حابب اشاركوا تجربتي مع طوارئ القصر العيني.. مبدئياً كده الدوله بتتحمل كتير جدا جدا في الجزء ده.. تقريبا مفيش جنيه بيندفع مقابل خدمه هناك..لا كشف ولا اشاعات ولا تحاليل ولا اي حاجه..العلاج اللي بيتكتب انت بتجيبه من بره القصر خالص.. وحابب احكي الحكايه بالتفصيل فاستحملوني..1
في الشغل اتصلوا عليا الساعه ٨ ونص بالليل بلغوني ان في مندوب عمل حادثه بالموتوسيكل وهو مروح.. وقالولي علي مكانه بالظبط ومن فضل ربنا كان بيني وبين المكان ده اقل من خمس دقايق. وصلت لمكان الحادثه ملقيتش اي حاجه خبطاه..بالعكس الفرامل تقريباً قفشت وهو داخل علي مطب خلت الموتوسيكل يتقلب٢
يتقلب بيه..وقع علي وشه والتشخيص الظاهر قدامي كدمات وجروح متفرقه في وشه ورجله اليمين وايديه الاتنين مع كدمه شديده في أيديه اليمين مبيحركش ايده وتقريباً قولنا فيها كسر..المهم خدته وطلعت علي القصر العيني طوارئ الاستقبال..روحت انا وهو بس بعد كده اخوه جالنا علي هناك 3
قطعنا تذكره ودخلنا علي كشف الاصابات المتعدده.. مبدئيا مفيش سرير فاضي وكل تلات دقايق في حاله داخله.اطفال علي رجاله كبار علي ستات كبيره..مفيش حد بعيد عن الاصابات حرفيا ربنا يحفظ الجميع.مشرف الاوضه جه بص عليه حكيتله اللي حصل..كشف عليه وكتب الاصابات اللي فيه وكتب ان في نزيف من ودنه4
يا نهار اسود نزيف من ودنه دي مشكله كبيره..مكنتش شوفت النزيف ده علشان الجو كان ليل وقت ما خدته.. المهم طلب اشاعات.. اشعه مقطعيه علي المخ واشعه سونار علي البطن واشعه موجات علي دراعه وكتفه..روحنا عملناهم خلال نص ساعه بالكتير كنا خلصنا الاشعات..مدفعناش جنيه في الاشعات دي 5
الاشعات دي في اي مكان بره هتتكلف فوق ال ٣٠٠٠ جنيه والله..الاشعه طلعت.. السونار الحمد لله مفيهوش حاجه.. المقطعيه ظهرت في شرخ في قاع الجمجمه 😥 ده اللي يكون مسبب نزيف الودن..اشعه الدراع مسالناش عليها فيها ايه بس هيجي دورها بعد كده..ربنا كرمنا بطبيب امتياز راجل محترم وابن ناس 6
ربنا يكرمه يارب..وقف معانا مسبناش بصراحه وكان بيوجهنا نعمل ايه ونسوي ايه بدون ما يزهق مننا.. قالنا هنستني نعرض الاشعه المقطعيه علي الاستشاري هيشوف هيقول ايه..المهم كانت الساعه دخلت علي ١١ او ١٢ بالليل..الاستشاري كان رأيه انه في فعلا شرخ في قاع الجمجمه ومش هيتحدد هل هو سبب النزيف7
ولا لا الا لما يقعد تحت الملاحظه شويه..وخلال المده دي اللي غالبا هتكون لحد ٧ صباحا وهيتعمل اشعه مقطعيه تانيه. وطلب فحص عظام وفحص انف واذن وفحص جراحه.. روحنا علي العظام..نفس اللي لاقيناه في الجراحات المتعدده من زحام رهيب لاقيناه في العظام برضه..بس الناس رأفت بحال عمر ودخلوه اولا 8
الدكتور كشف عليه طلب اشعه.افتكرت اننا عملنا الاشعه دي مع المقطعيه والسونار قال كويس بعت حد تبعه يصورها وشافها قال مفيش كسور الحمد لله دي كدمه شديده وكتب علي علاج مسكن وخرجنا من عياده العظام.هنا لازم اشكر الدكتور اللي خلانا نعمل اشعه العظام مع المقطعيه خف عننا كتير جدا الله يكرمه9
روحنا بعد كده علي طوارئ الانف والاذن.. دخلنا الدكتور كشف عليه وعلي ودنه اللي بتجيب دم دي..قال ودنه تمام مفيهاش حاجه..طيب الحمد لله بس في نفس الوقت بيتاكد الشكوك حوالين ان في شرخ فعلا في الجمجمه.. خرجنا من الانف والاذن روحنا طوارئ الجراحه..لاقيناها بالطابور طيب احجز دور ياعم.. 10
لاقينا دورنا ٤٠ وهو كان شغال في ١٥ 😂😂 وده بقي خياطات بقي بتطول.. وحالات اصعب من عمر بكتير جدآ.. رجعنا للدكتور الامتياز قولتله علي اللي عملته واللي معملتوش..قالي معلش خليك بس هناك علشان لو في امكانيه اننا نحجزه يبقي مخلصين كل ورقنا..قعدت بتاع ساعتين بيه ودورنا لسه مجاش ..11
كان عمر تعب مني خالص وفيص كتر خيره بصراحه.. رجعت للدكتور الامتياز تاني قولتله مش عارف اعمل كشف الجراحه..قالي تعالي راح واخد الورق مني ودخل بيه لدكتور الجراحه حكاله علي وضعه واستاذنه يطلع يشوفه علي سريره في الاصابات المتعدده..بصراحه طلع دكتور محترم وجه شافه وكتب تقريره..12
الحمد لله خلصنا من كله فاضل بس حاجه بسيطه عمر هيتحط علي الأكسجين ربع ساعه كل ساعه..كانت الساعه ٣ تقريباً..يعني هيقعد لحد الساعه ٧ لحد ميعاد الاشعه المقطعيه التانيه..انا كنت فيصت خالص قولت اطلع اريح في العربيه شويه لحد لما تيجي ٦ ونص وبعد كده ادخل تاني..جه معاد المقطعيه خدناه 13
انا واخوه عملنا الاشعه وطلعت واكدت ان في شرخ فعلا بس الموضوع بقي اسهل من الاشعه الاولانيه..بس احتياطيا فعمر هيتحجز يومين تحت الملاحظه في قسم المخ والأعصاب في القصر..قولنا ماشي مش مشكله ده لمصلحته برضه.. خلصنا كل الاوراق الخاصه بالحجز والتحاليل اللازمه وطلعنا بيه علي مكان حجزه 14
وحجزناه فعلا الحمد لله واتسكن في عنبر محترم ونضيف وبيطل علي الكورنيش احلي فيو ممكن تشوفه ..خلاصه الموضوع ده هقولكوا علي المصاريف اللي صرفتها هناك...اشعات وتحاليل وكشف انف واذن وعظام وجراحات متعدده مدفعتش فيهم جنيه واحد..
٥٠ جنيه تمن دواء مسكن للعظام من صيدليه خارجيه..15
٥٠ جنيه تمن دواء مسكن للعظام من صيدليه خارجيه..15
٩٠ جنيه شويه عصائر وميه ومناديل وباتيهات ..
٣٠٠ جنيه رش علي موظفين السيكورتي اللي واقفين علي الابواب..مبيدخلوش اي حد من غير ما تدفع لو مدفعتش تتركن..ده عشره وده عشرين وهكذا..
٥٠ جنيه امين شرطه القصر كان جاي يعمل محضر بالحادث بعد ما كتب المحضر شاف الخمسيانيه راح مقطع المحضر 😂😂😂
٣٠٠ جنيه رش علي موظفين السيكورتي اللي واقفين علي الابواب..مبيدخلوش اي حد من غير ما تدفع لو مدفعتش تتركن..ده عشره وده عشرين وهكذا..
٥٠ جنيه امين شرطه القصر كان جاي يعمل محضر بالحادث بعد ما كتب المحضر شاف الخمسيانيه راح مقطع المحضر 😂😂😂
الموضوع اللي اللي هزني من جوا في الليله دي.. الاسعاف جابت حاله واحده ست خبطتها عربيه عند سور مجري العيون.. الدكاتره اشهد الله انهم مقصروش معاها لحد لما دخلت بس خلال عشر دقايق من دخولها كانت توفيت..طفل صغير حوالي سنه او سنه ونص.. جاي بنزيف في ودنه اتضح أنه واقع علي دماغه 16
طفل عنده بتاع ١٠ سنين جاي كان متعلق في الاسانسير بالعكس رجله فوق وراسه تحت..جاي وشه ازرق كله حرفيا..و٣ اربع حالات اطفال جايين واقعين علي دماغهم..خلوا بالكوا كويس من اطفالكوا ربنا يحفظهم ليكوا بجد..17
وأخيرا الحادثه دي حصلت مع اخوه بالظبط من حوالي ٥ شهور ( اخوه موظف معانا برضه في نفس الشركه) انا كنت حاسس ان اخوه اللي قدامي..بس الفرق ان اخوه كان عنده كسور في عظمه الترقوه وشرخ في الحوض..وساعتها روحنا بيه مستشفي الهلال الأحمر مش القصر..وربنا كرمه وقام منها بالسلامه..
جاري تحميل الاقتراحات...