي التواصل بينا على كدا لفترة عدت ٦ شهور على ما أفتكر
بعدها في يوم لقيتها بتتصل بيا الساعة ٣ الفجر بتقول ان قطتها عندها ولادة متعثرة ومش عارفة تتصرف ازاي وانا مستغربة هي حملت ازاي؟ اصل احنا اضطرينا نعيش عند قرايبنا وعندهم قط ف اتجوز قطتي وده حصل.. ماقدرتش اقول حاجة بردو عشان ظروفها وحشة مش هلومها على حاجة مش بايدها
المهم عملت كام مكالمة ولقيت عيادة شغالة في ٦ اكتوبر طوارئ وكان عندهم دكتور جراح موجود. قلت للبنت تروح هناك تعمل للقطة عملية ولادة وتعقيم وطبعا ماكانتش تقدر تدفع اكتر من مبلغ بسيط اخدت بيه تاكسي للعيادة عشان تروح بسرعة وهي ساكنة في مكان بعيد نسبيا. يومها اتفقت مع العيادة-
على أنها تعمل العملية للقطة وانا هدفع وقلت للبنت اني بردو هتحمل الأوبر اللي هترجع بيه وهحجزهولها كريديت بنفسي يعني. وقتها ماكانش معايا فلوس اوي بس صديقة ليا هي اللي تكفلت بتكلفة العملية وانا بس دفعت الأوبر بتاع البنت
القطة قامت من العملية كويسة بس اطفالها ماتوا والبنت شكرتني اني سهرت طول الليل عشان اتكلم مع الدكتور وافهم ونستنى القطة تفوق عشان اطلبلها اوبر.. وراحت لطريقها وبعتلي تاني يوم صورة للقطة وهي بخير واتطمنت
طبعا للأسف انا اتحطيت في خانة ايناس المنقذة اللي كل ما احتاس هكلمها.. ف الدنيا تطورت تطورات انا مش حاباها ابدا
من شهر.. كلمتني بتعيط ان عندها قط "تالت" انقذته السنة اللي فاتت وهو كيتن (وماكانتش قالتلي عنه اصلا وكان معاها من قبل ما قطتها تتعب ونعقمها) وانه دلوقتي عنده احتباس بول ومش عارفة تعمل ايه وكالعادة مش معاها فلوس
انا طبعا بين الفترتين دول نشاطي في الانقاذ زاد وطول الوقت عليا مديونية للعيادات والفوسترز اللي بيعملوا الاستضافة كشغل مدفوع.. ماكنتش حابة ابقى المسؤولة عن مصاريف علاج قططها كل مرة ف قلت اني هعمل حل ذكي. قلتلها تقدر تروح العيادة اللي دايما بتعامل معاها.. تعالج القط وماتدفعش-
وتدفع اخر الشهر. انا عادة في اي وقت بيكون عليا فلوس للعيادة عشان دايما ليا قطط قاعدين هناك لحد التبني.. ف ٢٠٠ او ٣٠٠ جنيه زيادة على مديونيتي وانا بدفع للعيادة باستمرار مش هتبقى مشكلة.. بس هي تكون ملزمة تدفع اخر الشهر
كلمت الدكاترة في العيادة واتفقنا واخدت اذنهم.. وبعتها للعيادة وكنت مشغولة وقتها في انقاذ القط نور.. شوية ولقيت الدكتور بيكلمني بيقول لي انها اخدت درونتال للقطط وماحاسبتش ومشيت ف انه هيبعتلي الحساب بتاعها وكدا عشان اعرفها عليها كام
خدت كام واحدة درونتال يا دكتور؟ ٦، وخدت سبراي تهدئة عشان تعرف تدي القط الدوا لأنه سخيف وبيقاوح. طيب هي ماكلمتنيش ليه؟ اصلي كنت فاكرها هتدفع ثمنهم وانتي بس هتشيلي على اسمك مديونية العلاج بس هي خدتهم ومشيت على طول وانا مش واخد بالي
حساب علاج القط في المرحلة دي كان بسيط تقريبا ٢٠٠ جنيه.. بس بقى ٣ أضعاف عشان اللي هي اخدته. كلمتها وانا غضبانة طبعا قالتلي اصل القطط عندهم ديدان وبيوقعوا ديدان كتير لأني عمري ما اديتهم جرعات ديدان ف الدكتور قال لي درونتال احسن حاجة وانه لازم جرعتين وانا عندي ٣ قطط ف اخدت ٦
قلتلها مافكرتيش تاخدي رأي اللي متصدرة لك وقدام العيادة مديونة بمصاريف قططك؟ مافكرتيش تسألي على بديل ارخص بدل الدوا اللي القرص منه ب٧٥ جنيه؟ اصل الدكتور قال لي ده أحسن حاجة وماقترحش عليا بديل تاني (وهو فعلا ماقترحش وبلوم عليه في النقطة دي).. قلتلها ما يمكن لو كنتي عملتيلي اعتبار
كنت قلتلك على بديل زيه وبنص او تلت السعر. انا شخصيا مش بدي قططي درونتال كل مرة وكتير بجيب البديل الأرخص عشة سيمبلي مش هعرف انا كل شهرين ادفع ٥٠٠ ولا ٦٠٠ جنيه أقراص ديدان.. البنت اعتذرتلي وقالتلي الفلوس هبعتهالك اول الشهر وماتزعليش وحقك عليا و و و
انا بقى كنت متضايقة جدا وقلتلها انا مش عارفة ازاي هي لما انقذت الكيتن ده ماعرضتوش للتبني خصوصا انها انقذته في عز ظروفها التي لا تسمح خالص.. وانها المفروض تكون حكيمة عن كدا.. واني في وضع مادي سئ وبعتذر عن مساعدتها تاني لأني بقيت بحس اني بيتم استغلالي
البنت اعتذرت تاني وانها متعلقة بالقطط وبتاع وهي ظروفها كدا وبتاع واني استنى منها تدفع كل المبلغ على أول الشهر وقفلنا الكلام. جينا لأول الشهر وبعتتلي من نفسها انها هتبعتلي تقريبا ٤٠% من المبلغ اللي عليها و "حقك على راسي"
طبعا ماقدرتش ازعق او اتخانق.. قلتلها ماشي ابعتي الفلوس وهدفعها للعيادة وكنت مستنية يومين يبقى معايا فلوس تاني عشان ادفعهم كلهم دفعة واحدة للعيادة بدل ما ابعت مبالغ صغيرة. بعد ٣ ايام بالضبط اللي هو النهاردة الصبح.. اصحى على ٣ ميسد كولز منها الساعة ٨ الصبح
كلمتها، "مشمش محتبس تاني وبيعوي ومش عارف يعمل في الليتر بوكس وبينونو جامد، وانا مش عارفة اتصرف ازاي." عشان طبعا انا اللي بقول نتصرف ازاي
قلتلها انا مش معايا فلوس اساعدك ومش هعمل موضوع العيادة تاني لأن اصلا حسابك الأول ماخلصش حتى.. ف هي تقول لي عارفة بس اعمل ايه.. في الاخر قلتلها هو عموما انتي حطيتيني في موقف وحش جدا عشان قلتي هتدفعي كل فاتورة العيادة بعد شهر وصدمتيني انك هتدفعي جزء بس.. وانا بقيت في موقف سئ اصلا
وهضطر ادفعهم عشان مش هينفع استنى شهرين كمان على حساب مفتوح. قلتلها اني كدا كدا اتدبست.. وهرجعلها المبلغ اللي حولتهولي من يومين وهي تتصرف تشوف دكتور تروحله بعيد عني وتتفاهم معاه في الدفع براحتها. عجبها الاوبشن ده ف بعتلها الفلوس وقفلت.
انا عارفة اني غلطانة ١٠٠% واني اللي حطيت نفسي في خانة الشخص المنقذ اللي بيساعد.. بس في نفس الوقت هي كانت بترفع سماعة التليفون عليا بتعيط وفي قط في حالة خطر ف هعمل ايه؟ يعني على تويتر ساعات بقدر اقول لا واعتذر بس هي بتزنقني
ف انا النهاردة حزينة.. عشان عارفة ان دي مش اخر مرة هي هتكلمني تصحيني عشان قطها او قطتها تعبانين.. وبقيت حاسة اني مسؤولة عن علاج ٣ قطط فوق قططي وانا طول اليوم بغني عن اد ايه انا منهكة وتعبانة
اللي هو شغلي مرتبه ثابت من زمان والاسعار بتغلى ف بقيت مضغوطة في مصاريفي الشخصية جدا وده مأثر على نفسيتي اوي.. تزامنا مع اني اخر كام شهر لقيت حالات كتير تعبانة وعلاجها بيتكلف بس الحمد لله في ناس طيبة بتدفع للعيادة وبيساعدوا ولكن يبقى الوضع اني عندي فواتير بتعد طول الوقت واي وقت
بيكون عليا فلوس ف ده ضغط نفسي عموما. عشان ازيد الطين بلة ويبقى عليهم مصاريف علاج القط بتاعها والضغط النفسي من الموضوع
بس خلاص rant over وأحب أقولكم ان اللي يصعب عليك يفقرك
وقبل ما تقولولي ماتساعديهاش تاني.. يا جماعة بتتصل بيا بتتشحتف ودايما بتكون حالة لو ماتلحقتش ممكن تموت.. مش بعرف اقول لا وبحس بقلة حيلتها خصوصا ان فعلا ظروفها وحشة وبتحط في معضلة كبيرة.. الكلام سهل فعلا بس موقفي صعب
جاري تحميل الاقتراحات...