اول ما اتجوزت كنت ساكنة فى عمارة وجمبى جارتي فى حالها وماليش اختلاط بيها اللى اعرفه جوزها مسافر وقاعدة هى و اولادها فى ليلة خبط فظيع على بابنا وعيال ماما ماما الحقوا ماما دخلت اجرى انا وجوزي والست كانت واقعة فى الأرض ومخنوقة وبتتشنج المهم جوزى لحقها و..

وجاب لها الدكتور من المستشفى بعدها بأسبوع كان الضهر وكنت لوحدى ونازلة لقيت البنت الكبيرة كانت فى ثانوى تقريبا من ورا الباب الحديد الحقينى ماما قولتها مامتك تعبت تانى قالتلى اه قولتلها طيب افتحي اشوفها قالتلى مش لقيه المفتاح طبعا انا الشهامة خدتنى ونزلت الشارع اشوف حد يفتح لنا ..

الباب لقيت النجار فاتح قولتله وجه معايا جاب حاجات وقعد يهبد فى الباب لحد مافتحه دخلت اجرى على جوا اشوف مامتها مالقتش حد طلعت تانى على بره لقيت الراجل واقف بقوله فين البنت قالى نزلت ومعاها شنطة أنا كنت واقفة مش عارفة اعمل ايه

الراجل نزل يجرى طبعا وانا واقفة مكانى ولقيت مامتها طالعة ولقيتى واقفة متسمرة على الباب قعدت تصوت فتحتى لها ليه دى عايزة تهرب وتصوت طبعا العمارة اتلمت اتارى الهانم بنتها بتحب واحد وهربت معاه وهى كانت حبسها انا قعدت رعب حوالى تلات ايام لحد مارجعوها وبعدها والست اعتذرت لى

لان بنتها ضحكت عليا واستغلت الموقف التجربة دى كانت كفيلة تعلم واحدة عندها عشرين سنة متساعدش حد تانى اى واحدة غيرى لان انا مابتعلمش يا جماعة الجدعنة المفرطة دى لبستنى فى حاجات كتير امتى هتعلم بس 😅