بالنسبه لـ موضوع ستار لايك و الربح من الانترنت و تاخذ دولار و اربعين سنت كل يوم بالبلاش و بعد فتره يزيدن و يقعدن اربعه دولار و و و و تعالو نحكيلكم عليه شويه ...:
الشركه هذي اغرتكم و قالت تعالو خوذو دولار و اربعين سنت في اليوم مقابل كبسة زر فقط و رسمتلكم الصوره علي اساس انّك انت المسفيد و همّا كأنهم دايرينها ل وجه الله و بعد اتخش ع الرابط و اتسجّل يبدو عاد في الاول يقولولك لا راه الدولار و اربعين سنت في اليوم هذينا ما تقدرش تسحبهن توّا..
لازم تصبر 77 يوم و كل يوم دير المهمه متاعك اللي هي ( لايكات ل ناس يبو ينشهرو و الشركه مستفيده منهم) و بعد 77 يوم تقدر تقعد vib1 و تاخذ فلوسك و الا لو تبي تقعد vib 1 من توّا عدّي جيبلنا 40 نفر ايخشّو بالرابط متاعك و يديرو المهام حتّى همّا ( لايكات ل ناس دافعين فلوس للشركه) ..
و بعدين بعد اتجيب اقل شي 40 نفر و اتفهمهم شن نظام شركة ستار لايك تو انرقوك vib1 هي ف تمشي انت و اتجيبلهم اربعين واحد اخرى ايديرولهم المهام ( لايكات) و اتقوللهم اهو جبت 40 واحد يقولولك لااا لازم كلهم يديرو المهام ممنوع واحد منهم يغفل ع المهمه ف تمشي تقعد تبرم ع ال 40 هذوما بالنفر
و اتقوللهم بالله عليكم ديرو المهام و ايديروهن فعلاً يمشو يقولولك لا معلش لازم ال 40 نفر هذوما يكونو دايرين المهام من نت شفره ممنوع يكونو عالقين على كونّكت او ليبيا تك عشان هكّي ح نحسبوهم كأنهم فاتحين من نفس الجهاز و نحظروك و اخر شي يقولولك معلش راجعنا ملفك و ما نقدروش انرقوك ..
هكّي انت جبتلهم اربعين نفر و الاربعين اللي انت جبتهم كل واحد فيهم جاب اقل شي اربعين واحد و حتّى همّا بيجيبو لأنكم كلكم طامعين في ال vib1 علشان تكسبو اربعه دولار في اليوم و تقدرو تسحبوهن ...
الخلاصه : طول ما انت في مرحلة vib0 مش ح تستفيد شي حتّى لو يحسبولك في دولار و اربعين سنت في اليوم انت مش قادر تاخذهن لعند اترقّى ل vib1 و هذي حاجه مستحيله لأنهم كل ما اديرلهم شرط من الشروط يعطوك شرط جديد اصعب منّه و بعد يوحلو بكّل يقولولك تم استبعادك و المستفيد الوحيد هي الشركة.
جاري تحميل الاقتراحات...