عايز اتكلم عن نيرة أشرف.. فيه ناس بتنشر صورها وهي في المصيف أو في حفلة أو مع أصدقائها.. لابسة إيه أو بتعمل إيه، دي كانت حياتها وهي حرة فيها.. مش قادر أصدق انكم بتنشروا الصور دي عشان تبرروا ذبحها في الشارع! وكاتبين انها مش ضحية، و ان اللي قتلها هو الضحية! #نيرة_أشرف
الكلام ده ما يطلعش غير من مجرمين.. صحيح ما قتلتوهاش، لكن التبرير لسفاح متصور صوت وصورة، ومحاولة إظهار الفتاة إنها كانت كافرة أو منحرفة لتحليل قتلها، ده إسمه جنون وانحراف عقلي صادم.. سواء كنتم مجموعة صغيرة تتحرك من خلال لجان أو كنتم عدد كبير.. هذا تفكير شيطاني لا ينتمي للإنسانية
المبدأ نفسه يثير الغثيان، لكنه ناقوس خطر يدق بشدة على ضمير المجتمع اللي بيتسابق على تشغيل القرآن في المواصلات والأماكن العامة وبيقفل شوارع ومحلات عشان الصلاة.. فيه خلل واضح وصارخ في المجتمع، انفصام بين شخصية المؤمن والقاتل! مش مهم تكون قتلت بإيدك، لكن التحريض والتبرير، جريمة!
هل كل واحدة هتشوفوا صورها في حفلة أو بترقص، هتنزلوا تدبحوها؟! هو ده الإيمان؟ بتقتلوا عشان مين؟ عشان ربنا؟ غيورين عليه؟ مش ربنا قادر ياخد روح الإنسان في ثانية؟ و مين قالكم انكم تقدروا تحاسبوا الناس عشان لابسين بشكل مختلف عنكم أو عايشين حياتهم بطريقة مختلفة..
أنا حزين ان هذا الفكر الإجرامي المتطرف أصبح ساكن في عقول ناس كتير .. حزين ان الستات بقوا حاسين انهم بيعملوا جريمة لو عاشوا حياة طبيعية.. ان الفكر القذر اللي مليان انحرافات جنسية يكون هو الطبيعي، ويطلع علينا شيخ يهدد النساء بشكل علني ومحدش يقوله تلت التلاتة كام!
أرجع و أقول.. القانون ممكن يعالج كل ده .. لو فيه إرادة حقيقية لتصحيح المسار وتجديد الخطاب الديني.. لكن المؤشرات بتقول ان المواءمات مع المهابيش والدراويش أهم من المشاكل اللي بنتكلم عليها.. واللي هم مش واخدين بالهم منه أو عارفينه ومطنشين، إن الموضوع يكاد يكون عدى مرحلة خط الرجعة
من أواخر السبعينات والسرطان ده بينهش في جسد الدولة.. ساعتها كان فيه بواقي تربية نضيفة ومحترمة، كان لسه عندنا طبقة واعية وبتتصدى للعشوائية والتطرف.. لكن مع الوقت طفشوا من البلد ولقينا نفسنا أقلية، والأغلبية مش شايفين الغلط عشان ما عرفوش الصح..
عارفين المشهد في الشارع بيفكرني ب إيه؟ بيفكرني بالمشاهد التاريخية بتاعة الإنفلات، لما يغيب الأمن وتشوف وشوش غريبة في الشارع نازلين ينهبوا ويسرقوا ويعملوا اللي هم عايزينه.. هم دول اللي بنشوفهم في الشارع وبنتعامل معاهم.. جايين من محافظات تانية ومش عاملين حسابهم يكافحوا
جايين يشحتوا أو يسرقوا أو يبلطجوا أو ينصبوا على الناس.. بس الفكرة انهم لقوا نفسهم أغلبية.. و إحنا بقينا صيدة سهلة! ولما يجتمع الجهل مع قلة الضمير مع الإيمان الشكلي المنحرف في ظل غياب تطبيق القانون.. طبيعي انك تلاقي ناس بتدافع عن سفاح وتقول عليه ضحية..
وطبيعي تلاقي شيخ طالع علينا بيقول ، لو عايزة تنزلي بشعرك هايدبحوكي.. بس اللي مش طبيعي ان القانون ما يتحركش ويعاقب الناس دول.. صمت قاتل للقانون في مواجهة مخالفات كثيرة، وصمت في مواجهة التحريض والفتنة.. أكيد فيه استفادة من ناحية "الكراسي" أهم من حماية الناس..
ويقولك.. يوم ما نحب نلم الدنيا، مش هاياخدوا في إيدينا وقت! لكنهم غلطانين، لأن الأفكار بتنتشر، والتربية راحت، والاعتدال اختفى، والثقافة اتدمرت.. تم القضاء على كل الأشياء الجميلة حتى الحدائق والمباني الأثرية لم تسلم من ثقافة الصحراء! ما تقدرش تقول انك عايش في مصر اللي تعرفها
تقدر تقول انك عايش وسط ناس غريبة، ولازم تنسى تربيتك وثقافتك عشان تقدر تعيش وسط العشوائية.. اللي حصل في نيرة أشرف هو من أبشع الجرائم اللي الواحد شافها في حياته.. وأكبر صدمة أخدناها في الناس اللي عايشين حوالينا.. من أول اللي عملوا فوتوشوب وحجبوها لغاية اللي بيدافعوا عن قاتلها..
كانوا بيقولوا ان بعد الثورات بيكون فيه انحدار أخلاقي وثقافي.. بس إحنا بدأنا من زمان.. وهقولكم حاجة تانية مهمة.. أكتر ناس خايفين على الدين ، هم اللي بينادوا بفصل الدين عن السياسة.. أي حد بيقول حاجة مختلفة فهو بيضحك عليكم!!
جاري تحميل الاقتراحات...