هل ربنا ممكن يمنع عني الرزق بسبب ذنوبي ؟
الإجابة المباشرة : آه .
و الإجابة بالتفصيل : مش شرط ، و مش دايما .
أحد أشكال عقاب الله للعبد على ذنوبه هو توقف الرزق اللي كان هيجيله ، أو حرمان من رزق كان عنده .

بس مش دايما ده العقاب ، فا ماينفعش كل ابتلاء يحصل في حياتنا او مصيبة تحصلنا نقول ربنا غضبان عليا!
ممكن ربنا بيحبك فا بيطهرك من ذنوب انت مش واخد بالك منها أو بيرفع درجاتك في الجنة .
(بس بالتأكيد نحذر و نراجع ذنوبنا ).
الفكرة ان العقاب ممكن يجي بأشكال انت ماتتخيلهاش

زي ان علاقتك باللي بتحبهم تبدأ تبقى وحشة و يحصل فيها مشاكل !
أو ممكن إنك ماتتوفقش للطاعات ، او تحرم طاعات كنت بتعملها .
أو ممكن يحصل مشاكل في البيت عندك بسبب ذنوبك ، لو أهل بيتك صالحين يكون ليهم ابتلاء مجازين عليه و ليك انت عقاب .
ممكن تصاب بالهم و الغم و الاكتئاب من غير سبب ،

نفسك اللي بين أضلعك تضيق عليك ..
أشكال العقاب مختلفة ، بس طول ما في عقاب يبقى ربنا بيحبك و دي نقطة مهمة !
امال امتى أزعل ؟
لما تلاقي نفسك متمادي في الذنوب و بتسوف التوبة و ربنا عمال يديك في صحة و مال و رزق
اعرف وقتها ان ربنا سابك لنفسك ،

من الآخر ربنا ماعدش بيديلك اشارات و لا بيعاقبك عشان يطهرك
ربنا سايبك لحد ما تموت فا تقابل أعمالك ..
ماتفرحش بالنعم و انت مُصرّ على المعصية
و ماتزعلش على ابتلاء و انت بتجاهد 🖤.
أميرة علاء
منقول