ثريد عن ما بعد نتيجه التكليف و مرحله استلام العمل و شويه نصايح مهمين خليهم في بالك و انت بتستلم الشغل
فتره الاستلام فتره صعبه و مرهقه جدا عشان كده طااااووووول بالك قدر الامكان ,, و يمكن ده سبب رئيسي لما بنقول لاي حد مقدم تظلمات انه الافضل ينتظر نتيجه التظلمات عشان ميتسوحش ف حوارات الاستلام
الحضور ف اغلب وحدات القاهره كتير ميقلش عن ٤ ايام صباحي غير النبطشيات ,, لما تروح تستلم خليك هادي و بلاش تدخل معاهم ف حوار التقسيم و الحضور القليل اتعرف ع الناس و خد عليهم واحده واحده هتلاقي نفسك بتقسم ايام الحضور
متاخدش ع الناس بسرعه خصوصا ف الشغل ,, اسمع من ده و اشتري من ده و في الاخر هتفرز الناس لوحدك لان الشغل فيه قاعده كده اكثرهم قربا منك اكثرهم اخبارا عنك 😌🤚 خوازيق عند المدير و رئيس القسم و زمايلك و هكذا , فاشتري و متبعش , و بهدوء هتقدر تعرف الكويس من الوحش
اهم حاجه و انت بتستلم ان دايما دايما كل ورقه تخلي معاك صوره و اتنين و تلاته منهم مهما كانت درجه تفاهه الورقه دي و بليز كل ورقه صورها ع موبايلك برضو ,, في ناس " ملفاتهمم " بتضيع , ايوه زي ما سمعت ملفاتهم كلها بتضيع مش ورقه و لا اتنين 🤚
خلي معاك نوته صغيره او نوتس الموب و اكتب التواريخ المهمه عشان هتحتاجها بعدين , اكتب تاريخ استلامك ف المديريه/ الاداره/ الوحده/ المستشفي / بعدين تاريخ الاخلاء/و هكذا وراجع التواريخ دي كويس ف الورق اللي بتاخده في ايدك خصوصا لو الورقه مختومه, ف غلطات بتحصل كتير و هتعطلك بعدين
لما تيجي تستلم و تدخل ع الناس ف الشغل خليك ذكي و متطلبش اجازه من اول اسبوع , دا بيدي انطباع للناس عنك انك مش بتاع شغلك , اكسب الناس و خد عليهم و بعدين اطلب كل حقوقك
لما تروح تستلم ف النائي اعرف ان ليك الحق ف السكن و الاكل , يعني الاداره مجبره توفرلك سكن ادمي تسكن فيه مجهز بتلفزيون و تلاجه و غساله و ليك الحق في الاكل سواء مطبوخ و جاهز او اكل مجفف و دا قرار رئيس وزراء مش تفضل منهم
لما تستلم السكن بتاعك اتأكد من كل حاجه فيه انها شغاله , هاتلك قفل صغير اقفل بيه شنطتك و قفل لدولابك و اتاكد ان محدش معاه مفاتيح الاستراحه بتاعتك غيرك , بلاش تاخد اي اجهزه غاليه معاك ف اول شهر الا لما تجس نبض المكان
البنات اللي بتاخد معاها مامتها او باباها عشان الاستلام ف النائي , ملوش لزوم خالص بهدلتهم ف السفر و المحافظات البعيده , سافروا مع اصحابكم في مجموعات هتهونوا ع بعض الطريق و التعب
مرتبك بيتحسب من اول يوم استلمت فيه عمل في المديريه نفسها , يعني مش من اول يوم في الاداره و لا الوحده فمهم جدا ان مرتبك يتحسب من اول ما استلمت ف المديريه , دا حقك
انت ليك الحق في كل الاجازات من اول ما تستلم , ليك ٧ عارضه و ٢١ يوم اعتيادي , فلو موظف قالك ملكش اجازات !! قوله انك مكلف مش معين و بالتالي ليك رصيدك من الاجازات زي اي حد
بعد ما تخلص لفه استلامك و تريح بعدها بأسبوع من فضلك ابقي طلع بطاقه التأمين الصحي ,, عشان لو حصلتلك اي ظروف مرضيه طارئه تكون موجوده مكان " بتطلعها من الاداره "
الناس اللي بتستلم في مطروح او البحر الاحمر او شرم الايام دي موسم و فيها حركه سياحه ف تقدر تلاقي شغل برايفت و ربنا يكرمك بس انت اتحرك و دور
كل خطوه تعب بتقضيها ف اي مشوار من الحاجات دي سواء استلام اخلاء تعب مع الموظفين الخ الخ , احتسب الاجر ده عند الله و جدد نيتك كل يوم انك رايح تشتغل و تساعد خلق الله في ارض الله , فتؤجر علي النيه
جاري تحميل الاقتراحات...