حين يرتدي الجهل ثياب الحب فتعتقد انك تحمي طفلك من الشرور فينجو من كل شيء و يقع في شراك نفسه ! قصة اليوم عن جينيل بوتر
جينيل بوتر ولدت عام 1982 بفلدلفيا و كانت عايشة مع عايلتها المكونة من أمها باربرا و أبوها بودي و أختها الوحيده كريستي جينيل كانت تعاني من السكر و مشاكل بالسمع و صعوبات تعلم هالشي خلا أمها و أبوها جداً حريصين عليها و مركزين على كل تفاصيل حياتها
ممنوع تطلع و ممنوع تدخل و ما تصادق أحد إلا إذا جابوه لبيتهم و قابلوه وبعدها يقررون اذا يوافقون على هالصداقة او لا و مثل ما توقعت جينيل ما كان عندها اصدقاء ابد
وضع الأسرة هذا ترك أخت جينيل كريستي مهمشة تماماً و كانت إي مشكلة تطيح فيها جينيل اللوم يكون على كرستي و مهما أخطأت جينيل عمرها ما تواجه عواقب هذي الأخطاء و هالنمط المشوهة نتج عنه كره الأختين لبعض 💔 و ما فيه أسوء من إنك تفشل كمربي من زرع محبة أطفالك بقلوب بعضهم
أما عن المدرسة فجينيل ما تركت تواجه أي عقبة تواجهها إي مشكلة تحصل لها مهما كانت بسيطة الأم و الأب يجون للمدرسة و يتهاوشون مع المدرسيين ومع أولياء الأمور وعندهم استعداد يصعدون المواضيع مهما كانت تافهه!
مثل مره جينيل رجعت من المدرسة وأتهمت بنت إنها عطتها بوقس على وجهها بسبب "إنها مره جميلة " و الأم و الأب شكوا البنت بالشرطة و كانو يبون ياخذونها للمحكمة !
صدقوني لو وحده ضربتني لأني مره جميلة بتصير اعز صديقاتي و أتوقع الوالدة بتفرح باليوم اللي هالحادثة تصير فيها أكثر من فرحتها بيوم تخرجي بس هذا أنا وأمي ما أدري عن الناس .
يعني جينيل لا داخل البيت و لا برا البيت كانت تتحمل مسؤولية نفسها و تقدر تاخذ موقف بناء على تفسيرها و تحليلها ، حماية أمها و أبوها لها و أستقعادهم للعالم تركها قاصرة عن فهم اللي حولها و ماتعرف إذا اللي يكلمها يمزح أو لا أو إذا كان كلامها يزعل أو مهين لأن دايما الناس هم الغلط
جينيل كبرت وصار الكذب عاده أصيلة فيها فكانت تكذب على الناس إن فيها سرطان و تتظاهر بالأغماء بوسط الصف و لهالسبب أختها كريستي تقول أنا ما أصدق حرف تنطق فيه جينيل و أعتقد إنها مهوله أمراضها عشان تتلاعب بأمي و أبوي
راح صوتي و أنا أقول ترا بنتكم كذوب تراها فشلتني بالمدرسة كل شوي طايحة بمكان تراها ماهي بريئة مثل ما أنتم تتوقعون لكن للأسف كريستي هي اللي كانو الأم و الأب يشوفونها كذابة
و لكثرة المشاكل و الصدامات بينهم العايلة كلها صارت ضد كريستي لدرجة الام قالت للاب افْتلها و خل جسدها بمكان تكتشفه الشرطة عشان نقر تاخذ فلوس التأمين عليها !
كريستي مجرد ما تخرجت من الثانوي أنتقلت من بيتهم و أنقطعت تماما عن أهلها .
جاء الوقت اللي تخرجت فيه جينيل من الثانوي و كانت تبي تدور على شغل لكن أهلها كانو يشوفون إن ما عندها المهارات الاجتماعية الكافية اللي تأهلها إنها تحصل وظيفة ، و انا متأكدة كانو حاطين السبب "أمراضها" مو بسبب طريقة تعاملهم معها
فقالولها خلاص إقعدي بالدار و الحكومة تصرف لك إعانة بسبب مرضك و اللي ينقصك حنا نزودك غير إن قعدت البيت بلا هدف تقهر حتى الوناسة مفقودة بحياتها جينيل ما كان عندها إصدقاء و لا حتى أشقاء تتواصل معهم
على الأقل بالمدرسة كانت كل ما طفشت أنسدحت و تجمعوا الناس حولها بالبيت لو انسدحت هذا الطبيعي
الأسرة و بشكل مفاجئ قرروا ينتقلون من فيلدلفيا و قالو حياة المدينة خلاص ما تناسبنا و أنتقلوا على بلدة صغيرة أسمها مونتن سيتي هالديرة كان فيها 2500 نسمة بس و كان كل من فيها يعرف عن الثاني كل شي
وهالشي خلاها بيئة خصبة للقيل و القال و لو شخص واحد كان شاهد على خطأ صدر منك كل الديرة بتدري و يمكن يتناقلون هالسالفة جيل ورا جيل
طبعا مكان صغير زي هذا إي غريب راح يكون تحت المجهر وهذا اللي صار لعائلة البوتر و مثل ما أنت متوقع الناس ما حبوهم و عندهم ملاحظات كثير عليهم
الأم كانت شخصيتها متسلطة و معتده برأيها حتى أتفه الأشياء ما تخليها تعدي و يوميا كانت تدخل بجدال مع الناس بالبقالة ! هذا غير إن فيها شوفة نفس عليهم
أما الأب فكانو يقولون عنه أكذب من دب و درج إذا أختلى مع الرجال قعد يروي لهم بطولاته يوم كان يشتغل بالبحرية اللي وصل خبرها لوكالة الإستخبارات الإمريكية و أشتغل معاهم فترة ! لكنه بالحقيقة شخصيته ضعيفة و ثقافته محدوده و هالشي خلاه يساير زوجته بكل شطحاتها
أما جينيل فكانو مستغربين وضعها بآخر العشرينات إلا إن أهلها يعاملونها معاملة طفلة مازالت عايشة معهم ممنوعة تسوق ماهي موظفة و لا حتى تبحث عن وظيفة هذا غير إنها ما تعرف تتعامل مع الناس و تصرفاتها تصرفات طفلة فكانت تمشي وتضم كل من تشوفه بالشارع حتى لو ماتعرفه !
و مره لطيفة معهم و مجرد ما يقولون شي ما يعجبها أو مثلا ما أعجبتها النبرة اللي تكلموا فيها تقلب عليهم و تصير تهاوشوهم ثم يجي أمها و أبوها يركضون يبون يرفعون قضايا فكانت فعلاً تسبب مشاكل لأي احد تقترب منه و هالشي خلا الناس يتجنبونها تماماً
بعام 2004 بدت تظهر السوشل ميديا
جينيل أتجهت لهالعالم بكل قوتها و عاشت فيه بشخصية جديده خلقتها لنفسها و صعوباتها بالتواصل مع الناس ماهي موجوده بهالعالم جينيل كانت تمشي وترسل طلبات صداقة وهدفها كانت انها تبين للناس كشخص إجتماعي
جينيل أتجهت لهالعالم بكل قوتها و عاشت فيه بشخصية جديده خلقتها لنفسها و صعوباتها بالتواصل مع الناس ماهي موجوده بهالعالم جينيل كانت تمشي وترسل طلبات صداقة وهدفها كانت انها تبين للناس كشخص إجتماعي
حتى انها بدت تستخدم كم صورة عندها مع أحد جيرانهم بفلدلفيا على أنه حبيبها اللي ميت عليها وبالحقيقة ما كان بينهم علاقة أبداً ! مين بيعلم اللي بالإنترنت إنك تكذب ؟ ما أحد
جينيل اكتشفت موقع ثاني و كان اسمه topix حالياً ما عاد هو موجود و هالموقع فهمته إنه مشابه ليودل مشاركات مجهولة بين الناس بمدينة أو منطقة وحده فقط ، هالموقع كان عبارة عن مزبلة أخلاقية الكل كان يتناقل الشائعات فيه و اللي ما يقدرون يقولونه بوجهك يروحون يكتبونه على الموقع باسم مجهول
لدرجة إن كان فيه قائمة للي سموهم عا*ـرات المدينة و كل شوي يحدثونها ! جينيل صار هالموقع زيارته اهم فعاليتها اليوميه .
هنا دخلت بحياة جينيل وحده اسمها تريسي قرينويل و هالانسانه تعتبر الصديقة الأولى لجينيل ، تريسي كانت الصيدلانية اللي تصرف ادوية جينيل و كانت تسمع عن جينيل و عن وضعها و رحمتها و قررت إنها تتعرف عليها و صارت تستغل اللحظات اللي تكون جينيل فيها بالصيدلية و تسولف معها
لين حست إنها خلاص صارت قريبة من جينيل و عزمتها على حفلة معها هي و صديقاتها قال جينيل والله ودي بس أهلي لازم يسوون معك مقابلة أول و أكيد انك ما تبين قالت تريسي وشدعوه أبرك الساعات أشوفهم وأسولف معهم بس حددوا اليوم و علموني
و فعلا قابلتهم تريسي و نجحت بالمقابلة و خلاص صارت صديقة جينيل رسمياً ، جينيل الحين تطلع و تدخل مع تريسي و صارت تحضر إجتماعات و حفلات و تسوي نشاطات ما قد سوتها من قبل مثل تسلق الجبال يعني فعلاً تريسي طلعت جينيل من قوقعتها و ورتها العالم الحقيقي
و مع كثرت طلعات جينيل مع تريسي كانت تلتقي بأخو تريسي اللي اسمه بيلي و جينيل كانت عاشقة بيلي يمكن لانه كان لطيف معها و يحرص عليها و يعاملها كأنه يعامل أخته مراعاة لظروفها ، لكنه أبداً ما كان يفكر فيها أكثر من كذا
هذا غير انه بذاك الوقت كان عنده مشكلة بالادمان و كان مو قادر يلتزم بأي علاقة فكانت جينيل كل شوي تشوفه مع وحده لكنها ما أهتمت لأنها عارفة إن العلاقة ماهي جادة لين جاء ذاك اليوم اللي تعرف بيلي على وحده أسمها بايلي و فعلا حبها و بسببها ترك المخدرات و أنصلح حاله
بهالوقت تريسي جت لجينيل و قالت ودي لو تقابلين ولد عمي جيمي و تشوفين كانه جازلك تريسي آخذه على عاتقها تغيير حياة هالبنت وتبي تساعدها بكل شي يا بعد عمري😔❤️، و سبب أختيار تريسي لجيمي هو لأنه يتشارك بعض الصفات مع جينيل
فهو بعد كان يعاني إجتماعيا و لا هو سهل عليه يبدأ علاقات حتى إن جينيل كانت أول حبيبة له و هو وقتها بمنتصف الثلاثينات ، جينيل وافقت و فعلا بدأت علاقة مع جيمي لكن بدون ما تعلم أهلها و لهالسبب جيمي أشترى لجينيل جوال ثاني يتواصل معها فيه
بس كانت تدخله البيت بصفته فني صيانة بيصلح الكمبيوتر حقها و كانو أهلها مصدقين إن هاللي يجيهم كل يومين و يقعد بغرفة بنتهم جاي عشان يصلح الكمبيوتر بس !
جينيل أجتمعت مع تريسي و أصدقائها كالعادة و كانت معهم بذيك الجلسة بيالي و اللي كانت بتقول شي راح يغير مصير حياة أسرة البوتر للأبد ! بيالي صرحت أنها حامل ! جينيل هنا تأكدت تماما إن لو كان عندها 1% فرصة أنها تكون مع بيلي الحين صارت صفر !
جينيل أمتلت غضب و أول شي سوته لما رجعت للبيت فتحت topix و قعدت تسب و تشتم ببايلي و تتهمها بأنها تخون بيلي و أنها مدمنة ولا هي أم كفؤ لهالطفل و بدت تهدد بأنها راح تفْتلها و تفْتل اللي ببطنها !
طبعاً بايلي كانت مصدومه و خايفة على نفسها من هالمجنون اللي يتهدد فيهم اللي كان أسمه مات بوتر ! و كانت تقول معقولة له علاقة بجينيل بوتر ! و راحت تسأل جينيل تعرفين هالرجال ؟ قالت أيه هذا أخوي يدافع عني !
و طبعا بايلي عرفت إن جينيل هي اللي تكتب هالكلام لأنها تدري إن جينيل ماعندها أخ بعدين يدافع عنك ليش وش سويت لك أنا !
هنا جينيل كانت تبي سبب يبرر لها هجومها على بيالي فصارت تكتب عن نفسها على الموقع والكلام كله تهديد و تنمر و ما كان أي تهديد كانت تهديدات خطيرة جداً و كانت تدعي جينيل إن بايلي هي اللي كاتبته هنا تدخلوا أمها و أبوها و راحو يهاوشون بيلي و بايلي
و كانو يقولون والله يا خالة إننا ما قلنا شي لبنتك و ترا هي اللي تكتب لنفسها حنا نبي السلامة منها بس ، طبعا يحسبونهم يتكلمون مع ناس عاقلة ما يدرون إن ما عندهم أحد !
طلعوا من عندهم و راحو يشتكون بايلي بالشرطة وقالو أنها خطر على بنتنا و فعلا المحققين استدعوا بايلي و انفتحت تحقيق !
طلعوا من عندهم و راحو يشتكون بايلي بالشرطة وقالو أنها خطر على بنتنا و فعلا المحققين استدعوا بايلي و انفتحت تحقيق !
تخيلي لو أنك مكانها حامل و بالشه بهرموناتك و فوقها هالمجنونة و أهلها ما تركوك بحالك و كل يوم طالعين لك بسالفة ! يالله بس
جينيل يوم شافت إنها ما حصلت على ردت الفعل من الشرطة اللي كانت تبيها راحت و رمت حصى على دريشتها متهمه فيها إن بايلي هي اللي سوت كذا حركة غبية صح ؟ الأغبى إنها كتبت أسم بايلي جين على الحصاة عشان تثبت عليها التهمة !
هذا غير إن جينيل كانت تدق على بايلي من خمس إلى عشرين مره باليوم تسبها و تشتمها ! هذا غير إنها بكل مره تشوف واحد من عايلة بوتر كانت تتلقى منهم أسوء الشتائم لين جاء ذاك اليوم و ألتقت مع جينيل و أمها بالمحطة و حشروها و قعدوا يهاشوونها و يسبونها
لين أنهارت بايلي و قعدت تصيح و صارت ما تطلع من بيتها ! و هالجنون أستمر شهوووور جينيل مالقت اللي يعقلها ، لكن بايلي مضت بحياتها و تمت خطبتها لبيلي و انجبت طفلها و سمته تايلر و كانت تجهز لزواجها
و بأحد صباحات عام 2012 أحد جيران بيالي و بيلي أكتشف أنه تم فْتل الزوجين 💔 و طفلهم تايلر كان عمره سبع شهور يبكي وهو بين أحضان امه اللي فارقت الحياة💔 الجريمة كانت فاجعة للمدينة الآمنة الصغيرة
و اول شي سوته الشرطة راحو استجوبو اسرة البوتر و سجلوا التحقيق بدون ما يدرون الاسرة
بعدها جابو جيمي للتحقيق و قالهم شي ما توقعوه !
هنا الشرطة ألقت القبض على بودي و طلعت مذكرة تفتيش للبيت
وحصلوا ثلاث أكياس مليانه أوراق مقطعه وهذا كان الدليل اللي يحتاجونه
اللي حصل إن هالأوراق هي من شخص أسمه كريس تواصل مع باربرا على الإيميل و كشف لها إنه عميل للإستخبارات الأمريكية و أنه أحد أصدقاء جينيل يوم كانو بفلدلفيا و بسبب عمله أكتشف إن بيلي و بايلي قاعدين يخططون على خطف و فْتل جينيل العجيز أنهبلت كلش و إلا جوجو
هالكريس قعد يكلمها شهور و صار بينهم ثقة وهنا قال لباربرا لازم بيلي و بايلي يفْتلون ! و بهالوقت بدأ كريس يتواصل مع جيمي و يقوله نفس الكلام باربرا و جيمي أجتمعوا و قعدوا يفكرون وش يسوون و قررت باربرا تعلم بودي عن هالموضوع و بودي من حينه يبي أي طاري للأستخبارات
قال لجيمي بكره الصباح نبي نلبي النداء و فعلا بكرة راح و مر جيمي وراحو لبيت بيلي وبايلي و أطلفْوا النار على بيلي بدم بارد وهو نايم بايلي قامت من صوتهم وقدرت تهج وراحت لغرفة ولدها تبغى تنقذه لكن للآسف ما أمداها تفلت منهم و أطلقوا عليها النار وهي حاضنه ولدها تبي تحميه💔
طب مين انت يا كريس و وش سالفتك ؟ الشرطة قدرت تتبع الاي بي و اكتشفوا ان الرسائل كانت تجي من كمبيوتر جينيل صدمه صح ؟ هنا اعتقلوها هي و امها
اما هوية كريس من وين جت هالشي برضو قدروا انهم يتوصلون له
لكن لا الام و لا جينيل اعترفوا انهم اهم علاقة باللي صار
احد الاشياء اللي كانت تبحث عنها باربرا من بداية هالسالفة هي هل ممكن الله يغفر لمن يفْتل ؟
الدفاع حق جينيل كان يقول جينيل ما عندها القدرة العقلية اللي تأهلها انها تخطط لمثل هالشي لكن الادعاء قدر يثبت التهمه عليها لان الاخطاء الاملائية حقت كريس نفسها اخطاء جينيل يمكن هذي القضية الوحيده اللي انوخذ فيها حق الاملاء !
لكن هالشي ما ثنى جينيل عن اصرارها على ادعاء برائتها
تم الحكم على بودي و باربرا و جينيل بالمؤبد لكن جيمي حكمه خُفف لـ ٢٥ سنة لانه عقد اتفاق بالشهادة ضد البوتر .
انتهت قصة اليوم و اللي كانت تجسيد حقيقي لمقولة " عدو عاقل خير من صديق جاهل " جينيل رغم الصعوبات اللي كانت تواجهها الا ان امها و ابوها ما كانو عون لها بأنها تهذب نفسها .
اذا وصلت لنهاية هالثريد تقدر تتطلع على القصص السابقة وهذي احدها
جاري تحميل الاقتراحات...