بالنسبة للي بيسأل .. الناس ساكتة ليه؟ .. السؤال ده يعتبر زي حالة إن الشيطان بيسأل نفسه .. هو فيه ناس ملتزمة ليه؟ .. المهم ، مبدئيًا صيغة السؤال دي عاملة زي الوسوسة وإن مجابتش نتيجة دلوقتي بس علشان الأجيال الجديدة اللي لسه داخلة مواقع التواصل تتشبع بالأفكار الشيطانية دي
عمومًا هجاوب الناس ساكتة ليه والمفروض أصلاً تبقى ساكتة .. ولو هتتكلم يبقى علشان تصلح حياتها .. مش إنها تسمع كلام مجموعة فشلة عايزين يحصل هياج شعبي في مصر .. ويفضلوا بقى زي اللي حصل في يناير .. المنشآت تتحرق والبلطجية ينتشروا ومظاهرات يوميًا تاكل من الإقتصاد اللي مش فارق معاهم
فهما بقى يطلعوا يقولوا شفتوا بقى .. لازم إحنا ننقذكم ، ونخش بقى في متاهات زي اللي دخلت فيها دول حوالينا .. علشان بس سمعوا كلام ناس فشلة .. فبقوا أشباه دول ومشاكلهم معقدة بقت أبعد من المشاكل المادية .. بل مشاكل في إنهم مش لاقيين ناس يقدروا يحلوا .. كله بيهري على مفيش لحد ماضاعوا
الناس ساكتة لأنها شافت اللي بينجز وبيشتغل .. وشافت لاجئين من بلاد تانية كانوا ظروفهم الإقتصادية أحسن بكتير .. بس علشان فيه من مجموعة الناس اللي زي نوعية "عقبال مصر" "إنزلوا" "الناس ساكتين ليه" زنوا على دماغ شعوبهم .. فكان طبيعي إن بلادهم تضيع وسط مجموعة دوشجية وخلاص .
إنتوا لو عايزين تعرفوا الناس ساكتة ليه؟ شوفوا الأسعار هنا والأسعار بره مصر . شوفوا توافر منافذ السلع هنا . ونفاذ أغلبها بره ، شوفوا نسب البطالة اللي بتقل هنا . وبتزيد بره . فيه ناس بتبني كل يوم كل مابتلاقي إستقرار أكتر . مش هتضيع حياتها ولاأكل عيشها علشان تسمع ناس مش فاهمة حاجة
فيه مثل بيقول لك .. حبيبك يبلع لك الزلط ، وعدوك يتمنى لك الغلط . لما نيجي نقول لحد على الإيجابيات في مصر . لازم يطلع لك أي حاجة علشان يطلع هو البيه اللي صح واللي مش مطبلاتي .. بره فيه مشاكل . هجيب مثال تركيا اللي يعتبر عندها تضخم مرعب . ولاحد بيتكلم وبيقول هتفلس . علشان على هواهم
فخليني أكون واقعي .. كل ماالرئيس السيسي يعمل حاجة ، فده بيبين فشلهم .. هما عايزين يبانوا إنهم اللي مش فشلة وإنهم الفاهمين والجهابذة علشان يوم مايضحكوا على الناس اللي تثور ضد بلدها ويشوفوها بتنهار .. يلهوهم في قضاية ثانوية (للأبد) عن أشخاص بدافع الحقد مش عن مستقبل بلاد ..
ماهو شوية بيمسكوا ضد الأزهر .. وشوية يمسكوا ضد الفنانين ولبسهم .. وشوية يسفهوا في العشرة جنيه الجديدة .. أنا كنت أتمنى لها شكل أحلى أكيد .. بس مهاجمتش الفكرة ، وأول مامسكتها بإيدي فرحت بيها والله ، بقى عندنا عملات صديقة للبيئة وصعبة التزوير وهنبقى مركز للطباعات مستقبلاً بإذن الله
فأسلوب التنظير ده بتاع الناس ساكتة ليه وإنزلوا ثورة . الناس لو سمعت كلامهم هتخسر نعم كتير إتبنت بتوفيق ربنا ومن بعده بالعرق والدم وإرادة المصريين إنهم عايزين يصلحوا. إحنا في وسط أزمات عالمية وتغيرات هتشمل منطقتنا .فلو مركزناش في إننا نحافظ على بلدنا .حدودنا ملتهبة وداخلنا مش ناقص
ده يكفي القمح اللي قعدتم تصوتوا عليه وإنتوا ولاهاممكم . بس لقيتوها وسيلة متاجرة كويسة وقتها . فلما بقى عندنا نسبة إكتفاء ذاتي كويسة ونسبة الإستيراد قلت والإحتياطي الإستراتيجي معقول . تقولوا شكرًا؟ . لأ إزاي . تمسكوا في حاجة تانية ، لو قلتم شكرًا هيتقال عليكم مطبلاتية وعبيد بيادة
ده حتى موضوع نيرة الله يرحمها .. ناس سابت كل ده وماسكة تدافع عن القاتل .. ليه؟ بحجة لبس البنت؟ . لأ . إنتوا متعاطفين مع القاتل ، علشان مش طايلين اللي زيها . بقول لكم بشكل مباشر . إنتوا عايزين بنات وستات مصر كلها تبقى ممسوح عقلها بأفكاركم وسيطرتكم إنتم .. وليكم جرائم قبل كده تشهد
ويقول لك كان بيحبها ... لأ ، أنا أهو مثال .. حبيت واحدة .. مفيش أي ظروف مساعدة للإرتباط خالص من أي ظرف .. وهي نفسها مش بتفكر فيا كفتاها يعني .. دي حاجة تقهرني المفروض وأنا إتأثرت .. لكن علشان بحبها أنا هحب إني أشوفها مرتاحة على كل حال .. مش أنتقم منها 😑 ياجماعة فيه إيه؟
ودلوقتي عاملين زيطة على موضوع الزيادة الطفيفة .ياسلام؟ .على فكرة كان تم التنبيه لها من فترة وبالتدريج .ترجعوا للمصادر؟ أبدًا . ماتحبوش تسيبوا حاجة في حالها من غير ماتعملوا لها حفرة علشان تحدفوا التراب على أي حاجة . قطارات جديدة وبتحدفوا طوب عليها . مواصلات جديدة وبتخربوها من جوه
حتى الكورة اللي بنتمتع بيها . لجان بقى دخلت .. شوية عاملة نفسها أحمر وشوية ناس عاملين نفسهم أبيض وماسكين في بعض . فالأحمر يمسك في الأبيض بجد بسبب الموضوع ده . حتى أهو الموضوع وصل للأخضر والأصفر كمان . ياساتر يارب . أعوذ بالله .. ليه كده؟ وعلشان إيه؟ الكورة متعة بتحرموها ليه مننا
واحدة كسبت في ألعاب القوى اللي إحنا مكانش ليها آمال فيها .. بسنت حميدة اللي عايزة علم .. في حين إن فيه واحد فضل سنين مايمثلش مصر في بطولات الفرق علشان يلعب بإسم بلد مقدرتش لسه تعمل لنفسها حضور في الأسكواش .. يقوم الشوية إياهم يمجدوا في التاني ويهاجموا لبس الأولى هي وجوزها 😑
وأي حد يعمل إنجاز ويقول أنا إخترت أمثل بلدي رغم الظروف .. يقولوا له بقى إنت كرهت ولادك فيك . والقلش على حصته في التموين . اللي هو كتموين أصلاً فيه بلاد مش بتلاقيه . واللي بيتريقوا عليه بياخدوه وهو خسارة فيهم الصراحة . فعالم مش عايزة تشوف نجاح لمصر علشان مايتمش نسبه للدولة وللسيسي
فيمسكوا بقى في الأمور اللي بتجيب تعاطفات .. تعاطفات بس .. زي علم فلسطين ، أبو تريكة ، منشورات أين حكام العرب .. أي حاجة من اللي مش شبه كلامنا كمصريين علشان يبانوا وكأن الثلاثي دول الحقيقة المطلقة .. مع إن الدولة المصرية على مدى تاريخها قدمت لفلسطين اللي دول مجتمعة ماقدمتهوش
ده في قضايا مكانش ليا نفس أتكلم عنها في وقتها ولاكان ليا مزاج ألم ريتشات على حسابها لو إتكلمت عنها وهي في قمة الترند .. إحنا داخلين على تحديات صعبة ممكن إحنا كمنطقة عربية نبقى أصحاب نفوذ فيها عالميًا لو كلنا كشعوب دعمنا دولنا داخليًا .. بس نفهم الأول ونشغل عقلنا .. ياريت يعني
جاري تحميل الاقتراحات...